Kagli

Posted on October 31, 2021 by Rodel E. Gozum

Kagli
Lorung Malabit
Silaba 12 Sesura 6/6
Taladtad 4 Estropa 10
Adle Kapusungan (satire)
*
Maging tutu wari, ing awsan dang kaglî?
Mekeni kapatad, surian ta sagulî.
Nung atin mituran, iyan e ku burî,
pakalyan ku lamu, ring malungkut bilî.
**
I Sayung pengagli, re king burung mangga.
anggiang pang mayli ne, maslam ya pa lupa.
Lakuas na pa potang, medyu danupan ya,
anti yang mimilup, purung aslam sasa.
***
Ing indu nang Tina, aniang yang kakaglî,
king mapaling tidtad, asne king kaburî.
Aniang mibait ne’t, king bale re yulî,
itang kayang lampin, iya mung maputî.
****
Pengagli ra neman, king burung tilapiâ,
ing siping kung baleng, makilagyung Selâ.
Ania ing asbuk na, ibuklat niang bagyâ,
anti yang mamatut, king buluk na wawâ.
*****
Karing bumberu ne, pengagling inda na
itang kaklasi kung, awsan ta na’ng Maria,
ania ini ngeni, potang manyabi ya,
mandilu kang wawa, anggiang malaut ka.
******
Tutung maburi ya, king kamuting bagin
aniang ing indu na, pangagli ne’y Martin.
Meragul ya pin sang, milalu kasanting,
king buluk na atut, pilmi kang maduling.
*******
Pengagli ra ne man, king barakung bibi,
itang tau Porac, a awsan dang Gani.
Aniang meragul ne’t, migbayintau’y ni,
pangasawan no ring, bibing malilili.
********
Asne king kayamang, makiramdam radyu,
aniang pangagli neng, inda na i Cielu,
ngeni daig no pa, ring tv at diaryu,
balu na ing sablang, indredus king baryu.
*********
Pengagli da ne man, kang Leila De Lima,
Itang tau Lubao, a awsan dang Buda.
Aniang meragul ne, at meging dalaga,
bagya na la kapad, ding sagin a saba.
**********
Pututuan ku ne pa, keni ne mayarî,
ining kapusungan, a pitayitayî.
Pota ikutang yu, itang e ku buri,
uling e ku sabian, nung nu ku pengaglî.

Rodel E. Gozum
05 Septiembre 2019
Munoz, Quezon City

Posted in Komidya, PL Rodel E. Gozum, Poeta Laureadu | Leave a comment

Misyung Sukat Gampanan

Posted on October 30, 2021 by Fr. Ronnie Cao




Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureadu | Leave a comment

King Aluntiang Marangle

Posted on October 30, 2021 by Kate Lapuz

Adle: Malikwatas

Marakal naka ayaswe, aku ume pang tumalas
King aluntiang marangle, nung nukarin ka mandaras
Itang dikut pinyabungke, nya memanulu ka pawas
King banda ku mipalawe, kabang maglinis kang lawas.

Likwan mu’ing kekang gagawan, telasan mu itang burak
Inyang kekang abatyawan, king pilapil misalampak
Mebulus la ding dadalan, detang apadwas kung tugak
Miglundag la king dikutan, atin pang mitagan ditak.

Bayung bengi ‘ting kakatuk, ing lagyu ku kukulayit
Makiabe pa mong pasyuk, inya king pasbul linapit
Inandu ke ing pamukpuk, kabuklat ku ikang ikit
Ngaku, lungub naka’t lukluk, at tiniman kung malagkit.

