Capampangan

October 5, 2015 · Lambac, Philippines

8 estropa, 6/6 sesura, 4 linya

I
Ing baryu Concepcion ‘yang kakung beitan
Igkat da ring bitis karin mipapasyal
Karetang tatanam keta king libluban
Mibalik king diwa’ng  kakung kayanakan

II
Pakaruku la ngan sasakmal sinabud
Karelang abitan keng burak tutusuk
Ing balang likwan da masanting a dayus
E la man manikal king panga baluktut.

III
Pane ngang payatras ing pamanakbang da
A babagaya’na nitang gitarista
Ustung bibilis ya bagting ing gitara
Detang makitanam misasaglulu la.

IV
Itang mandarul dang atyu mamatyawan
Piatu-atu na ing karelang obran
E mibata’ing metung kayang pekibatan
Ngana, e pu ustu ing tuturu yung yan.

V
Balu ku pu ngana ing mandarul kayu
Dapat kekeng tukyan ing balang utus yu
King akakit ku pu e ko maka-ustu
Kekong panupaya nung magmatulid ku.

VI
Mimwa ya’ing mandarul nya gilisaka’ne
Nung eka manwala …. king kakung patnube…
Sulung! mabating ka… lakwan mu ku abe.
Itang makitanam meko yang malumbe.

VII
Inyang malaut ne sinaka la naman
Detang kayabe na likwan da’ing tatamnan
tinuki lang meko detang kakuyugan
Ing maling turu na e agyung ayamyam

VIII
Detang makitanam inyang milaut la
Mamatyawa’nya mu itang mandarul da;
Nanu mang desisyun nung manimuna ka
Bayu mu pairal isipan me sana

ING BABAING MATUN 10/4/15
Balen ning Mexico

Misan maglakad ku pampang kailugan
Kaputut yang dutung kakung atakiran
Mingatba nang sepu atin lang leparan
King banda libutad saktu yang sakmalan
Kaku yang lalawan eke tatagkilan
Nung nang ulaga ning kakung atakiran

Makatalakad ku at pagumasdan ke
Ing atakiran ku nung nanu yang bage
Dinatang ya’ing tau malagwang diklut ne
Ketang kayang bangka mabilis sinake
Saka ketang danum kayang panyabungke
A…. Ita pala ya ing awsan dang bagse.

Kakung aganaka abe king aguman
A meyaus BAGSE na ning kailugan
Itang kayang pusu kitmu yang kababan
Inya manyaup ya karing mangaylangan
Lalung maganaka nung ing pisasabyan
KIng kasaplala’na ning Amanung Siswan.

King pamanyaup na eya mu sasabi
Ing sablang agyu na pagkalub na niti
Nung makataya ya ing kekatang sabi
Agyang malaut ya awsan ne y KWINSEY
Yang kayang tuburan papunta ne iti
Banang bie ing saup king Sulul at Suli.

Akit me I KWINSEY eya man bularan
Lawe-lawe ya mu ampon timan-timan
Ing kayang ganaka king pusu sisimpan
Kalupa na murin nining kayang tatang
Ing babie rang saup e ra na panyabyan
Nya’y BAGSE at KWINSEY kakung pupugayan.

BABAING MATUN 7/30/15

Imbut na namung gulisak/ kanita ing sakit lumual
E na na agyung agwantan / balamu atin sasakal
Inya ketang bandang suluk/ linukluk ya at migsandal
Karing adwang tud sinukub/ siguk siguk yang nginalngal.

Ing Kristal mal pa keng gintu, karing pilak ampon perlas
Butil-butil a dadagus /dapot iti e ing pawas
a e matak kabud-abud / nung e mu taganang maplas
anting agus na ning danum/ masalusung kakalaskas.

Ing bayat atyu king lub na/ binugnus nang alang patna
Tatatap ya ing salu ku / ustung akit keng gagaga
Taimik keng pagumasdan / uling ala kung agawa
Antabayanan ku ne mu/ e lalakwan anggang bina.

E miglambat adwang oras / ‘natna ne ing kayang buntuk
inatyat nala ring bitis /kaybat king bulsa ginauk
Penamulis king lupa na / migsamasan yang linukluk
Kaybat sinabi na kaku/ “e ka muting, e ka buguk”.

Belikdan ne itang lukib / bayu linwal king masala
Minyukle ya at migpolbu / ing milyari anting ala
Inya kaya magbilib ku / potang marap ya king malda
King lupa na alang bakas / king pustura e ulata.

Ing balaku e na mulit / ing milyari kaya napun
Uling kaku mengaku ya / e paytalabu king aun
Kaku e ya mekiramdam /sinake ya ketang bagun
Tiknang ne kalibugtaran / e ne sadsad king istasyun.

Ngeni kaya ing payul ku / misip yang miyamas-amas
E maglungkut, e magmalun/ panyamalan nang mandaras
Linisan ne itang dalan / kabang manaya king oras
Manyilo karing inumang/ balisasa ketang lawas.

Malapit namung mamupul / mamutikas na ing pale
Gawa ne pang tawan-tawan/ ban atin keya malale
E maglambat mamalut na/ ding langgotsing makalele
Tagpian nala detang gisi/ bayu ya dulung marangle.

Babaing Matun 6/18/16

Maligogo la ring tau king krisis a malilyari
karing bangsa na ning yatu a digpa’na niting alti
king sakit e auulu, makamate’t e mipilmi
pauli da ring pulpiaru, miglipatlipat ya iti.

