(King Paraisu ning Eden)
Irvin Harvey E. Rivera
Siuala Ning Maliwalu/Anac Ning Baculud
September 10, 2019

Salapi! Salapi! Nanu ka, Salapi!
Piranggut kang papil inalkus e wari?
O’bat mo dakal lang a e makatanggi
Nung pita mu’t nasa, malyari ka buri?
King sikanan mung yan—-papil kang malati,
O’t giginwan daka a anti mong Ari?

Ninu mo pin ika a awsan dang kwalta,
O’bat keti yatu pandulapan daka?
Makanyan ka wari tune kawulaga
O’t ding sablang tau peybulag la keka?
Nanung sisimpan mung tagle a gayuma,
Ikwa mong alili reng keka sasamba?

Banal ka waring D’yos a keti manatbus
Karing piyutangan—m’ye ligayang laus?
Pamangan ka waring mamye tulang lubus,
Kareng manamdaman, mangaplas a dungus?
Ninu mo pin ikang manusig, manutus,
Maguing pabayat king pupusanang kurus?

Makapagmulala ing kekang sikanan
Makananu mu lang tiki’t emuyutan?
Ding sablang kakuyug ku’t kakaluguran
Lon mu lang kinambil king sablang dewakan
Marapat ka mu ping e ra ka tingkupan
Uling karas banwa ala kang kasilbyan.

Mayap ya pa ining kalulu’t hamak
Ing manyimpang kwalta e na na binalak
Inya mo sa ngeni neng takup ing pisak
Ing daratang aldo, panibayung abak
Ing kau ra’t danup, meyampat, meyaplak
Kabas lang tigtugang masamyung bulaklak.

‘Nya manibat ngeni, inyang abalu ku
Ulaga ning kwalta kareng parang tau
Mananu na sanang magsilbing Amanu,
Mipakde la ngan sa’ ketang bandang sepu
Atalus da ngan sa pengaku ning Guinu
King mula ning Eden karin miras tamu.

SiualaNingMaliwalu #AnacNingBaculud

Irvin Harvey Estanislao Rivera
Siuala Ning Maliwalu/Anac Ning Baculud
April 2, 2019

Neng piesta king baryu masigla’t matawu
Kapmu yang pamangan ing dulang nang ‘nang ku
Deng makikipangan miyayaliwang baryu
Kagad lang salangi king keka ming kubu.

Miyayaliwang lutu, miyaliwang potaji
Ing balu nang lutu ning kanakung Atyi
Ing manyamang bringi aliwa yang klasi
Dakal ya bubulug, ‘nya buri deng dili.

Ing pisan ku naman tibuktibuk, suman
Tamalis, kalame, m’yaliwang kapangan
Ding makipamiesta keti man o daywan
Muli lang matulang atin babakalan.

Nung miswertyan naman maglitsyun keng babi
Bagya ra mu kapad, bagya ra mu buri
Ding kekeng bisitang saglit sinalangi
Nung e la marine, e no bisang muli.

Detang kayanakan keta king pangulu
Taklayis da na ku’t managkat king bulu
Ding kakung kakuyug a lupang kulapu
Makipamiesta ke kang Rosang Malagu.

Deta na mang Anak munta no king Plaza
Dakal a papyalung papremyu da pera
Kangatba ning Tete reta namang matwa
Atin lang papyalung lulung bisikleta.

O’ita i Bapa ku miminum neng alak
Bisperas, kabukas manibat king abak
Ding keyang kakuyug gaguti no’t maklak
Pinapinandit mu kanyan no sagakgak.

Makanyan ing piesta keta king Baryu mi
Mekeni, paindalan at e ko magsisi
King keka ming Baryu e ko sa paylili
Salangi ko’t mampit king Piesta mi ngeni.

SiualaNingMaliwalu #AnacNingBaculud

Irvin Harvey Estanislao Rivera
Siuala Ning Maliwalu/Anac Ning Baculud
November 4, 2018

Binang masalusu ing aldong babatyo
Anting pamigunam a kabud tinando
Napun at nakadwa yang pilit papalto,
King panamuyut na ning masayang aldo.

