Nanu ya’ing kabiasnan? pagparangalan ya? Ali ya kapatad!
E ya paningaya , bustan mo reng tau, ilang keka sukad
Itang tune biasa, e matua sapuk at masias balingadngad
Karing kabadbaran, lalaban yang patas, e pakli talakad
Detang amanu na, pinu la’t masampat, e la babaligtad
Itang tune biasa ,karing lisyang dapat,e ya manamuyut
Malualas ya isip, itang panwala na, e makabaluktut
Karing kaligiran, e ya benggatibu’t lalaban pagulut.
Panuyatan na pa, ing anggang katutuan, at kaybat ya kimut
E ya maglaparis, ban kayang kaburian, akua nang ayabut
Ing matas a belwan, e magmamayangin o magsasamais
E ya sasalingku, lalagpas, tatalpak ketang markang gulis
Duruku ne’ing buntuk karing makamatas e ya tatalilis
Karetang tuntunan a makamatulid ampon makasunis
Iya ing mamande ,manulid, manayis karetang pipildis
Itang tutung biasa, tau yang magalang ampon marispetu
Karing kayang disan, king metung aguman e ya paguinu
Karing sablang bage, mapanupaya ya at e mareklamu
King gawang masampat, iyang manimuna, ampon ing maglualu
Ban detang kayagum bina lang tumula’t lumbat ing pamisulu
Sinulat neng: #IBM 2/1/2019
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
