Pugue cang mam YOL

Bayu ke pu yapse ining cawatasan
king malagung musa niting catatagan
sablang pesitagun cacung pupugayan
muna cang mam LULU, bisitang pandangal.

Metung yang tanaman, casimparang Nara
matanggal la ipan, detang kumet caya
masias ya talakad,alang makatomba
dapot ing pusu na, ka-anti yang alpombra

Mayap yang memalen ampon talaturû
masalpitic ya at busilac a pusû
laus king cayang lub itang pamanyuyû
caring sosopa’nang anac catutubû

Nung king pamacyabe itang pisasabian
pamangan o pera ‘ la yang cabastusan
nung iyang abe mu, mabsi ya ing atian
inya daca’la ring cayang caluguran.

Ing apuna cu mu, ustung abe mi ya
King pamag “shopping” mi o nu ke man munta
lalangi ke matang manenaya caya
Uling cabaragbag itang pinyali na

Uling malaut ing panibatan niti
Ali na asagkan,neng misan mitawli
nung alas dyes sana itang cayang clasi
acua neman miras bayu alas onsi

Ing masanting caya marimla ya gamat
nanu mang tanam na tutubu la uyat
inia pati retang ugaling marucat
melabung a isip king gawang masampat

Metung caring asias ning kecatang bale
ica itang bubuat ampon magpatibe
anti keng mepacling, metung karing takde
nya king paglaco mu,pusu mi melumbe

Lagyung YOLLY GABRIEL, e ne macalinguan
caniang dayat na ning, alcusan ning beluan
ing sacripisyu na memung
ang cayapan
a tenam na caring isip ding kerac’lan

Ngening miras na ca king pamagretiru
kening Dau hayskul a piturwanan mu
e ca mangalingwan e ca sa magbayu
abuban mu kami, king grasyang acua mu

IBM 7/21/17

About Kate Lapuz

I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
This entry was posted in PL Kate Lapuz, Poeta Laureadu. Bookmark the permalink.

2 Responses to Pugue cang mam YOL

  1. Maria Sinicuan says:

    Madam PL Kate Lapuz,

    Komusta pu, Madam?

    Kalagu na pu ning kekayung puge poesia.

    Pasalamat ku pu keting Capampangan a katatagan ampo keng kumbira nang Koyang Anac Ning Arenas at mikit-ikit tamung pasibayu.

    Matula ku pu at atilu naman keti ri PL Vhelle Garcia at PL Orly Dizon. Komusta murin pu.

    Mayap a kaorasan pu, pati na kareng kekatamung kabalen a talabasa.

    Angga pa pu keni,
    Maria.

Leave a Reply to Maria Sinicuan Cancel reply

Your email address will not be published. Required fields are marked *