ADUANG PATRONESA
APAT A POEMA PARA KANG INDU
ALDOLDO KUNG LUMBE AT TULA
BABAGWA – TAU
ING BANAL A LUPA
ING BENGI
DATANG KU… KING IKAPURI NANG INDUNG MARIA
INDU, SALUAN ME ING POEMA KU!
KALYE SIETE
KRISIS
PABUSTAN MU
PAMAMUGUE
ING PAMANA
SAKE BUS
SAMPAGA PARA KANG EMERME
SILIM
TATANG
TUNE KAKALUGURAN
ULING LUGUD MU KU
https://capampangan.whereishome.info/mangapampangantamu/MangapampanganTamu-Blg25.pdf
Mangapampangan Tamu Blg25 -dumingguan a serye, papaluwal balang aldo Miyerkulis. Dakal a salamat pu keng pamamasa at pami-dake kareng kabalen.🙏😘
.
Baryu San Jose:
Kalimang Dumingu ning pamamie kasuwelu kareng memaryu ning Baryu San Jose. Lima lang prisintadung kandidatu reng pipamilinan da reng sablang miembru nung ninung metung a mirinan tula, kapamilatan ning pamagbotu.
.
Istoria:
Pagmasakit ne at tataguyud ing Amanung Sisuan, antimong amanung pepasusu ra keya manibat keng panga-bingut, ding kaluguran a pengaring Irene Mercado Magtuloy & Faustino Luna Magtuloy. Kapampangan ya ing amanung daragus kareng keyang uyat, pamana na nitang metung kareng Asias/Paindu ning Amanung Tibuan, Don Monico R. Mercado…
.
Kumidya:
Panalben neng mangatmung “kahun balik-bayan” Bitoy y Ima na. Apansin nang Bitoy, ating metung a sandalyas, ala yang kaparis.
.
Babasan Pang-Anak:
Misan a kaleldo keng suluk ning jardin carin king pangulu, ilug makasiping
dening sising bibi miyapsa la carin.
.
Verso Para Libertad:
Dacal lang bague misasapuac ibat qng casaquitan.
Calupa da mo ring panabilin ning ibpang mangucu at mangusang,
cabang susugatan ne qng sarul ing salu ning asican.
Neng Almario “amor” C. de Jesus-
Sasabyan da reng aliua, panga-anac mibabalic,
potang dasan mu ing edad, a matua na cang minuban,
datang pala ing pinandit, ing panugali magbalic,
pati aske at pangimut, nitang kecang cayanacan.
Nung sacaling datang na’y ta, pantunan ke ing babae,
a babaing Capampangan, laman ning cacung tagimpan,
ing asal at panugali, marangal at masalese,
magalang at malugud ya, macayama yang tumiman.
Lumacad cu king marangle, ding syudad cacu lang simen,
balang suluc at tucnangan, e cu tucnang maglalawe,
Manakit cung Capampangan, a diwata na ning balen,
a dapat mung caya iduang, gintung capalsintang lante.
Nung tutu ping mibabalic, ytang kecang cayanacan
pangadi cu king Miglalang, yca sanang maging sangcan.
acdj – Ing Agila Ning Apalit
Artesia Ca USA, Nov. 7th
Neng Almario “amor” C. de Jesus-
Careng calupa cung linaut mindaywan
at malagad tutung dadalo king tibuan
Ing kecang Amanung ibat king beitan
lalu yang yuyumu e me acalinguan.
Ding balang pinandit, bibilangan mula
mamyalung king isip, ing bie king minuna
pusung gigiyagis, king pamanalala
kecang paninapan, miuli ca sana.
Muli cu balen cu, labuad Capampangan
Sale na ning sinta, ibat camumulan
Carin cu manaya, king kecang candungan
Ing tauli cung singap, keca ke pupusan.
At cabang ati cu, king lipat ning dagat
Amanu sesen ke a mitmung pagsalbat.
Neng Orly Manalo Dizon
1
Dacal lang babai, cacung akilala
Dapot ing laue cu, macayaliua ca;
E mu ketang lagu, acakit ding mata
Nune king ugaling, sasalamin keca.
