Ing “talbus” kamuti ausan dya naman “langguk”. Sabi da reng makatuwa masustansiya ya kanu. Makasanting kanu keng daya.
I Ma ku atin yang tanam a kamuti keng gulut. Istung dakal ne bulung payagtal no kaku ba nong ilaga saka mi la ulam. Tiltil mi lang aslam maki gisang baguk. Manyaman lang pangternu keng pritung galungung o kaya dalagambukid.
Patse aldo suweldu sasali yang bangus i Tatang ku bayu ya muli. I Ma ku kanita sigang no reng bangus keng biyabas o kaya keng kamyas saka na pamulug ing langguk. Makanyaman keng sabo ing langguk uling ing bagya nang salpak makiyayo keng lasa ning biyabas o kaya ning kamyas. Saka ing kayang agta palabugan na kulor ing sabo at makaragdag keng nyaman nang lasa.
Inyang misan a aldo suweldu e mekasaling ulam i Tatang ku. Apasambut nala reng suweldu na keng sabung. Kayapan namu malabung ing langguk keng gulut ming bale. Linaga nang Ma ku ing kingwa kung langguk saka mi tiniltil aslam a maki gisang baguk. Milabas kami murin agyang e kami bubulad kabang mamangan.
Maragul ya pala saup ing ating langguk keng gulut bale keng kabyayan tamu.