I TATANG KU

Posted on October 25, 2021 by Kate Lapuz

Para pu karing anggang TATANG babie ku ing kapurian MASAYANG ALDO NING KEKONG PANGATATANG….

pakisabit ke pu ining gewa kung kawatasan tungkul kang tatang kung kaluguran…
mayap a abak ngan pu kekayu

Meragul kung king lele ka ala
Alang pisumbungan neng gagaga
Uling eku milipat king sapa
King bagting ning bale alang gawa
Para king bagyu e ya miragsa.

Karing kakyalung mainggit kung tutu
Ding tatang da, bale atiu la mu
Makialung karela’t makibiru
Makipulayan, makisaglulu
Tutuki king perya’t magbebetu

Misan keng sarili, ngaku wari
Ot ing tatang ku eya mumuli?
Keyang pamilya makakawani
Mas buri napa bunduk mapali
Kesa keng akayabe lang suli.

Pitu kung banwa ‘nyang ikit daka
Bengi pa istung miyabe kata
Atad sundu kami king gareta
Magpanpan karing masalang mata
Potang aldo ume neng paynawa.

King murang isip pilit intindyan
Ot atiu ka king anti’ng kabilyan
Ing prinsipyu mung tatalakaran
Sumaup karetang mangaylangan
Ing gubyernu keka yang kelaban

Bie mu man e meging ordinaryu
Mapali karing mata ding tau
Dakal ka selese buskaraydu
Karing baryung apupuntalan mu
PAGMARAGUL KUNG IKANG TATANG KU

Pauli ding taung utak panas
Ing bie mu kingwa deng e pa oras
Lalam eran inawa mu mitdas
Anggang ngeni atiu pa ing kaplas
King pusu ku ing sakit kakablas

Nyaman atang dagul atin tatang
Manantabe keka king kakeinan
Sumabing anak ku agyu mu yan
kanyaman atang pakiramdaman
Atiu king siping ing kekang TATANG..

Sinulat neng Babaing Matun 6/15/2013

Posted in PL Kate Lapuz, Poeta Laureadu | Leave a comment

Hayyyyyyyyyy…!!! Enrolment Na Naman

Posted on October 25, 2021 by Kate Lapuz

Sinulat Neng Babaing Matun 4/19/2013

Enrolment na naman panaung gastusan
Pengari dudurut nung kenu la mandam
Agyang 5’6 ya pa karelang sulungan
apagaral la sa anak dang kalugdan.

‘tin kung kakilala ustung enrolment na
Nung kulang lang tipun buntuk sasakit ya
Obra keni’t keta mag-obertaym ya pa
Ban nala’ng abuu perang gamitan da.

Lalu na private la ding pipagaralan
Nung kulang la’ng pera buntuk gagamusan
manyad nang baldugan ban e kabayatnan
Oneng ita mu pin dagul ing bayaran.

E pa ken mayari itang kasakitan
Kaibat ning enrolment sadya gamit naman
Bag, sapatus, notbuk, pati pa imalan
Anggang e ngan mi’atsu alang kapaldanan.

Inya kekong anak sablang papagaral
‘Yang pamagaral yu dinan yung masabal
Keng kasakitan da at karelang pagal
Medalya ing ablas sabitan la batal.

Posted in PL Kate Lapuz, Poeta Laureadu | Leave a comment

O Come All Ye Faithful

Posted on October 25, 2021 by AnacArenas

Tara, Talasalpantaya
(Tune: O Come All Ye Faithful)

Talasalpantayang
Balen Kapampangan
Tara na, tara ngan kekata yang samban
Tara yang saksian
Ing Ari ning Lelangan
O tara tayang samban
O tara tayang samban
O tara tayang samban
Y Kristung Guinu

Angeles dalit na
Purian yeng pagkanta
Sablang daramdam keng Amanung ‘bat banua
Bie ya kang Ibpa ing kekatasang Gloria
O tara samban taya
O tara samban taya
O tara samban taya
Y Kristung Guinu

Siklaud ta ngan
Keng aldo nang beitan
O Jesus kapilanman Ika ing samban
Anak nang Ibpa, mikatawan yang laman
O tara tayang samban
O tara tayang samban
O tara tayang samban
Y Kristung Guinu

— ooOoo –

© Anac Ning Arenas

Posted in Anac Ning Arenas, Kantang Pamasku | Leave a comment

Tibu – Saudi Boy

Posted on October 25, 2021 by OFW Worker


Overseas Filipino Worker ya i Tibu king Saudi. Bayu ya pang datang keng obra na. Ing mamanewan nang makinarya pangulkul yang gabun keng lele ning dagat. Minta ya keng Saudi ba ya kanung makatipun pagumpisa keng kayang pamakiasawa. Balu mu na, panggastus keng kasal, pampatalakad bale, panyaling kotsi. Aba, marakal-dakal a pera ing kailangan nang Tibu para atangka na ngan ing buri nang itangka.