I kasagsag:
Marakal naka ayaswe
King aluntiang marangle
Itang dikut pinyabungke
King banda ku mipalawe

Likwan mu’ing kekang gagawan
Inyang kekang abatyawan
Mebulus la ding dadalan
Miglundag la king dikutan

Bayung bengi ‘ting kakatuk
Makiabe pa mong pasyuk
Inandu ke ing pamukpuk
Ngaku, lungub ka at lukluk

II kasagsag:
Aku, ume pang tumalas
Nung nukarin ka mandaras
Nya memanulu ka pawas
Kabang maglinis kang lawas

Telasan mu itang burak
King pilapil misalampak
Detang apadwas kung tugak
Atin pang mitagan ditak

Ing lagyu ku kukulayit
Inya king pasbul linapit
Kabuklat ku ikang ikit
At tiniman kung malagkit

Pilibe lugal:

Marakal naka ayaswe,  aku, ume pang tumalas
Itang dikut pinyabungke,  nung nukarin ka mandaras
King banda ku mipalawe,  kabang maglinis kang lawas.

Likwan mu’ing kekang gagawan,  telasan mu itang burak
Mebulus la ding dadalan,  detang apadwas kung tugak
Inyang kekang abatyawan,  king pilapil misalampak.

Bayung bengi ‘ting kakatuk,  ing lagyu ku kukulayit
Inandu ke ing pamukpuk,  kabuklat ku ikang ikit
Makiabe pa mong pasyuk,  inya king pasbul linapit
Ngaku, lungub ka at lukluk,  at tiniman kung malagkit.

Sinulat neng Babaing Matun
Balen ning Mexico
1/7/16 12:42 ning kaugtuan

Posted in PL Kate Lapuz, Poeta Laureadu | Leave a comment

Ing Kakung Bangungut

Posted on October 30, 2021 by Kate Lapuz

ika’ing pantunan ku king karalduman
neng benging babagyu, ban mukung payungan
munye payul kaku neng e balu’ing gawan
kumaul at sabyan o Kate agyu mu yan..

eku akalingwan aldo na ning dulum
minanging masikan, mengildap pon duldul
metuling ya’ing banwa, king kakung pagmalun
anti mong kaladwa, kanaku bubulung

bulan ning nobiembri, metung yang bangungut
a-kinsi kanita, king isip kung bubut
eku pa man tikman, mayumu mung lugud
mapali mung kaul, karela nang pitlud

agiang nang gawan kung, magbalabaligtad
mamagsirku-sirku, pane king paninap
mewala ka yatu, emu man apasiag
nung nanu’ing e tutu, ing mali at mayap

ing lua ku papatak neng aganaka ka
ing ditak a aldo a pamiabe ta
ing tauling amanu inapse kanita
“sige manik naka matudtud.. paynawa”

ekupa man mipiak atin akbung dimdam
mipabalikwas ku king kakung pagkeran
ing balas ning baril digsu ku mituran
linsut king sawali kanaku papanpan

ing kabug ning salu at takut misamut
ikit ko ding baril keka ‘tang matutuk
daraya ka gamat kaybat sasayukut
pinuntirya dane ban baril e magut

ela mikaswelu linub lapa bale
linukdang la awang at keka linele
ketang lalam eran nung nu ka mipase
kilbit de ing baril ing laman gisan de

gaga ku’t gulisak alang makaramdam
agiang sasyo naku ela man tinuknang
bayu la miglako karelang sigraduan
enaka miligtas ding ‘lang Dyos katawan

kaybat tinipa ku’t mengulait saup
karing siping bale ‘lang linual king takut
biltangan ku’ing pale misakab, misubsub
karetang pilapil, lawas ampong dikut

ekuna balu nung makananung miras
bale ding apu ku, minyapak kung burak
at kaibat na nita e balu’ing merapat
inyang mimasmas ku kabaung ne’ing ka’rap

daya king lupa na, edaman lininis
ing lua king mata na , mamagus king gilid
antimong saingsing, king tinggap nang sakit
kilub ning kabaung, ikit keng manangis

sinulat neng BABAING MATUN 8/2/15

Posted in PL Kate Lapuz, Poeta Laureadu | Leave a comment

Mayap a Capagnasan

Posted on October 30, 2021 by Fr. Ronnie Cao



Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureadu | Leave a comment

Krisis

Posted on October 30, 2021 by Rodel E. Gozum

Mala-soneto
Silaba 12 Sesura 6/6
Lorung Malabit
*
Malambat na la rin e mitatalangâ,
king banggera karin na la magdatilâ,
ing dulang e ra ne inapang bitasâ,
ring pinggan a tebugan da ring kutyarâ.

