diuang capalsintan neng ORLY MANALO DIZON
Sucad: 8/8; Orthografiang: C-K; Jun. 23, 2017.

1
Mirikilan nong oras ding / bage king bie ta miliari
Alang ditman paginakit / a simbitla dening labi,
Dapot bucud ining pusu / a pilit e cucumpormi
Uling e lubus tanggap ing / pagsalbat na ning sarili.

2
Bubulayan cu pa detang / masayang aldo pisulû
A malalam pangatarac / king calamnan nining pusû,
Panaun nia itang matul / king sakit caplas ning salû
Ing agad sang mitulducan / ya’ng aduan cu’t panigapû.

3
Sasanacan cong parati / ding pangacung keca napse
Itang lumaut cu keca / potang ing bie cu ume ne,
Ketang aun a malalam / ning pagsalbat ya’ng cayabe
Uling iya ing angganan / na ning bie cung misnang lumbe.

4
Pero miayo pa mu rin ing / kening lub cu ing labanan
A e magpatumbalag king / lagiu na ning capalsintan,
Uling ya ing babie cacu / a maritac pang sicanan
At ya iting maulaga / tauling ibie ning catutuan.

5
Dilang mialiua sasabian / e cu no deti picabiang
Atin nang cacu sasabi / uari na cung malilipang,
Uling ing cacung pagnasan / magbalic ca mal cung irang
Iti ya ing capanayan / capilan ca caya datang?

6
Tagulele na keca ning / pusung saui king ligaya
E cu tinap-tinapan ing / gumulut ca ‘lang parsala,
Nanu mu ing casangcanan / ot memandal ca’t merimla
Sumangid na ning cabaluan / a pasumpa-sumpa ca pa.

7
Ing sa’ aganaca mu pa / detang bage pebandi mu
Macabale la king pusu / kinubut co deting ustu,
Lalu na’tang pebuclat mung / pasbul pisni na ning yatu
Uling yang pecaselyadu / nitang lugud mu canacu.

8
At detang pamicatagun / irug king bie ta milabas
Mipmung lang tula at saya / ing canacu mu pemalas,
Ding yumu da ding labi mu / at leguan mung misnang timias
E cu atanggap ing ica / BABAI CANG TALIPANDAS.

Repost: DIZLAG FARM, May 12/22.

Bersu neng ORLY MANALO DIZON;
Orthografiang: C-K; Sucad:6/6; May 7, 2016

1
Careng anggang Inda / keti babo yatu
Yatad ke ing puge / at yapse kecayu,
Ngening ca-aldon yu / cacu lang ibersu
A parikil ketang / map yung pangatau.

2.
Lingap na ning Inda / e ta atauaran
Careng keang suli (anac) / ing bie na yayampang,
Manibatan abac / angga nang cabengian
Mantabe yang tune / a mipmung canuanan.

3.
Balican ta pa mu / bingut tang pelangâ
Pane yang magpuyat / e iti painauâ,
Meragul ta’t sucat / pelto nang masalâ
Lubus binie na ing / lugud na ning Indâ.

4.
Ngeni mong matua ne / maina na catauan
Ita mung penganac / dapat yang luguran,
E ta na mimisip / nung iti capilan?
Ngeni na ing dapat / ing lingap paramdam.

5.
Dening pangamanu / king babo linatag
Keca, cacung Ima / ing keca co pasiag,
Lugud a tiru mu / king pusu mitatatac
Lub ning pangatau / mikintal, tinasac.

6.
Tanggapan mu sana / gulisac cung matnî
Ban agiang ditac mu / keca co isublî,
Lugud a binie mu / alang pacunuarî
King aldo at bengi / cacu cang pangadî

7.
Aduan cu king Ginu / ing pacaban ca bie
Ban ing keca pakit / ablas cung dalise,
Ing keca co yampang / dening aduan tacde
At mapaling caul / padama cong pane.

8.
Potang maina na ca / ala nang sicanan
Ketang kecang ketuan / acu ing guyabnan,
Calupa na iniang / acung magpatalan
Ding adua mung gamat / cacu mu iyaduan.

belangcas neng Orly Manalo Dizon

1
• Kilub ning aldoldo a mangapaliari
• King pibale-bale ‘ya ing magmantini
• Manibatan abac keang pamagsilbi
• Alang capagalan king cayang sarili

2
• Bayu ya pa sunlag itang aring aldo
• Agiang puyat ya pa piragli neng ticdo,
• Maglutung amusal samasan ding plato
• Ban keta nang dulang caring salusalo.

3
• Istung casinup da detang pipanganan
• Pamaglinis bale ya naman umpisan,
• Caibat tipunan na marinat dang malan
• Sabunan icula bayu ‘ti luglugan.

4
• Malan isable na itang pinipi na
• Tane man mamalis king carelang mula,
• Mandicut, manugtug mialiuang tanam da
• Tsaca no agtalan ding matua nang bunga.

5
• Bungang ayagtal na idala palengki
• Ketang lapag-lapag caya lang pisali,
• Caibat cuentan na la ding cayang ayabli
• Paltang cailangan da nung casyang panyali.

