O masanting a paninap, e na ca pa sa dadalo
kening cacung pamanudtud, king diwa cung balingongo
uling e ca mipaltutu, acua namung maglimpaso
ning pusu cung king pagbitkil, at king lugma magtampiso
Pablasang neng maninap cu, king canacung pangaimbing
nung cacu mung apalyari, e cu pa sa migigising
pablasang acu ing bida, ampo ing pecamagaling
alang bage e cu icua, a carin cu pigmairing
Carin agyu cung sulapo, at dasan ing mataluctuc
o patagan at ipante, kening gabun detang bunduc
magsilbi cung manucnangan, king calalama’ning ilug
at maging ari ring asang, acakit cung mamag-alpuc
Maging itang dayat malat, agyu keng gisanan danum
at ing api na ning aldo, apatda ke ban dalumdum
ayagut ke itang banwa, at apauma king gabun
antimurin detang batwin, apamalas kong tiradul
Sablang bage impusibli, pasari na ning paninap
arapat cu ban e tacman, ing cabiguang mipnu caplas
ing babaing pilsintan cu, uling e ke meging palad
ing paninap a masanting , meging bangungut yang ganap
Vhelle V. Garcia
Agustu 3, 2015
Abu Dhabi