Karatang nang Tibu keng Saudi, mumunang aldo, dela re keng ospital para medikal tsekap. Pepainum de kanung aduang tabletas bayu de inumpisan tsekapan. Kitang na nung para nanu la reng tabletas. Sabi na ning magpainum a lulupang tau India, basta inuman ne mu. Standard procedure, ngana kanu ning Indian. Ininum na neman bang kanita ala nang pisasabyan pang malambat.

Kaibat nang me-medikal tsekap tiglus da ne keng obra na i Tibu. Dakal lang Pilipinu reng disan na keng obra. Karpinteru, elektrisyan, tuberu, warehouse man. pati keng malating upisina atin munaman accounting clerk magpasuweldu kareng Pilipinu. Agad yang kinayan a lub i Tibu keng karakal na balung pakisabyan.

Posted in OFW | Leave a comment

White Christmas

Posted on October 25, 2021 by AnacArenas

Ing Paninapan Kung Pasku
(Tune:White Christmas)


Ing paninapan kung Pasku
Anti ring sadiang balu ku
Marimlang anging mabanglu
Masayang kanta king radyu
At ing imalan kung bayu.

Koro:

Ing paninapan kung Pasku
Pane paninintunan ku
Masaya la reng ‘gang tau
Makule ya iting yatu.

Ing paninapan kung Pasku
Anti iniang malati ku
Manyamang dakal a putu
Kalame, suman, bobotu
At suklating sidsad yumu.

Ulit Koro:

Ing paninapan kung Pasku
Banua-banua aiisip ku
Manyiklod keng tegawan ku
Kang ‘Ma at kang Tatang ku
At dakal a aguinaldu.

Ing paninapan kung Pasku
Pane paninintunan ku
Payapa ya iting yatu
Manalig kang Jesu Kristu (fade)…

         -- ooOoo --

© Anac Ning Arenas

Posted in Anac Ning Arenas, Kantang Pamasku | Leave a comment

“TUNE CAPAYAPAN”

Posted on October 25, 2021 by Orly M Dizon

-neng ORLY MANALO DIZON
Orthografiang: C-K (ca,ke,ki,co,cu); Sucad: Labingadua; Sep. 2018

1
Ing pamanenaya malambat nang tutû
Ding tau saua no king puru pangacû,
Inia dikil Ne ing gubiernu Nang sugû
Keti Pilipinas ya’ng geua nang paindû.

2
Ausan la pansin ding biasang magmasabal
Ing calusan do ding masucal a lugal,
Ampo retang batas a dapat pairal
Ban ing capayapan king bie iyang gusal.

3
Inia marapat ding sablang manungculan
Kimut no’t paliran dinat dang catauan,
Detang mangatamad pane king tambayan
A panan mung datang ing ning paugtuan.

4
Dapat at sucat mu itamung memalen
Pakisugid tamu at masusing lauen,
Nanu ing asaup antimo ing banten
Ding mal tang carinan king nanu man crimen.

5
Agiang ing gobiernu atin yang upayâ
Gauan itang dapat king ban apauagâ,
Ding mangaroc bisyung king tau sisirâ
Balen antimurin ya na ing magcusâ.

6
Cabang maliliari iting pamagbayu
Ibie ing supporta king gobiernu tamu,
Pane lang matyagan trapong puliticu
Ban e madiscaril dalan ning asensu.

7
Mayayakit ngeni nung nanung agauâ
Na ning mamuntucan a tune maminguâ,
Caretang memalen maluat nang magnasâ
Mangatsurang bisyu lubus nang maualâ.

8.
Payapang acakit caring panimanman
Ding mayap a bunga ning pamanungculan,
A masalang lalto king banda aslagan
Itang aduan tamung TUNE CAPAYAPAN..

Posted in PL Orly M Dizon, Poeta Laureadu | Leave a comment

Apolinario Mabini

Posted on October 25, 2021 by vhelle garcia

Metung ya karing bayani, king kasalesayan ning bansâ
Mekilala’t, mitaguriang, paralitikung dakilâ
itang kayang kapansanan, e sumbagal ban masagkâ
ing nasa nang katimawan, karing gamat ding kastilâ

Ing La Liga Filipinang, belangkas nang Jose Rizal
iniang mesukul ya iti, ri Mabini ring tinalan
kambe na ning bayani pang, i Marcelo H. del Pilar
at Domingo Franco bilang, pamuntuk na ning aguman

Kanitang i Aguinaldu’ing, kekatamung presidenti
gewa neng pun ministru i, Apolinario Mabini
pasari ning kabiasnan na, at masampat a diskarti
megi ne pang talapayul, king nasa nang gawan niti

Matni ya buntuk nung inia, utak ne ning rebolusyun
a misulat batas para, king minunang konstitusyun
sana ing meging ambag na, gawan tamung inspirasyun
lakwas na ring manungkulan, king salukuyang panaun

Mas buri ku ne ing taung, miki- kapansanang ditak
a mesakit, uling atin, yang pag-asa pang kumayap
kesa karing manungkulan, a sasabian dang mabulas
a matuling naman pusu, mapanako’t alang utak