6
• Caretang ayabli sali yang ayasan
• Pilan kilong asan at paltang cailangan,
• Ketang salicap na layun nong puntucan
• At tsaca ne ume bale nang tucnangan.

7
• Ing carelang pagtuan caratang na bale
• Ya naman ilutu king timpla iyapse,
• Lugud at pacamal caring cayang abe
• King keang pamilyang pibandian nang tune.

8
• Potang datang na la detang cayang anac
• Ibat king escuela pauas tatagactac,
• At ing asaua nang sinarul king dayat
• Itang nasi’t asan tana macayapag

9
• Caibat na ning pagtuan ya na naman dili
• Itang cayang gulut iyatyat piragli,
• At king cagising na tane man manulsi
• Carelang imalan metastas megisi.

10
• Itang aring aldo bayu ya mipanpan
• Manaliua aske carin king albugan,
• Tutuking lutu na carelang apunan
• Lutung kitmuan lugud macaganang mangan.

11
• Bayu la matudtud mtipun- tipun la
• Arap na ning altar pasalamat Caya,
• Canitang Ginung Dios Ibpa carin banua
• Grasya Nang pigcalub at pangacabus da.

12
• Cayaring mengadi ya naman arapan
• ‘Tang “black & white tv carelang pagtiagan,
• Detang teleserye a susubaybayan
• Caya iti munie ditac capasnauan.

13
• Potang magkera ne diua na lilibad
• Caya nang isipan ing tutuking abac,
• Dala nang matudtud abe king paninap
• Nung nanung manaya king aldo ning bucas.

14
• Macanian dudurut ing patingapun na
• Bie nang daralanan SULU NING PAMILYA,
• Lugud na at lingap pane ipadama
• Pusu nang busilac a alang calupa.

July 31, 2013, 16:15 hours,
Manama , Kingdom Of Bahrain.

Diuang capalsintan neng Orly Manalo Dizon
Sucad: 8/8; Orthografiang: C-K; Jul. 15, 2018.

1
E alisyan gunaman ding / macule aldo miralan
A dinake dang penandit / ding uma mung misnang niaman,
Migsale la’t migdatila / kening pusung manandaman
At keca cu mamasa pang / misan mu cu pang balican.

2
Pangauale mu siping cu / ining bie cu mengulila
Caring lambis mung mayumu / kening pusu pepamana,
Inia king angga man ngeni / e cu alus ayaguanta
Uculan itang cacu ngan / mipapatan ing parsala.

3
Ding canita a mapilan / mung paglaco atin aclis
E alingad lua ding mata / king pisni mu mamalisbis,
At caibat ning pilan aldo / uling e mu la atikis
Pamisucub tang maula / sucal mung lub mapapalis.

4
Itang paglaco mu ngeni / malualas cang lub ginulut
E co akit king lupa mu / o abacas itang lungcut,
Ding mata mu ilang babie / senyas kecang pamanglaut
Ala lang lua ‘giang capatac / yang king salu minie tacut.

5
Inia ngeni cu abalac / nung nu anti ing ala ca
Icang pilit nang pakiduang / ning magmalun cung caladua,
E cu balu nang carasan / na ning pusu cung magdusa
A nu anti at angganan / nung capilan cu abata?

6
Ing maralas ‘tiu cu ngeni / kening tucuran ning eran
A canita ica itang / manaya cacung panyatang,
Itang ngeni maliliari / acung pane mamindauan
ITANG KECA MANENAYA uari’t misan ca pang datang.

diuang capalsintan neng ORLY MANALO DIZON,
Sucad: 6/6; Orthografiang: C-K; July 7, 2017.

1
E sasadian itang akilala da ca
A meguing sangcan ding dacal a cocontra,
Mica salungatan istorya ning bie ta
Pasaring dulut na ning mayumung sinta.

2
Alang e lalabas a aldo at bengi
Pane cucutang nung ba’t iti miliari?
Lugud a migsale king pusu’t sarili
A sinese da ding caul mung parati.

3
Ing laue ding tau tutu ca pang anac
Ing ilimpi cacung babau nang burac,
Dapot ing e dinen dang ustung pamalac
King pusu mu’t isip acung gugulisac.

4
Casumangid da ding dacal sasalungat
At sasabi kecang ing e dapat sucat,
“Linub king macanian a e naman dapat
Luguran ing taung macuniat na balat”.

5
E mo picabiang ding keca maginakit
Uaring meuala ngan ding ‘gang malasakit,
King kecang sarili a e dapat paigit
A bage king bie mu munie mung pasakit.

6
Pasalamatan cung neng ‘tin pamitipun
Babie mu ngan cacu oras mu’t panaun,
E mu sasayangnan ‘tang pamicatagun
Pakilala caring mangasiuang lupun.

7
Neng icata na mu kilub na ning cuartu
Lubus padama mu’ng pangalalaki cu,
Ding ‘gang mengaganap cacu pabandi mu
Alang mikibalu nung e mu ing Ginu.

8
Inia macanian cung ing keca yayapse
Agiang kenu pa man e ca ipaglibe,
Uli ding lingap mung canacu ibabie
E DA CA GULUTAN anggang atin cung bie.

Repost: DIZLAG FARM, May 5/22