Nung Ika Ing Mawala


Lorung Malabit
Silaba 12 Taladtad 6
Sesura 6/6 Estropa 8

*
Akua ra man muti ring kuyug a awak,
maging paldas ya man ing kule ring tagak,
mangalawang la man ding yari king pilak,
at maging makintab ing kulul ning burak
ing pusu ku e ya magbayu pamalak,
ika mung luguran nang tune’t mataktak.

**
Ing bulak mangasyas man anti king batu,
lambut man ing bakal a mengaring putu,
Ding apalya magi laman sari yumu,
at mait naman ing sabo da ring atbu
manaya ku murin king pamagbalik mu,
uling yan mu kabud ing paninapan ku.

***
Ing aldo lumbug ya man karin aslagan,
anggiang sumaka ya king dane albugan
o nung sumlag ya king benging kapitangan
at ing bulan naman neng balang kaugtuan
king pamanaya e ku mangainipan
uling manuala kung datang ka rin misan.

****
Anggiang maging sitsit nia kutug ing duldul,
at balamu akbung ing anging lalabul
nung king disyertu man ing danum sumibul,
at ing dayatmalat malangi niang kulkul
manalig ka banding e ku damdam sulsul,
a keka king dimla ati’nang kakaul.

*****
Ding ayup manganak laman tambing sisî,
anggiang ding mangebun king pugad ding babî,
ing patak ning uran magi man mapalî,
at mangaring yelu king dimla ing apî,
e lungub king isip ku anggiang sagulî,
a kening sale ta ing e na ka mulî.

******
Ding ayup anggiang e no tuklu king sanga,
at ding asan ila na retang sasampa,
ambus milako la bau ring sampaga,
at ing dinat tamu maging mabanglu na,
king likuan mung sumpa magsandal ku sinta,
uling ding amanu mu kaku batas la.

*******
Milibe man lugal ing banua at gabun,
at king biga namu mumugun ing ayun
marap man dagat ing pulayi ning alun,
at ing bukas iya na ing maging napun,,
e ku mako keni king kabang panaun,
anggang king sale ta datang nakang mapun.

********
Uling sinta kaku nung ika’ng mawalậ,
milako ngan silbi kanaku ing sablậ,
karing kakung labi tumabug ing tulậ,
e tuknang gumulis king lupa ku ing luậ
king kabud kumung bie mamun na ing salậ.
at ing yatu e ne dumurut bitasậ.


Rodel E. Gozum
30 Septiembre 2014
Munoz, Quezon City






This entry was posted in PL Rodel E. Gozum, Poeta Laureadu. Bookmark the permalink.

2 Responses to Nung Ika Ing Mawala

  1. Dakal pung salamat PL Anac Arenas king pamapaskil yu king maluka kung kawatasan king bilungan a ini. Sana pu aburi de ring mamasa ing poesia ku ampo pa reng sablang kawatasan a makapaskil keni. Pasibayu pu, dakal a salamat.

  2. AnacArenas says:

    Kanaku pu ing dangalan, Ka Rodel. Panenayan ta la pu reng tutuki yung kawatasan para kareng kekatamung kabalen.

Leave a Reply to AnacArenas Cancel reply

Your email address will not be published. Required fields are marked *