Capampangan

Kabang tatais ke ing kakung panabud
Ikwa kung mesugat king gamat megayud
King pamamalagwa mepukpuk ku king tud
Asna king kasakit maybug kung gumuyud

Kilub ning aldoldo kakung pamagsane
Ikwa keng agamat mebyasang malale
Matabas na’ing dikut keta king marangle
Ding traydor a bingan lisya na’t maglele

Peynawa’ing katawan kaybat kung mindaras
Uling ketang pagal digsu ku mibatbat
King metung libluban mitakid, mitalpak
E pepaynan ing lub ‘gad kung tinalakad.

Ing aslag ning aldo king dayat manduluk
Dakal e misadsad karetang mayna lub
Myaliwa lang lasip ding karin dudurut
Manyabat keng dalan keka mamatakut

‘Yan alang keliwan king babaslen tang bie
Ding malutu pusad at byasang makyabe
Ilang sunlag kinang dyamante mong tune
A ngeni apusan gewa rang talete.

Uling nung bisa kang miras king parasan
Saganan mu’ing angin king mitmung tetagan
Nung e ka matatag pilmi nakang dalan
Busal ning pagmalun king karalumduman.

Ing karalumduman nung makapadurut
Aslag na ning bulan panayan mung lunsut
At sala ding batwin yang keka lumukub
Kanita mantabe king kekang panudtud.

Kekatang daralan nanu man kabayat
Maging mayan iti nung malda lang bubuat
kalugdang pamilyang kayaduangan gamat
E matatdang sala, babie rang malablab

BABAING MATUN 10/3/15

Mignasa yang linibutad karing tatanam marangle
Dinamput karing sinabud agyang e byasang gumile
Anggang mabagal yang lakbang pekikuanan nang milele
Uling meyama nang ikit ing masayang pamiabe
Mekisugu ya’t mek’yagum megaral yang makibage
E ya meynip e melambat karing turu da mipande

Daka’la ring migtas kile inyang keya na nang bignus
Itang anggang abalu na e da ayabut atarus
Keta kanung palsuneru mebisang piutus-utus
Ban potang dadara nala makirake ketang unus
Pati pinulut nang pale ikwa king pamamalusbus
Ginuyud da king libluban lislas de’ing saku at bilus

Peganan da’ing pangabrusku sebatan de ing lakbangan
Pituya-tuya de pa pin ketang kayang pupusanan
A metung kaban a sepu, igu, bitse at pinuman
Sera de’ing pidadalanan karing masuksuk a kwayan
Dapot e ya peysira lub piglako na itang arang
King takut e ya peysukung maragul la man katawan

Angga ngeni e tinuknang durulung ketang marangle
Sasaup yang mamanulip, sasarul ampon manaswe
Maglinis karetang lawas at makyabe mamatangwe
Mandaras karing pilapil e na iti pikarine
Gagawan nang laus king lub e king galal o king pugue
Susukdan nemu’ing sarili nung nu ya angga katibe

Babaing Matun 11/24/15

Nanu ya’ing kabiasnan? ipagmayabang ya? Ali ya kapatad!
Inya taimik ka, bustan mo reng tau, ilang keka sukad
Itang tune biasa, e ya magparagas, e ya palpibulad
Karing kabadbaran, lalaban yang patas, e paypaling agad,
Ding kayang amanu, mapinu’t masampat, yapse nong banayad…

Ding tune mabelwan, e detang matas lub, e bisang paysambut
Malualas la isip, itang panwala da, e makabaluktut
Panuyatan da pa, ing anggang katutuan, at kaybat la kimut
Kanita manawang, akwa ing kaburyan, ban e la masambut
Karing kapate da, e la benggatibu’t lalaban pagulut.

Ing matas a belwan, e ya magmayangin o magsasamais
E ya sasalingku, lalagpas, tatalpak ketang ating gulis
Biasa yang taluki karing ustung dalan at e tatalilis
Karetang tuntunan a makamatulid ampon makasunis
Kanita malagwang kamtan ing paninap, payapa’t mabilis

Nya keka amun ku, pakit mung biasa ka, lugud kang kasalang
Marap king prublema, lako’ing kapanyiran, e ka sasalangsang
Nung ditak nang bage, manupaya naka’t e na gagalanggang
Karing ma’p a dapat, manantabe ka at keka lang igalang
Ban detang kayagum matula la keka’t ing GUINUNG miglalang

Babaing Matun 11/13/15