**
Ing kuran maluat neng e miyuyulingan,
e ne mitutumpak ketang pagkalangan.
Anggiang mapilan nang aldo ing dinalan.
E ya pa megalo king kayang sakuban,


***
King kalang miglimit na ngan itang abu,
anti rang pemukpuk, pinitpit king batu.
Anggiang tusukan mu man king taliri mu,
mengasias na iting mengaring samientu.

****
King kilub ning bale mangaslak no mata,
manibat king bunsu angga na king tata.

Rodel E. Gozum
08 Abril 2020
San Simon

Posted in Uncategorized | Leave a comment

Poeta Laureado Amado Gigante

Posted on October 29, 2021 by Rodel E. Gozum

(Paldas A Parangal Kang Ka Doy)
Lorung Malabit
Silaba 12 Sesura 6/6
Telatag 4 Estropa 8

*
Ing malapupuring, Poeta Laureadu
Amado Giganteng, tatangalan tamu
pauli ning salun, ginulut ne kanu
ban e ne magbalik, king karinang yatu.

**
Pauli na niti, mibalut, yang lugmâ,
ing pusu ku kening, dimdam kung balita.
Mipalukluk ku at, kabud na mengaina,
kabang deng mata ku, migdanum la king luâ.

***
Dapot ing migbitkil, at kinyak milalû,
ing Amanung Sisuan, a anting mebalû.
Uling ing maintang, a kaya miglualû,
king kayarian banua, minuli ne rugû.

****
Kabang magmalun ya, kayang sasambitlan,
lakuas melabug ing, kayang kapanayan,
uling ding suli na, a kayang guyabnan,
at layun gagambul, melagas no naman.

*****
Talus na kasi ning, indu ta’ng amanu,
ing kapagalan at, gewang sakripisyu
nang Apung Doy bayang, sikan pasibayu
ing maybug mibatbat, a salita tamu.

******
Ala yang tinagan, binie na ing sablâ,
ing panaun, kualta, pawas ampong dayâ,
baneng italakad, ampong ipaminguâ,
ing menan a sabing, ume nang miragsâ.

*******
At maigit king sabla, ing e na aliktan,
ing pagmairing ne, at pagparangalan
ing tindag at damla, ning Amanung Menan,
karing poesia nang, kesabian king leguan.

********
Maglungad ku man king, malabis a lugmâ,
ding angel king banua,naman no kasayâ,
uling ibat ngeni, ilang pagtumaylâ,
nang Apung Doy karing, amanung mayukâ.

Rodel E. Gozum
07 Nobiembre 2020
San Simon, Pampanga

Posted in Uncategorized | Leave a comment

Destination: Great Wall of China

Posted on October 29, 2021 by Freelance Writer



Tianjin, China

Komusta pu kabalen,

Minta ya ing talasulat king Tianjin, China, ban maging talapagsalita keng metung a workshop. Migdatun ya karin kilub ning pabulan, migsalita keng mapilan a tema. Karin ya munaman mebiasang minum tsa uling makayabe yang inuman keng balang pamangan kareng otel a tiknangan na – almusal, pagtuan, minidal, ampong apunan.

Mumunang aldo panyatang na, seganan de reng talabubu ning workshop a gampanan na atdela re keng metung a magarbung apunan. Minorder lang dakal a pamangan a inapag keng metung a maragul a lamesang pabilug. Labing-aduang putahi, tidua o titlung pinggan balang katau keng lamesa. Maigit dobli keng agyu rang gisanan deng mamangan. Ing layun, pakit da keng pamirungutan ing kaugalian (at aria) keng Tsina a ing pamanapag pamangan keng dulang metung yang selebrasyun ning kariwasan at at kasaganan keng bie. Ing pamanggisan keng makayapag a pamangan tanda ning karanupan at kakulangan grasya king bie ning metung a tau.

