Ding Adua Nang Lupa Ning Pasku

Lorung Malabit
Silaba 24 Sesura 8/8/8
Taladtad 8 Estropa 6
*
Marimla na naman ing tsup
na ning anging manibatan karin banda paralaya
Ing aldo king dayatmalat
maranun ne iting lalbug at e ne agad sasaka
Ding bulung da ring tanaman
A kapilan pa aluntiag ngeni den malare nala
Pawaga a malapit na
ing panyatang na ning Paskung panayan da ring balana.
**
Kabang ding baleng maragul
Katkatmuan dong patda-sinding sulung miyaliwa kule
Dakal la ring mangapkap mu
king dalumdum da ring kubung pakasabit lalam tete
At kabang magpakasawa 
la king lalapong pamangan ding makualtang siping bale
Ding atian dang gagalukguk
itudtud dano naman ding alang isubung pagkabie.
***
Ding kalugura’na ning diyos
kabang okupadu la ngan king pamanyaling isulud
Ding kelinguan ning miglalang
karing kartun dang pagkeran lubas la ngan mamaluktut 
Busal ning marimlang bengi 
karing katawang mangablad ala la man apangulub
Kabang dening mangakualta
ing imalang pisawan da, king karakal, bundukbunduk.
****
At kabang babasta rala 
ring kualta rang tumpuktumpuk ding mapalad a mapilan
Daka’la ring magpiak mata 
karing salun a simpli mu at malagua mu sang uluan
Dapot uling maski kusing
ala lang kualtang panyali king panulu rang kailangan
Karing maina at kalulu 
atin mumuli king kulkul king mismung aldo Kapaskuan.
*****
Kayari rang migpalimus
ding anak a kalatkalat ala lang katukang pasbul
Ding sakitin dang katawan
Kikera dala nung nula mirarasan king dalumdum
King bale ra ding atinan
karing dalit a pamasku paynawa la karing kutyun
King lambut ning pagkeran da
e ra a-isip ing atin matudtud lalam ning ambun.
******
Ing paniatang na ning Pasku
karing ditak a mapalad masaplala ya’t masayâ
Aldong gagad dang panayan
Uling nanuman buri da asali ra’t agyung akuâ
Aldong lakuas pang mayakit
ing malaut dang pilatan ding atinan at ding alâ
Uling karing makarakal
ing Pasku’t ding aldo danup ala lang pami-aliwâ.
PL Rodel E. Gozum
23 disyembre 2014
Munoz, Quezon City