Napun at nakadwa, anti n’yang taguimpan
A sukat magmain—-pilit mung ukulan
Busal ning paninap, dane ning aslagan,
Ding masayang aldo layun ta’ng balikan.

Nung atin mang memun piju yang mibalik
Muli ya at muli keti babo’t sulip
King diwa ta’t ukul, king dusa ma’t pait,
Mie tamung payapa’t mikawul matigik.

King karinan na ning Guinung Mayupaya
Payapa ing bie at makapagmulala
Ding memagsipamu’t miglubas king tula,
Menawa lang mie at kinabyeng makaba.

Keti sulip naman a mineng migmalun
Malugud king bie ra a memagsipamun
Tantu yang masakit ikutkut king gabun,
Pamigaganakang dinukit ning napun.

SiualaNingMaliwalu #AnacNingBaculud

Makuyad a Poesya
Irvin Harvey E. Rivera
Siuala Ning Maliwalu/Anac Ning Baculud
June 20, 2016

Ining istorya ku tutu yang milyari
Inyang ing Bungsu ku manakit yang Dwendi
Ini e pikatyang kwentu’t sabi sabi
Agpang king Bungsu ku kekyalung no reti.

Magumpisa inyang Apat ya pang Banwa
Ining ka’kung Bungsu kakyalung na na la
Dening Amanwan nang “KAIBIGAN, KASAMA”
Agpang king kwentu na Ilang kayabe na.

King pamilarawan at king kayang kwentu
Ding Dwending a reni malati lang Tau
Pakapandyama la at “pakasumbreru”
Agpang king Bungsu ku kayaske no kanu.

Inya pala, misan apapansinan ke
Sasabi yang dili, ala ne mang abe?
Neng lakwan mi ne man ya’ng dili keng bale
Anti ya mong atin kasabi king lele.

Ing ka’kung Asawa e bisang manwala
Kabud mikaDwendi? Kalokwan, pikatya!
Dapat mung abalu nganang migsalita;
Ing Anak ta’ng Bungsu tantung Anak ya pa.

Karing kwentung multu ampong laman labwad
Ikwa ku nang metwa, ikwang mikaedad
King ka’kung talambie e ku pa mipalad
A manakit karen manwala kung agad?

Paynawa king obra aldo ning Miyerkulis
Megday off kami ning Misis kung Malambis
Ini e pikatya’t e metung mung chismis
Ikwa nang menwala ning kanakung Misis.

Kalub da ring adwa linub king Iskwela
Melakwan la bale, Bungsu ku’t Asawa
Apansinan na ya ning Malagu kung Reyna
Ing kekaming Bungsu ating kaistorya.

Kanyan ya mipakde sibukan nang lawen
Nung ni’ng kasabi na Bungsu nang babanten
Inyang akit na ya e ne maybug siguen
Ing keka ming Bungsu atin yang tutunguen.

Ima, Ima ngana ume na ka keni!
O’ini reng “Kasama’t” kakyalung kung Dwendi
Ing metung lagyu na, yapin ya i Charlie
Itang makakupya, ing lagyu na Dandi.

King karug at takut ning ka’kung Kabangal
Teginis neng meko ing Bungsu mi king lual
King kilub ning Kwartu semalan nang linwal
Anti ya mong kildap linsut, memirapal.

Makananu kasi apatunayan na
Ding awsan dang Dwendi tutu la pala
Kan’ta no pa ikit kareng kayang mata
Ding kalyan nang Dwendi manibat kanita.

Inya naman ngeni e na no katulan
Ding laman a Labwad a katatakutan
Apagtantu na ya keti king Karinan
Ding e mayayakit abe ta’ la naman.

Uling e mu kabud ita mu mung tau
A manuknangan a mirinang animu
‘Gyang ding amanwan dang Dwendi at Ingkantu
“Makilabas ku pu!” Dapat lang respetu.

SiualaNingMaliwalu #AnacNingBaculud

Irvin Harvey E. Rivera
Siuala Ning Maliwalu/Anac Ning Baculud
February 21, 2019

Sampagang matuling, metung a kandila
Matang makapyak king pamagsalbat at lu’a
Mamun tamung misan, mipyak tamung sarya
At ding bagebage malakwan lang sabla.

