Iniang malati ku
magpasku kanita
ketang tegawan ku
karin ku pupunta
ding aguinaldu ku
purus la ngang barya
ba ku lang ibaldug
king kakung alkansiya
Maligayang pasko
tegawan ko
yang parating
darandaman ko
ing buri ku sana
balang aldo
kekayu
makipamasko
— ooOoo —
Lorung Malabit
Silaba 16 Linya 4
Parapu 6 Sesura 6/6
*
Teterak ya king pabelu ing api a undap-undap,
mekad nanu mang pinandit mapda ne’t tuknang kukurap.
Eata ing katuparan na ning tagimpan kung malyap,
abe neng milako kalma ning paritang singap-singap.
**
Gulut ning banua at labuad ing malaut tang pilatan,
uling metung kung maluka at anak kang mayakayan.
Mangangas kung isaglawe sa ing maluat kunang simpan,
ipatilip ku ing lugud king malamyus a kundiman.
***
Kalabas ning pamipagkal king salung maina’t magnerbius,
sinukbit ke king pago ku ing gitarang bayung kuskus.
Binitbit ke ing paritan, king bale yu ku tinaglus.
Bala na nung nang malyari aranan dakang malaus.
****
Migpandung ya karing ulap ing bulan a alkus bangkậ.
Lakuas yamung medalumdum ing benging ngeni mitakdậ.
Anya pala migpanpan ya karing mabuktut a bigậ,
e na buri ning bulan ing aslagan no ring kakung luậ.
*****
Uling bayu ko akalbit ding kabud merimlang kuerdas,
ing e ku sukat asaan king awang yu ku atuklas.
Mitatalnanan kong gamat ning kasuyu mung mabikas.
Masasalamin king mata mung lulugud na kang wagas.
******
Agnan king dila ning aping mewala na king pabelu,
tinakas ing kapanayang panilas mu king pusu ku.
King malumbeng pamanuli ring minantabe mu kaku,
ing paritang alang sindi at ing urang meging bagyu.
Rodel E. Gozum
16 Marso 2014
Munoz, Quezon City
Metung a panalangin para king Kapagmasusian ning Ka-7 Dekadang Aniversario ning pangatatag ning Balen Sto. Tomas, king Adleng Acrostic
neng Among Cao
I.
Makapangaklak ing sigla, niting taimik a bengi, alalu dening kuliglig
E patugut gugulisak, gigigit, mipamakibat, maglambitin ketang kitig
Ing kanakung kesanayan, ustung bayu ku magkera, ila deting magpatigtig
Neng oras nang pamamangan, ilang musit kalamunding, manikdik lara king sisig.
II.
Ketang taryan taryan ko pa, agad la deting gagaga, ustung karela milaut
Agyang manyable kung malan, manese ampon maglutu, tatakiki la king gulut
Neng mamalis ku king mula, magprisinta lang manyaluk, ampon mamutput king dikut
Kayari diluan ku nala, isalud ko ketang bomba, amaliran kula gulut.
III.
Neng ibat ku king asikan, kanaku la manenaya, ketang malati ming kubul
Inya neng akit ku nala, ‘ting sinulapo ing pagal, king patingapung sasakul
Milalako itang tikal, karening adwa kung pago, king pamamuat ketang sarul
King taldawa menanaman, pale, mais, milun, pakwan, karela ing abling pupul.
IV.
Ngening melapad no pakpak, king bale e na adatun, daig de pa ing alisus
Saguli misigpo nala, munta keni munta keta, anting itik a mebulus
Potang ating papaobra, sangkan-sangkan lang matudtud, kanita e mo autus
Inya neng magdili-dili, babalikan king diua ku, ketang anak la pang musmus.
V.
Malapit neng magtakokok, itang tatso ketang kural, makarilat kupa mata
Ing radyu king kabuntukan, a kakung pakiramdaman, mepayus nalang magkanta
Aku nang sakub-sakinda king kanakung pipagkeran, a luklukan kening sala
Dapot asno kaba pila, ampon kabagal dalakit, ding bibilangan kung tupa.
VI.
Mesakit ya ining buntuk, king makapakailing lungkut, a e ku naman sasaryan
E ku na balu ing oras, nyang arakap ke ing tudtud, meblangku na panimanman
Ikwa ku pa pin meninap, ding bolang makasalikut, mebasa la ketang uran
Mibabad la at mengalbag, pinulis ko’t pepalangi, ketang malinis a basan.
VII.
Ikwa kung mipabalikwas, matas ne aslag ing aldo, munta ku pa king minangun
Detang kakung papastulan, painuman kula’t pangumpe, king kanan dang patingapun
Mitimpla ku pamung kokua, dinan kung ditak a gatas, bayu dumulung king tabun
Pota sanang sumaka ku, bayu ya mamun ing sala, atiu nalang sasalusun.
Ing Babaing Matun
4 26 2016
King aldoldo pamanuru kekatamung pakiisip
ing turú karening anak itang e la mamalipit
pakikuanang maging mayan, at ali mu pakasakìt
arapan lang mitmung tula mibabata anggang binit .
Uling ustung mebiasa lang mamilang ampon mamasa
mipasno ka pilubluban uling ikua mu ing nasa
balikdan dang anggang angga e mu ika ing matula
anti mu rin ding pengari karela pang paningaya.
