Nung Aldoldo Pasku


Lorung Malabit
Silaba 12 Sesura 6/6
Taladtad 4 Estropa 8
*
Ustung mampit ne ing aldo na ning Pasku,
magmasusi ya ing mabilug a yatu.
Misasanmetung la ring dakal a tau,
king aldong misapuak ya i Hesu Kristu.
**
Itang sunggalitan lilele da na pâ,
reng mipanabug at deng mipangariryâ.
Ding e mipanatu at deng mipanyirâ,
mipapagmananu la’t mipapamingwâ.
***
Ding makasarili at sari king kaimut,
sasaup la karing king kabiayan dimut.
Anggiang ding aliwang ditak mu apalut,
mamie la pa karing memunlang e linsut.
****
Ding mayakayan at labis a kabiayan,
panikuanan da ing dakal la asopan.
Anggiang ding artistang misna king katasan,
magpakumbaba la’t sasaup mu naman.
*****
Anggiang ding kriminal a mistulang lasip,
magtunud la ngan king aldo ning minyagip.
Ding pulitiku man a marawak isip,
maging mayap la ban ala tang asilip.
******
Nuka man lumawe timan ing akit mu,
uling lugud itang lulukub king yatu.
Muslim, Hindu ampong ding sablang Kristianu,
Mikakalugud la king aldo ning Pasku.
*******
Anggiang ding aliwang e manualang lubus,
gagalangan de ing aldo ning menatbus.
Uling nung atin man o alang mengabus,
Ing maulaga mu itang pami-utus.
********
Nung aldoldo mu ing aldo na ning Pasku,
matula ya sa ing mabilug a yatu.
Alang sunggalitan at ala ing gulu,
uling lugud itang magari king tau.

PL Rodel E. Gozum
25 Disiembre 2018
Astoria, Ortigas, Metro Manila

This entry was posted in PL Rodel E. Gozum, Poeta Laureadu. Bookmark the permalink.

Leave a Reply

Your email address will not be published. Required fields are marked *