September 20, 2015
Ining maliswas kung diwa pagnasa’na ing sulapo
Kanitang matas a banwa bayang mukyat magpatilo
Yang buri nang pakyalungan itang bigang gato-gato
Sasaken na itang angin king keyang pamagparayo,
Potang miras ne katasan king kababan na abatyo
Saingsing da ring kalulung ketang danup gugulasyo
Ali, kaku yang agwantan, king panukyat na king babo
Kanita e na tangalan kasakitan a maglapo.
Ing pusad na nitang dagat pagnasan ne sang sisiran
Ing lalam na ban kanita taruka’ ne’t pakirasan
Makikit ya ketang ari ning malwalas a danuman
Ing salita da ring asan yang buri nang pakirasan
Kanita pakibaluan na ing karelang daramdaman
King dinamitang gamit da detang aliwang manasan,
Ha! Ali! bawal ku nyamu … pota kaya pang inuman
Itang lasun ding pabrikang karing ilug papamisan.
Detang ayup karing gubat buri nalang akakyalung
Luksu-luksu at lilipat karing maragul a dutung
Nung dasan no ning aliswas karing malapad nang bulung
Kauran man at kaleldo karin la rin sasalilung,
Ngeni.. mewala ing tula king karelang pamamyalung
Ya nang kekang daramdaman ing tangis da ampon dalung,
Ali, inya babawal ke pota e makapagkanlung
Ustung pemandagsa dalang “bulldozer” ing ya susubung.
Detang mangalyap a usa, buri nalang pakyabayan
Ampon detang babing dikut a balita king bengisan,
Ngaring dakal a sasabi deti ala nalu naman
Gilutan de itang bunduk a gewa ra nang minahan,
Bakit? Nanung malilyari ?! karing batas dang lelangan
Uling e ro ipairal mesira’ing kapaligiran.
Inya ining kakung diwa, matudtud nya mung manyaman
ban e midame king bagsik!… a ablas ning kalikasan.
BABAING MATUN 9/20/15
