i Doru metung ya, caring mamasada’
caretang traysikel, king Puerto Galera
pablasang neng aldo, mapali nung inia
bengi ne mu lulwal, ing mamanewa’na’
uling ustung bengi, mal ing pamasahi’
neng malagad na la, ring bisang magbiyai’
at detang mumuling, lagpus alas dosi’
misake la sana, mamayad lang tripli’
maralas i doru, ya nang mitatagan
caring magtraysikel, king pipagparadan
lakuas neng babagyu’t, masican ing uran
ya na ing akit mung, lalagari dalan
misan, aldo biernis, atin yang asake
babai yang matwang, lalacad manene
kitnan ne ing dintang, ” apo nu co ume”?
“king baryu Tabinay”, ngana ning sinake
Bucas na co muli, apu nganang doru
masakit ya’ing dalan, pauli kecayu
anti mo king tulid, nitang cabusantu
gurul gurul ya neng, e ya simentadu
“at metung pa” nganang, dorung migsalitâ
dacal maglage king, cabusantung lumâ
“pasensya na co pu” apo e cu bisâ
sake na cayu mu, caretang aliwâ
“o ica na cabud, ing mamasaerus”
pekibat ning matwa, a gulping melungcut
at ngana pa niti, a magmacalunus
iyatad mu nacu, anti mu nang saup
“bayaranan da ca, agyang magcanu pa,
miyuli cu mu sa” ngana pa ning matwa’
“nandin la pa rugu, cacu manenaya’
at migaganaca, ring cacung pamilya”
mikelangan ya man, dapot mebisa ne
uli ning lunus na, king matwang sinake
ngana pang minisip, ati’nemang abe
inia e la palto, retang maglalage
cabang magbiyai la, isipan nong doru
istoryang dimdam na, dikil king malignu’
inia catulid da, ketang cabusantu’l
penerit ne itang, cayang mutorsiclu’
ketang cabusantu, iniang milagpus la
migminor ne ketang, pamagmaneu na
caras king masala, cari’na apuna,
kilub na ning side car, ala ne ing matwa’
“ini na pin ngana, ing cacung amanuan”
a ken mu mang lub na, asabi nang myuman
e nacu manatad, baski pa capilan
ngana pa uli ning, cayang aranasan
king sobrang tacut na, cayang apibalac
cari’ne manaya, a magpatiabac
e pa bisang muli, cabang e macaslag
ing aldo king lugal, nung nu ya linabas
cauli na bale, misdan ya i doru
uling king carela, daca’la ring tau
e pa man mitipa, ketang mutorsiclu
seganan da ne ring, bisang mag-usyosu
balu yu na ata, ing cacu milyari’?
ing kitang nang Dorung, medyu ayli-ayli’
caretang disa’na, pagmaragul niti’
a legen de canung, ticbalang at capri’
ing pasaerus a, canacu sinake
mecad ngana abe, de ring maglalage
calagpus cu ketang, carinan ding mete
ing pasaherus cu, ngana mebating ne
bigla yang sinulput, ing babaing matwa
busal da ring taung, makiramdam caya
Oini! apin ini, tindanan ke lupa
ing menatad cacu, nanding ala una’
catulid mi ngana, ketang cabusantu
penerit ne itang,!cayang mutorsiclu
uling gurul gurul, oyta menabu cu’
inia megasgas cu, intud ampon sicu…
Vhelle V. Garcia
June 29, 2015
Abu Dhabi