Bilang masaya at mapaling salubung keng bisita, atin lang metung a gawi nung nu re pangutnan mialiwang kutang tungkul keng sarili na. Alimbawa, talasawa ya ba, pilan ya anak, nanung paburitu nang kule, nanung ilig nang libangan, at nanu pa. Ing sopas, balang kutang kailangan la ngan minum metung a shot keng karelang lokal a alak (white wine), deng anggang atiu keng dungutan. Bayu meyari ing bengi (o abak), malasing la ngan deng magselebra, pati ing talasulat. Kapnamu naman, aldo Sabadu kabukasan at aldo painawa, inya alang prublema. Pepayatad de keng otel ing talasulat a ala namang kasasagkulan miras at metudtud, kaibat nang memanyuka.

Kaibat ning paruminggu, pisyal de reng mapilan karing kayabe keng workshop ing talasulat keng peka-pamosung “Great Wall of China”.
Magsilbi yang puntan manibat keng bandang kalautang norti ning Tianjin. Agpang kareng ekspertu keng istoria ning yatu, tatayan deng mitalakad ing parting Tianjin ning pamosung pader ketang siglung 550-618. Dapot meging epektibu yang panyagka kareng kasalang keng giyera maigit pamung 700 banua kaibat nang mitalakad kapamilatan ding dakal pang dagdag a pasilidad at kagamitang panlaban.

Ing pamamasyal kapamilatan ning pamaglakad babo ning Great Wall metung yang popular a puntahan da reng turistang manibatan kareng miyaliwang suluk ning yatu, antimo keng Pilipinas.

Salamat pu keng pamamasa, at mingat ta palagi.

Angga pu keng tutuki.

Freelancer
Posted in Freelancer | Leave a comment

GAWA CATANG POESYA

Posted on October 28, 2021 by Almario C. de Jesus

Neng Almario “amor” C. de Jesus
(Ing Agila Ning Apalit)

I.
Keng pamamasa cu,/ melino ing diwa,
A nung macananung, / gagawang poema,
Anya nung bisa ca,/ manigaral cata,
Ketang pamanyulat,/ qng bersu at rima.

II.
Anya misip nacang,/ masanting a tema,
At nung nanu pin sa,/ titulung bage na,
No mu pamulutan,/ dapat a salita,
Beitang talentu?,/ cagiwan at diwa?

III.
Ngeni cutnan daca,/ nanu ing buri mu?
keta nang estilu,/ at sucad a ustu,
Pilan a sylaba, / ing agyung gawan mu,
Labing adua, anam,? / malyari nu caya?

IV.
Ding linyang gagawan,/ yla ding talata,
At maca rima pa,/ ding sepung salita,
At potang basan me,/ nung bersu la’t rima,
Asna na canayun,/ ing pamagsalita.

V.
Nung balu mu retang / a; e; i; o; u; ngan,
King amanung tawli,/ madalas gamitan,
Potang sane na ca,/ dacal na gagawan,
Pamaglalang poesya,/ anti nang libangan.

VI.
Dapot maulaga,/ ing pamag-repasu
Basan me’t igale/ ing poesyang gewa mu
Nung keng panatindi / e ca macusuelu
Yta nang simulmul, / gupitan, idayu.

VII.
Magumpisa na ca/ ing pluma talnan me
Cabang mimisip ca,/ temang macabage,
Caban na ning isip / calcalan me Abe,
Amanung mi-simpan / tungal tungal lage.

VIII.
Ing padrun cung tikyan / Atin cu pung singsing,
E cu misakitan, / at alang saingsing,
Silabang mebilang / detang anam, anam;
At nung walu walu,…/ “Sintang Cayanacan”.

acdj Oct. 28th
Artesia, Ca USA
Balen Apalit, Pampanga
Labuad Capampangan

Posted in PL Almario C. de Jesus, Poeta Laureadu | Leave a comment

Malasakit Caring Masakit

Posted on October 28, 2021 by Fr. Ronnie Cao



Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureadu | Leave a comment