*ING BENGI
        Neng Maria Teresa M. Evangelista
             Agosto  5, 2010

Pabustan mung misulat ku’t ibie ke keka,
Poesiang maniabi king ika lugud daka,
Pakalagu karing mamutaktak a rima,
At bersong sukdulan miraras babo Banua…

Pabustan mu ing midalit ku kekang musika,
Ya kabud dalit ning pusu kung magtumaila,
Karin king Katasan, ding nota alsa ra ka,
At sulapo ra kata ding pakpak ning sinta.

Bustan mo gamat ku mapis king kekang lupa,
At mipaglalawe ding maglaso tang mata,
Akit tang masala ing iwaga ning sinta,
At ing mailing bulan sunlag ne man kanita.

Bustan mung ding taliri mu aramdam ku la,
Apis-apisan magurung ing buak kung makaba,
Magpataluras, e balu nu la mikalma,
At pakilig na ku ning lawe mung maratna.

Bustan mu ding labi mu midampian lang uma,
Ban panamdaman mu ing pali managkat ya,
Bustan mung mapi kata king peka ligaya,
At kambe ning api malaso kata’t mawala.

Bustan mung pekatalik ing kaul ku keka,
Damdaman me sa pusu ku king bubulung na,
Paninasan ing bulan e ya mako sala,
At e paninasan na ing bengi mawala.

Tara, pakalagu te ing bengi king sinta,
Tara karing brasu mu pakakaul mu ku pa,
Samantalan te’ing bulan kabang mabilug ya,
At purian te ing bengi anggang munag-sala.

*Ginale nang MTMME king radyu ning Indung
Kapampangan, 91.9FM, Agosto 7, 2010

             THE NIGHT
      By Maria Teresa M. Evangelista
           August 5, 2010

 Let me write and offer to you,
 A poem that speaks of my love,
 Decorated in rhymes through and through
 With verses reaching Heaven above…
 
 Let me sing to you the music,
 The only song that my heart sings,
 Whose notes will fly you to the peak,
 Soaring high with me on love’s wings.

 Let me put my hands on your face,
 As we melt in each other’s eyes,
 The magic of love we can trace,
 And the smiling moon starts to rise.

 Let me feel your touching fingers,
 Fondling the long strands of my hair,
 Gliding and unsure where to linger,
 And excite me with your steady stare.

 Let me seal your lips with my kiss,
 Feel the warmth as it brings desire,
 Let’s set ourselves in flaming bliss,
 ‘Til we melt and lost with the fire.

 Let me give you a hug that tight,
 May you hear murmurs in my heart
 Ever wishing the moon stays bright,
 Never wanting the night to part.

 Come, let’s make the night beautiful,
 Come and take me into your arms,
 Let’s enjoy the moon while it’s full,
 And praise the night ‘til dawn alarms.