Uling ali la menwala,retang ali mapamintu
mayli lapa ring aliwa, karing manyabing patutu
dakal a bie ring mewala,tauli ra nang apagtantu
king kamalian dang pengawa, maybug lang maspak a salu.

Magparalumpu la ngeni,rening sablang manungkulan
sumaup lang magmantini,king karelang sasakupan
ing utus ning presidenti, sara la ring anggang dalan
karing bale pa magpirmi , alang metung mang palualan.

Misasanmetung ta sana, labanan ya’ng “COVID19”
king sale mu maidatun ka, alang lulual magmayangin
lukuban me ing pamilya, ita ing pekamasanting
king balen suporta ka , king “community quarantine”.

Karing “frontliners” a narsis,”health workers”, “doctors”, sundalus
a manantabe’t mamapis, manulu king “novel virus”
karing palad yu migulis , ikong marap kening signus
gyang king pusu atin aklis ,king “COVID” e painggulut

Duruku mila rening buntuk, payabut mi pu ing salamat
uling e ko papayna lub, agiang ala kayung kabat
ali kayu papatugut, mamastul ampon manyabat
agiang ing bie yu maputut, king tungkulan maging tapat

Karing tanud at kapitan, kang Gobernor Dennis” Delta”
a mimisip nanung gawan, sulusyun kening prublema
ikayu ring guguyabnan, keti mabilug prubinsya
ding kalulung kapampangan, kekayu la mamagasa

Kasagsag I
Maligogo la ring tau
karing bangsa na ning yatu
king sakit e auulu
uli da retang pulpiaru

Uling ali la menwala
mayli lapa ring aliwa
dakal a bie ring mewala
king kamalian dang pengawa

Magparalumpu la ngeni
sumaup lang magmantini
ing utus ning presidenti
king bale la pa magpirmi

Misasanmetung ta sana
king sale mu maidatun ka
lukuban me ing pamilya
king balen suporta ka

Karing “frontliners” a narsis
a manantabe’t mamapis
karing palad yu migulis
gyang king pusu atin aklis

Duruku mila rening buntuk
uling e ko papayna lub
ali kayu papatugut
agiang ing bie yu maputut

Karing tanud at kapitan
a mimisip nanung gawan
ikayu ring guguyabnan
ding kalulung kapampangan

Kasagsag II
king krisis a malilyari
a digpa’na niting alti
makamate’t e mipilmi
miglipatlipat ya iti.

retang ali mapamintu
karing manyabing patutu
tauli ra nang apagtantu
maybug lang maspak a salu.

rening sablang manungkulan
king karelang sasakupan
sara la ring anggang dalan
alang metung mang palualan.

labanan ya’ng “COVID19”
e naka magmamayangin
ita ing pekamasanting
king “community quarantine”

“health workers”, “doctors”, sundalus
manulu king “novel virus”
ikong marap kening signus
king “COVID” e painggulut

payabut mi pu ing salamat
agiang ala kayung kabat
mamastul ampon manyabat
king tungkulan maging tapat

kang Gobernor Dennis” Delta”
sulusyun kening prublema
keti mabilug prubinsya
kekayu la mamagasa

Pilibe lugal
Maligogo la ring tau king krisis a malilyari
uli da retang pulpiaru, miglipatlipat ya iti
king sakit e auulu, makamate’t e mipilmi
karing bangsa na ning yatu a digpa’na niting alti

Uling ali la menwala,retang ali mapamintu
king kamalian dang pengawa, maybug lang maspak a salu
dakal a bie ring mewala,tauli ra nang apagtantu
mayli lapa ring aliwa, karing manyabing patutu

Magparalumpu la ngeni, rening sablang manungkulan
king bale la pa magpirmi , alang metung mang palualan
ing utus ning presidenti, sara la ring anggang dalan
sumaup lang magmantini,king karelang sasakupan

Misasanmetung ta sana, labanan ya’ng “COVID19”
king balen sumaup ka , king “community quarantine”
lukuban me ing pamilya, ita ing pekamasanting
king sale mu maidatun ka, e naka mamagmayangin

Karing “frontliners” a narsis,”health workers”, “doctors”, sundalus
gyang king pusu atin aklis ,king “COVID” e painggulut
karing palad yu migulis , ikong marap kening signus
a manantabe’t mamapis, manulu king “novel virus”

Duruku mila rening buntuk, payabut mi pu ing salamat
agiang ing bie yu maputut, king tungkulan maging tapat
ali kayu papatugut, mamastul ampon manyabat
uling e ko papayna lub, agiang ala kayung kabat

Karing tanud at kapitan, kang Gobernor Dennis” Delta”
ding kalulung kapampangan, kekayu la mamagasa
ikayu ring guguyabnan, keti mabilug prubinsya
a mimisip nanung gawan, sulusyun kening prublema

Sinulat neng Ing Babaing Matun 3/23/2020 6:06 n.b.

January 1, 2014

Ining banwang ayni masanting ya tabas
Abayan pangadi’t isip a malualas
Mangutseru kamu sanang miamasamas
Maninap na ka’ rin obat epa matas
Lumaban ka sa’ king paralan a patas
Ban kanita miras king puntalan ligtas

Ala namang marok king taung mangarap
Nung ing kapagnasan ita namang mayap
E mu sa gagawan itang mandakurak
Uling ing kabayu masikan ya paldak
Karing parang tau eka sa marawak
Ban’ kanita e ka mikutkut king burak…