Pilinan kong manungkulan, ding kalupa nang Mabini
agiang makalukluk la mu, king karelang tabureti
atin la sanang prinsipyu, ampon matni buntuk deti
e kalupa karing tau, a kautak lango berdi

Pablasang ding pulitiku, a kautak berding lango
nung nukarin ing basura, karin la mamanyulapo
sasangutan da ing buluk, nitang dinat a sisingo
inia ring kaisipan da, magadtu at mebantilo

Pepatutuan nang Mabini, e sumbagal kapilan man
ing pisikal a aspetu, na ning metung a katawan
pekamaulagang dili, malino ta kaisipan
King ban tamung managumpe, king mayap a kapakayan…

Vhelle V. Garcia
October 24, 2021
Abu Dhabi

Posted in PL Vhelle Garcia, Poeta Laureadu | Leave a comment

Casuyuang Pacayap

Posted on October 24, 2021 by Fr. Ronnie Cao



Panalangin para king Capaldanan king Adleng Acrostic
neng Among Cao

Posted in PL Fr. Ronnie Cao, Poeta Laureadu | Leave a comment

Kakaluluan mu Indu ku

Posted on October 24, 2021 by Maria Sinucuan

Kakaluluan mu Indu ku, O Balen kung Pilipinas
A ketang makadua napun, keting Aslagan ikang Iyas
Ketang napung ding anak mu, ika mu ing pakipalkas
E na bala ing mate la nung yaslag ning kekang bukas

Pilan la ding probinsiya mung manungkulan Gobernador
Dapot pilan ? adua, atlu yang e sarili papabor ?
Pilan lang munisipyu mung panungkulan da ding Mayor
Adua la mu atang lagyung daramdaman kung mabalor

Kasakit nang pakintindiyan ing kalulu mung kabilian
Nanung klasing sumpa kaya migmula iting kaparusan
Uli kaya ning leguan mu’t mabandi mung kalikasan
Migselus la detang pati karin biga manuknangan ?

Aintindiyan ku nung ing metung o adua meging taksil la
O detang dosena kaya, aduampulu, aintindian pa
Dapot walumpulung Gobernador ding kekang probinsyia
Libu’t limang dalang Mayor, antalu ding konsiyensyia da ?

Beinti-kuatru mung senador, bakit e ku daramdaman
Mamingua queng saingsing ning daralan mung kasakitan ?
Aduan-dalan anampulu’t-walung mayap mung Congressman
Pilan la ding tapat keka, paglualu ing kekang dangalan ?

At detang kekang usgadung keng ustisiya mu maningat
A nung ninu king huwisyo da uwaran sa king katapat
Bakit keng daramdaman ku penganyaya da neng sukat
Ing timbangang piring-mata, kenuman sa e sapakat

Maging yan mang Comelec mung talatanud mung alalan
A nung kenu me penuala ing sagradu mung pagbotuan
A nung ninu kaninuman e la dapat mangabiran
Obat keng kakung balita, mepisali n’ya mu naman

Dapot lubus kung lulungkut, sepu na ning pagsalbat ku
Yang magiwan mung pamuntuk, anak ning Indung Tibuan ku
Yang nung ninung karing sabla, aintindiyan neng kabilian mu
Nanung katimbang dang bandi, ding kabalen at Balen ku ?

Posted in Poetisa Maria Sinucuan | Leave a comment

GAMAT

Posted on October 24, 2021 by Kate Lapuz

Sinulat neng Babaing Matun 5/26/2014

Dening kakung gamat nung kumpara ku la
Mengari lang basan kuskus keni’t keta
Nasa nang kumintab ding malda’ing dalan da
E na paalata… ‘gyang misakitan pa

Ding gamat a reni mengapal menabtak
King kakagambul da king gabung mengasias
E da man sikasu ing sakit at kaplas
Agyang dadaya la king suksuk metarak

Palad a magaspang kaku lang lalawen
Karing tanam dayat bata dang babanten
Bagutan ing dikut, king danum sesesen
Ban ating pupulan ding kayang memalen

Ngeni ko pagmasdan dening kakung palad
Ala nalang lambut ume nang kinupas
Deni mang gulis da e no ayaninag
Ing malino namu ding kalyu at sugat

Agyang nanung obra e ku’iti atrasan
Ma’pa-opisina agyang king dayatan
Lapis ya ma’t papil, ‘gyang sarul ing talnan
Gawan ku’ing agyu ku ban akwa’ing parasan

Agyang makanyan man pagmaragul ku la
E la man malambut, kutis porselana
Agyang magaspang la antimo ing liha
Dening kakung sapni apakabsyan kula

Deng lalaki ngeni malagu’ing pantunan
Gamat a malambut, manyaman aplusan
Labanus a balat, makorting katawan
Bahala nako sa ala kung pakyalam

Babie ku ing atul kekayung babasa
nung na’ng asabi yu kening kakung paksa
nung sabyan yu kaku e tutu’ing simbitla
meko keni ngeni mata’ing magsalita

Posted in PL Kate Lapuz, Poeta Laureadu | Leave a comment