2
Muna tang pamikit, a anting pitabnû
E lubus auari, nang linub king salû;
Ing bigla cung dimdam, cablas na king pusû
A nung nanung sangcan, iti e cu balû.
3
Micacunu cu man, linapit cu keca
Agiang e marapat, ‘tang akilala ca;
Uli na nita nang, itsura cang diosa
Abe ding angeles, a kinuldas banua.
4
Manibat canita, canacu mibubû
A ausan dang lugud, king salu tinubû;
Lugud yang dalise, tinarac ning paslû
Nang Aring Cupidu, kening cacung pusû.
5
Dalise cung nasa, king pusu manibat
Linapit cu keca, at dinuang ding gamat;
At binye mung sucli, mayumung pakibat
Malugud mung tinggap, palad ta milapat.
6
Mabilis lang meco, lacad ding panaun
Aldo, bulan, banua, cacu meki-agum;
Busilac cung sinta, lalu pang linabung
King angga na ketang, pusu ta migmetung.
7
O casampat pala, itang atin sinta
Ing pakiramdam mu, ing atiu ca banua;
At cauangis uari, metung a aguila
King babo ning biga, lilibad, magbiba.
8
Iniang marap ta na, king altar ning Ginu
Para miyaptas la, pusu mu’t pusu cu;
Lugud cung masapsap, iti keca ya mu
ICA MU ING SINTA, at e cu magbayu.
DIZLAG FARM, REST HOUSE & SWIMMING POOL;
Nov 2, 2022.
neng Orly Manalo Dizon
1
Ing’gang matatangal binang macapinac
Na niting Amanu king keang pagsalbat,
Ing pangisnaua na malalam na’ng saldac
King pangasunde na maibug neng mibatbat.
2
Obat miras kea ing calmang macanian?
King mismung labuad na de iting puersahan,
Ipapalbug pilit ban lubus miliuan
E na masambitla layun macalinguan.
3
E macalingad ding miayaliuang bage
King Salitang Mana babie tagulele,
Dacal nong pamilya ding mitutubale
Kilub ning aldoldo e da ne’ti yapse.
4
Antimurin itang meracal nong binâ
Meinganyung tucnang at lubus micaldâ,
King labuad nang lugal deti migdatilâ
Uaring lasun la ding bitbit dang salitâ.
5
Ua man nung e ta la alisyan ing alben
Ding programang tv a e dapat tunggen,
Mananu na sanang e ta ya paburen
Ing Amanung Sabi mangailangan sesen.
6
Caring cayanacan pasa ta carela
Metung a culturang tutung mauĺaga,
PangaCapampangan iya itang marca
King angga na potang king aun mitomba.
7
Lacan cabalenan a dapat magmandu
King pamanatili ning mal tang Amanu,
Sulung ya ing Sabi comersyu’t publicu
Iyang dapat denan oras at sicasu.
8
Ngeni na ing oras at sicasung aduan
Na niting Amanu king keang cabilian,
Gumunyat ta ngan sa kecata yang biayan
MAGUINGALUNG BILI ning Amanung Sisuan.
DIZLAG FARM, REST HOUSE & SWIMMING POOL;
Nov 5, 2022.
neng ORLY MANALO DIZON
Orthografiang: C-K (ca,ke,ki,co, cu);
Sucad: labingadua (6/6);
April 22, 2018
1
Cacung atingiran king bandang parobâ
Pangabalangcas na ning metung a cudtâ
Sangcap nang amanu lubid lang salitâ
Ampong sinucung king cundiman ning diuâ.
2
Picudtang king yubu E CU LA ISTILU
Uling masalpac la king lasa cu’t tonu,
Apin e co giyam ding lira na’t bersu
Lipat ning catutuan ing mamola ca mu.
3
Ninung maniuala managtal cang batuin
Tsaca pakuintas king sintang atna hinhin,
Cacu malambat nong pinaid ning angin
Uling king tutung bie e la sasalamin.
4
Atin pa ita nang magpaitas ya babo
Lampasan ne’ng biga king pamaniulapo,
Caring ing pluma na gulis ne’t ipalto
Lirang magpanyud king aslag na ning aldo.
