Makuyad A Poesya
Irvin Harvey E. Rivera
Siuala Ning Maliwalu/Anak Ning Baculud
May 16, 2019
Misan a kabengyan kabud ku mipakde
King pamanudtud ku king masyas a lande
Inyang mimasmas ku, ayisip ku ing bie,
Ing bayat na niting pisanan king takde.
Kanyan ku aisip ing bie na ning tau
E me atasa nung nanung pamagbayu
Maging ing sikanan mirinan yang sepu
Alang kapilisyan tumwa at tumwa ku.
Magi ing mapinu’t malare kung balat
Kumupas mu nama’t gumaspang king salat
Magi ring uyat ku karing ka’kung gamat
Kumaimpis king ketwan saka no mapanat.
Kanyan ku na akit anti mong lelangan
Pamagmalapilak na ning bwak king ketwan
Nung ining alkus ku’t binang katikmusan,
Kayabeng kumupas, ikera ning keynan.
Kanita ku na ya, kutang king sarilia
Nung ing pamagbayu kapilan malyari?
Ding sadya kung abe king karinang iti
Lakwan da kung misan a magdilidili?
Nanan mu ing legwan nung keta king aun
Misimpang malalam, mikutkut king gabun?
Na’n mu yang tikmusan, e wari malaun
Tumwa ka’t manuban, kalingwan ning napun?
Ing pangamate ku, makalimbatawan
Ding mayap a dapat i la nang malakwan
Marimla kung aun e ra ne puntalan
Bukud panalala, yang ka’kung depatan.
O, inya sa’ kabang ding adwa kung bitis
Malale ku la pang apipildispildis
Kabang ing keynan ku e pa labislabis
Dinat ku king lupa ume sa’ng mapulis.