Budning Watas Ning Amanu

( Poema Para Cang Painturung Poeta
Laureado ( PPL ) Tony Mallari Medina )
nang Jose Roman Reyes Laquian PLI
8:30 PM Lunes 31 Julio 2017

Babo na nitang alapap , / matas maiguit caring biga , /
Lagpus queang atmosfera / ya’ing tronu qng catlung banua /
A magsilbing lucluca’Na / ning POETA ding Poeta , /
Nung nu macapatulug la / ding Poeta ‘niang Minuna ! /
Magpuri la ding Poeta / Queang POETANG MACAMAL , /
Pas’uala la ding trompeta / qng Tabernaculong Banal ; /
Magui man ding alpa’t lira , / ding papuri da papalual /
Cambe ding Pasasalamat / qng Bayung Datang a Caual . . . /

Uling maragling inaus / ne ning sumangid a yatu /
Iyang Budni at Uwaran / Anac ning Indung Amanu ; /
” ‘me ca queni , ” ngana quea , / ” Budning Poeta Liricu ,”
” ‘mequeni ca’t mangudta ca / qng Amanung Masna Yumu .” /

Que libutad ning Consejo / da ring Daraquilang Watas , /
Budning Watas Capampangan / ning Panaun a Milabas , /
Maqui timan caring labi , / tinalacad yang maticas /
Ing Poetang bayung datang , / midinan Mayap a Oras . . . /

Tony Mallari Medina , / Budning Watas Ning Amanu , /
Bista man ing catawan mung / gabun metudtud queng yatu , /
Dapot ing Taganang Ica , / atiu qng arap ning GUINU , /
Abe ding Matuang Poeta / mamacudta’t mamagbersu . /

Madegulan Pupugayan / at Pasalamatan daca !
Pauli mu , mipacde la / ding Bayung Suling Poeta /
Caring Guintung Cawatasan / malugud mung pepamana , /
Ding Cayapan papasiag ra , / qng Catuliran tuquian da ! /

Calupa mu , mangilabas / la ding Watas Capampangan /
Queti sulip , at ing Lungan / da ing Labuad Qng Catasan ; /
Cuana’Ne man queti yatu / ing Caual Nang Madangalan , /
Dacal pang Caual Nang Watas / ding itas Na ning Miglalang ! /

This entry was posted in PL Jose Roman Reyes Laquian, Poeta Laureadu. Bookmark the permalink.

Leave a Reply

Your email address will not be published. Required fields are marked *