5
O casampat na pin sunis king balugbug
Inia itang pusu melacas ya cabug,
Uling itang sinta bisa nang tumabug
Uanis ne ning aldo a ume nang lumbug.
6
Ing metung a uatas e mu makikiapus
Sake’t magpanyud king lacas na ning agus,
Dapat mica-atin yang istilung lubus
Yang marca ding cudta a keang tatacmus.
7
King nanu man bage atin lang tuntunan
A dapat lang denan masusing cabaluan,
Pero e na cabud kecang yang burianan
Uling gamit ne ning uatas mung irugan.
8
Ing tutu na niti bie ta babo yatu
E tamu asabi ini ya ing ustu,
Uling itang napun ala ne’t migducmu
King lungo ning ucul da ding balang tau.
DIZLAG FARM, REST HOUSE & SWIMMING POOL;
Oct 31, 2022.
Neng Almario “amor” C. de Jesus
Neng lulub ca ketang Ardin, dacal la retang Sampaga,
Anya naman ing madalas, maging salawahan mata,
E mu balu istung misan, sanu ing kecang pilinan,
Agtalan me ketang tangke, caring labi mu panuman.
Macanyan la reng poeta, lalawe lang tune legwan,
Uling itang inspirasyun, cailangan ning caisipan,
Detang sampagang mabanglu, macabye lang capasnawan,
Gad cang macalalang poesya, king dalaga kecang yampang.
Neng lalun ke ing litratu, larawan na nitang legwan,
Meging anac ya ing puso, meging mayumu cu timan,
Panayan cu ing pinandit ing ackit da ca sang misan,
King Ardin da reng dalaga, tutu racang pangawilian.
Anya sana cacung mutya, damdaman me at tingiran
Ining malucang poeta, alipan ning mal mung legwan,
E magbayu panlalawe, ngeni at capilan pa man,
Cabang atin cung inaua, icang dili ing luguran.
acdj
Neng Almario “amor” C. de Jesus-
1)
Sasabian da mitacda na, maging bie mu keting Yatu
Uling iti macagulis o mikintal keng Palad Mu
Nanan mu man pagaralan, maski biasa ca pang tau
Iti e mu atalastas, uling metung yang misteryu.
2)
Itang gulis king Palad mu, anting Mapang macasulat
Keng dalan a tutuntunan, keng lacad mung misnang bayat
Itang sablang miliari na, careng mata mu mimulat
Yang calmang mitutuc keca, agyang nanu ing pagsalbat.
3)
Dapot agiang macanian man, kecang paca-talintingan
Tagle ning taung lelangan, ing timauang caisipan,
Balu mu itang marauac, ustu at mayap a gawan
Ing banal a cautusan, yang pagpilitan mung tucyan.
4)
Ing mabibie keting yatu, metung ca waring maglacbe
Dacal itang dalanan mung, a capagsubucan keng bie
Agyang sabla mitacda na, nung gawa cang masalese
Yang meging Gulis Ning Palad, a pagmaragul mung tune.
5)
Caibat ning panga-bait mu, camatayan ca paintungul
Tacdang Horas e mu balu, nung capilan itang atul
Mengari keng pating-apun, ing dalumdum yang cumaul
Keng catawan mung miglacbe, mitambunan ya keng culcul.
6)
Lacuan me ing yatung iti, aliwang carinan munta,
At lawen de itang libru, nung dapat a matanggap ca,
Ketang Gulis ning Palad mu, metupad o e megewa,
At ing atul miras keca, keta ca lalam o gloria.!
7)
Nung kecang pacaisipan, Itang Gulis na Ning Palad
Yang mamantabe keng bie mu, bacang miras at misadsad
At maging macabaldugan, pamanucnang keting labuad
8)
E ca cabud anting singo, o ulad a cusad-cusad.
Tau cang palpicasala, dapat tuki ketang Utus
Tumibe ca salpantaya, bacang lubus a micabus
Puso at caisipan mu, luguran me ing Mengabus
Pati na para mung tau, e mu tuturing Busabus.
acdj – google blog – Ing Agila Ning Apalit.
Artesia, Ca, USA Oct. 24th
