Deng kulbasa masustansiya lang gule. Uling dilo la kulor a laman, masanting lang bitamina para kareng mata. Atin la naman kanung calcium, potassium ampong magnesium a makapagpakalma keng pusu at makababa keng prisyun.
Bilang gule, magsilbi yang lutung peka-ulam antimong gisang kulbasa atin sabo. Magsilbi ya naman panabe keng pakbit. Deng aliwa, diderang de keng babo ning parilyang atin baya kalupa da mo reng kamuti. Mayumu-yumu la naman lasa. Alus apangan ya ngan ing kulbasa – balat, laman, butul.
Gagawan ta ya munaman kapangan ing kulbasa. Kaibat nang pepatua ban lalu yang singkad yumu, talipan ya at gadgaran deng antimong ubi, saka ya lutu para maging Biko.
Inyang magaral ku pang elementarya, istung mababa ka ikua keng pamagsulit, sabyan da “mengulubasa ka”. Sabi na namang Apu ku, ken kanung upisina ra kanita, dirinan dong “Kulbasa” award deng e makatupad masalese keng karelang obra. Ummm, bakit pu kaya?