bungang diua neng ORLY MANALO DIZON; Ortograpiyang: C-K; Sucad: 6/6; May 7, 2015.
1
Dintang ca king bie cu’t / matulang pisucub
Ing bunga ning sinta / at yumu ning lugud,
Nanu man penandit / kening busal ning lub
Ica mu’t bucud ca’t / metung ca mu cabud.
2
Caba ding panaun / ilang magpatutû
Bie ta keti sulip / ica ing casuyû,
Ing miuale keca / o caya midayû
Panintunan co ding / lingap mu’t pangacû.
3
E alisyan itang / ding anggang mabibie
Atin lang angganan / mapupupus la bie,
At nung sacali man / muna CANG/cung maglacbe
King Balayan ning Dios / miuman catang miabe.
4
Potang ausan na cu / ning Ginu tang Ibpâ
Ing acayabe ca / yang cacu mie tulâ,
PANINTUNAN MU CU / cacu mu pauagâ
Lugud mung dalise / a yang kecang sumpâ.
5
Ala ca siping cu / ing culul ning babo
Banua yang malulam / ing cule na blanco,
Kislap da ding batuin/ e deti misiro
At maguing ing oras / mabagal yang sigpo.
6
Nu ca ta man miras / cacung cayaduanan
Ing parating miyabe / yang cacung pagdugan,
Lugud a migsale / king pusu’t catauan
E iti mauala / maguing king babo man.
7
King Balayan ning Dios / ing cacung pangadî
Ica ampo acu / mikit sang piraglî,
Agiang dacal cami / mamucud cung tangî
Saslag cu’t kikildap / a culul maputî.
8
Iti yang paninap / mibubu king isip
Uling macuyad mu / bie ta keti sulip,
Burianan na ning Dios / ibasbas Na’t lakip
Istorya ta king bie / e la sa mituclip.
DIZLAG FARM