Babaing Matun
April 19, 2013 …8:10am
Itamu bulung tamu mu king metung tanaman
E pareu pangatubu pareu pibatan
Datang ing panaun a manabu ta king gabun
Inya kakaluguran eka rugu magmalun
Mapalyaring ngeni mapali king kekang pwestu
Isipan mung karing aliwa naman babagyu
At datang ing aldo maagtal ta king tanaman
nung nukarin ing buung bie karin menuknangan
Eka tatakut arapan bukas a daratang
Manantabe ya lagi ing kekatamung TATANG
Agyang ding ayup a pipit karing tanaman twit twit
Mako la king sale da a nung nula mipusit
Sulapo la’t batyon namu ing sale pibatan
Uling aliwa nalang ayup karin manuknangan
Ing angang bage keti yatu atin kapupusan
Etamu pin balu nung kapilan ta karasan
Inya ing kekatang katawan, pusu at, isip
Isadya tamu bayu ta mako keti sulip…
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)