Sukad: 24 cesura 8/8/8
Iting daing Kapampangan kekatamu yang paglualu maski pa kaninung dayuan
Uling karing balang balen atin lang likuan a marka ding kekata’ng pipumpunan
A sukat ta’ng pagmaragul, at apusan da ring suli karing binye dang dangalan
king kultura ning prubinsia , at king mabilug a bangsa , angga ngeni tatalangan.
I Aurelio Tolentino na ning Sto.Cristo Guagua bayani ya at poeta
A abe nang Bonifacio keta king Kawit Cavite, memirat karing sedula
ban kanita apakit ra ing ali la kukumpormi, karing kastilang minyobra
daralpak king pangatau da ring balang Pilipinu, matapang lang mekigera.
I Juan Crisostomo Sotto a sinulat king “Alang Dios” iyang tatang ning Crissotan
nung nukarin ding poeta iyapse da ing matulid king paksang pilalabanan
itang budning lakandiwa ing manimbang karing puntus manawat at mamilatan
iya mu ring maglibutad ban keta e la mikaras ding poetang matenakan.
Kang Diosdado Macapagal ,bayit king balen ning Lubao ninung e makakilala?
A meging talapamuntuk keti “Perlas ning Silangan” i Garcia ing tikian na
Karing sapni ‘ting memuli ” nung nanu ya’yng pun ‘yang bunga” ngara pin detang makatua
ing metung karing babayi i Arroyo Macapagal Macaraeg Maria Gloria.
Inya ikong bayung suli at sulul a mibabayit, ali yu pikakarine !
Ing ika KAPAMPANGAN KA atin kang daing marangal, king uyat yu manalete
Mambag king kasalesayan ning kekatang Indung Balen tanam kong lugud a tune
Sambitlan ye ing amanu a sisuan kang ima tamu, ban e malumpawi’t mate.
IBM 2/26/18 4:16 ning abak
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
