diuang capanausan neng Orly Manalo Dizon,
baryu Diladila, Sta. Rita, Pamp.; sucad: 8/8;
07/11/2018.
1
Itang misan atmung lagad / meralas yang gugunaman
Ulina ning cacung angad / e pa lubus miyatbanan,
E cu ne man apatacad / ing datang yang capilisyan
O paburen ketang lacad / na ning panaun pang datang.
2
Malambat na iting bina / mayayakit ya ing tutû
Detang taung atin pera / ilang pane mipainturû,
Cambe na ning impluensa / ilang bisang maguing paindû
Puersahan deng buring tomba / ing pun ning bansa ta rugû.
3
Ding aliua mayayakit / ketang aske da’t pagsalbat
Ampo caretang dusuldit / dang amanung gagcas, aslat,
Da ding dilang magcapilit / mamanyira’t mamanagcat
Gamit at casambulait / da ding diuang mapaniumbat.
4
Dacal la ring makiburî / ketang bage pamagbayu
Ding mapilan a mag-arî / ing buri da complicadu,
Ala lang bitasang pakî / ‘giang mayap ya’ng manimunu
Itang nasa rang piraglî / ilang lucluc ketang tronu.
5
Inia naman liliuan yang / ustu ining cacung imbut
E co no deti picabiang / mialiuang ugaling mangalput,
A tutung sinasa na lang / lalto, akit king palibut
E la basta aden timbang / ketang gaua da’t pangimut.
6
Lauen la ring taung mayap / ing gaua da ‘tang cayapan
Atin lang lunus at lingap / caring taung mangailangan,
Dapot detang mapanasdap / ing sicasu da’t daraptan,
Itang ugaling e mayap / a bage capamuraitan.
7
E patugut dang cocontran / da ding maroc elementu
Ding mangayap cautusan / da ding batas a pantau,
Inia king ban mirikilan / ya ing tune pamagbayu
Gumunyat ta sa’t supportan / ding pa-iral ning gobiernu.
8
O nucarin pa magbanda / nune ketang masalese
Mesubuc nong alang duda / ing binie mu tagulele,
Inia naman ngeni sana / lisya na la mu’t maglele
King ban sulung ding programa / A MUNIE CASNAUAN KING BIE.
Kingdom of Bahrain.
Cabaldugan amanu agpang king panga-gamit da kening Cauatasan:
- apatacad = apayubaya
- paindu = sandalan pamuntuc
- casambulait = cacutsaba
- complicadu = magulu, masakit pakibalangasan
- liliuan = panintunan
- mapanasdap = ligid-ligid manintun abictima
- mirikilan = mabitasa o mayakit
- tagulele = capanagitan a e mipakibatan.