At ika tamu ngan mikutkut king aun
Istung kinatuk ne malungkut ta’ng pamun
Makwalta’t kalulu datang ing panaun,
Pante-pante tamung mikera king pantyun.

Nanu mang gewa mu ngeni at kanita
Yang maguing ablas na ning Ari king Banwa
Kabang ing panaun atyu para keka,
Misip ka’t magbayu king pamikasala.

Ding kekang pibandyan ampo ing upaya
Adala mu wari bage-bage’t sabla?
Bale ‘pong salapi at kekang tinangka
King karinang banwa adala mo kaya?

Mayap ya pa ining banal a pamana
Malyari mung lakwan, malyaring ipasa
Imbutan mu’t nasang makabyeng kaladwa
Magsilbi pang mayap, metung panalala.

Metung a pamamun aliwa pa ing wakas
Ning panalala mu king Yatung malwalas
Kabang atyu tamu’t lalakad ing oras
Ing mayap a imbut lakwan tamung bakas.

Tawli mu nang pamun, nanu ing gawan mu?
Titigtig ne itang kekang kampanaryu
Malalam a kulkul a pikutkutan mu,
Makasadya ne king oras pamamun mu.

SiualaNingMaliwalu #AnacNingBaculud

Makuyad a Poesya
Irvin Harvey E. Rivera
Siuala Ning Maliwalu/Anak Ning Baculud
June 2, 2019

Ninu kanu yaku, nu’ ku menibatan?
Misapwak ku kanung ala mang kasilbyan
King karinang yatu linto kung makanyan
Alang meging tanda king bie ku ing legwan?

King Siklubang yatu alikabuk ku mu—–
Papayid ning Angin nung nu’ ku mitagmu
Nung atulan da ku metung kung kalulu
Ala kung kasilbyan keti babo yatu.

Ding sablang manakit ngara pang sumabi
Ala kung lugalan king karinang iti
Ding kanung kalulu ngara pang magsisti
Bina lang pabayat at ala lang silbi.

Nung itratu da ku metung pakaugse
Alang paintungulan a mibagwa king bie
Uli kanung bukud kalupa kung aske
Alang karapatan king bie mitiwase.

Ding ka’kung taguimpan batwin lang masala
A meguing Padrun ku’t meguing alimbawa
Tukupan dang dulum ing babye ming sala
E kaya dalumdum at dumagus ing lwa?

Mayna kung Siwala yang katni nang kablas
Ning paintungulan ku king masalang bukas
Nu’ ku man dalakit king dalan a gasgas
Marayu ku puntalan mibata king kaplas.

Pakisabi ku mu limusan yu ke sa
Lingapan yu kami pabustang mibagwa
E naman pu miguit ing kekaming nasa
King ditak a saup maragul neng gampa.

Ing mayap a dalan ‘turu ye kekami
E yu ke sa’ pab’ren mangalililili
Anak ke mang dalan a ala mang silbi
Anak na ke ning D’yos a lelang na keti.

SiualaNingMaliwalu #AnakNingBaculud

Makuyad A Poesya
Irvin Harvey E. Rivera
Siuala Ning Maliwalu/Anac Ning Baculud
May 26, 2019

Dakal ya pangarap ing Anak a Bertu
Metung na kareti ing sake king Barku
Inya naman inyang kinangwa yang kursu
E migtyamantyaman pingwa na, Marinu.

Apat ya pang aldo ketang pamag-training
Migbabo nang agad ing tagle nang galing
Inyang subukan de ketang pamagswimming
Pilan mung minutu ikwa na ngan tambing.

Inyang mag-gradweyt ne tambing yang megobra
Ing Bertung magaling dela re Alaska
Karin ya mesubuk ing kursung pingwa na
Ing pamag-Marino karin na alasa.

Pilan ya pang aldo kabud peuli ne
King magyelung dayat e kanu mikawe.

SiualaNingMaliwalu #AnacNingBaculud