Ing adboskasya na kanu, paglualu ne’t simpanan
king pusu at kayang diwa, ing amanung Kapampangan
ing bage nang pagmairing, makananu kung panwalan
nung ding susulat na niti, a kayang pagparangalan
e no bandi ning balen a, salita ra retang daywan
a lalaso king pundasyun, ning kekatang sabing menan
Nung balid ya ing dila na , king kayang pamanialitã
king amanung sasabia’nang, lugura’na kabangkabâ
at nung ding meging suli nang, menibat king kayang dayâ
king sabi ta’ng katutubu, e la mebiasang bitasâ
at mas sinimpan do pa ring, salita ra ring banyagâ
ing pamana na ning lahi, kaya, e ke panibalâ
Uling ngana ning kasebian, bayu tamu manamuyut
kalinisan, muna ta pa, karing sarili tang bakud
nung king kayang mismung sular, e bitasa mang kinimut
ban lingapan ing amanu, ta nu naku ataklayud?
king pigampang sasabia’nang, maluat na nang dadagisut
a imbis king dagul ya sa, lakwas ya mung magugutut
Nung ding librung tingka na at, malalaguang pepalimbag
king amanung Kapampangan, e la ustu pangalikas
king baul ning kawatasan, da ring kudtang mangasampat
ala lang kawang ban karin, miyabe la at matangkap
uling den ding mangilasun, karing mayubung paniulat
ding salukuyang poeta at malapupuring watas
Nung ing kayang kapagnasan, king ba ya mung managumpe
king imbut nang mibulalag, tanggap kapurian at puge
at nung ding kudta ring watas, a sisinup na ‘t darake
gewa na la mung puhunan, king pamanintun pagkabie
ing makaniang klasing tau, e ya tutung makirame
ban itikdo ing kultura at amanung mipapase
Nung yan mang pangatau na, e ne balu pang bitasan
nung ninu ya karing adwang, ibat king mispak a kuayan
den pa mo kayang kataya, a nasa nang ipapakan
karing dimur da pang isip, ding kekatang kayanakan
samantalang ding amanu, a aplit nang kukulkulan
menibat la karing libru, ring banyagang kawatasan
Nung manusig ya king mali, da ring kayang disipulus
karing pamangamanu at panilulat dang bukut bukut
ing dangalan ding makudtang, king amanu mapanirug
mesalalua pasari na ning dapat nang e makatud
ing damla rang sadiasadia, miras na king mataluktuk
ditak ditak mayayagas, at king aun mababaldug
Pasiknangan ne’ing amanu, yan ing bata nang pangarâ
dapot metung ya king sangkan, inia lakuas yang miminâ
pablasang ding salita a, apse na ning kayang dilâ
e la purung Capampangan, miki-salat lang aliwâ
nung makanian, itang kayang adbokasyang paningayâ
e tutu at nasa namung tangalan de retang maldâ
Vhelle V. Garcia
July 5, 2020
San Simon, Pampanga