Ing dalan ning talaturu anti yang busbus karayum
e masaguling alsutan dakal pagaralang lisyun
nung e ka malutu pusad akua mung mitas a prisyun
karening suling pulpiaru king bayu ta’ng henerasyun.
Ding sapni dang penibala angkaminan talang anak
iulma la karing ustung panugali at pamalak.
*
Ala cu pang male liguran mu nacu
Agiang daia cu pa kilub ning atian mu
Babaligtad dungus uling maglicut cu
E ca sinaingsing giang magsircu-sircu
**
Siam a bulan itang kecang penenaian
Ing baiat at sakit ‘ti kecang pibatan
Alang pamagsisi kacu mu peramdam
Itang kecang lugud a e atawaran
***
Baiu cu misapwac keti king masala
Menigsu na rugu meala cang calma
Uling e mu nanu ing daiang mewala
Karin king uspital nung nuca’ mikera
****
Agiang acakit cu’ing pamagcasakit mu
Binie mu ing sabla ampon sakripisyu
E mu ke peburen icaming anac mu
E daca man dimdam minapse reclamu
*****
Inya naman INANG apse cu’ing salamat
King eganaganang delanang pagsalbat
Canita abie iu ing anggang masampat
Kecayung pegaral, tirung ma’p a dapat
******
Ngeni pu Inang co milaco ing tula
Karing cacung labi a keca migmula
Paintunan ing apis a balumu mala
King canacung salu neng asne cabaia
*******
Ngening ala naca king canacung siping
Manulu ing lua cu ampong sasaingsing
Uling pantunan cu itang kecang lambing
E cu mipatudtud pane’ing cacung biling
********
Inia keca inang ing cacung pangacu
Icaming anac mu ibie mi ing suiu
Carening capatad calupa ning turu
Caring anak mi at kecaming kasuyu
*********
Agiang pang masakit ing pamaglaut mu
Mebawas ing sala ketang bale tamu
Dapat cung tanggapan kaburian ning Guinu
Ing lugud cu keca e na ‘ti magbaiu
Babaing Matun 1/13/16
O balen kung tibuan, keti king masala
Mibangun naka sa king palyasa’t lugma
Kalagan me’ing lubid a keka sasagka
E naka paysilo karing gintung laksa
Ding malating sanga a gewa dang padrun
Kaybat dong nebangnan nigse na king gabun
Misan dana likwan ,ginulut e memun
mipaburen na la mikutkut king aun
king pangakukut mu galo mo ring bitis
‘gyang bagya bagya mu keka lang ipildis
palto kang masikan tuknang nang manangis
pulisan ing lwa mu king panyung malinis.
Talnan me ing pluma ipinta me’ing bukas
Kule pinanari king banwang malwalas
ipayid me’ing brotsa antimong magkumpas
anggang king akwa me ing buri mung kabas
e ka bisu bisu sipatan mong mayap
E balang manago at keka magdulap
magsulud maskarang anghel a mangayap
tutu ing nasa dang papakit a lingap
ing pamagkamaling depat mu kanita
e na pasibaywan tulid mo ngeni na
ding maling disisyun nung pakasuman la
ilang migpakutkut keka king palyasa..
E naka paysupil karing dapung dakal
ilako ing takut at e na pasakmal
Balen migising ka ,palto kang marangal
Pakit mu ing lugud king Indu tamung Mal
Atiu kami keni keka manantabe
E da ka paburen ngatngatan ding ane
Banta ding asias mu ela mamanuge
Laruan lang matuling ban lalung tumibe
Babaing Matun 10/13/15 Edited: 10/18/15
Lorung Malabit
Silaba 12 Sesura 6/6
Taladtad 4 Estropa 9
*
Alak ing abe ku, neng bangal ku pusû,
king pamanangis ku, iya ing manarû.
Iya ing darame, neng gabak ku salû,
at iya’ng kakawat, king lua kung tutulû.
**
Karing balang ukuk, apapakayan na,
ing bayat a maybug, ku nang e adala.
Maski kapilan man, anggiang kanita pa,
abayan naku king, pinandit ning dusa.
***
Ustung lumukub ne’t, mag-ari king diwâ,
ing balisang isip, agyu neng ilisyâ.
Ing katutuan kaya, yang apipirayâ,
sasalikut na ban, e ku aganakâ.
****
Anggiang tipunan ku, mu ing tagantagan,
saupan na ku mu rin, at antabayanan.
Sumuka ku man at, magkasat king dalan,
e na pikarine’t, e naku pandirian.
*****
Anggang atin ku pang, kaya ipanyalî,
e naku batingan, ampong itabilî.
King salol ku akua, ku man mangapalî,
e naku gulutan, at e ya payalî.
******
Dapot ing alak a, kakung kaluguran,
o bat ngeni e ku, ne apanaligan.
Migbayu ne yata’t, kelinguan na na ngan,
ing pami-abe mi, king mengalabasan.
*******
Uling ibat aniang, king bie ku memun ka,
ban e na magbalik, king sale ta sinta,
mewala nia kabud, ing ispiritu na,
mengari niang danum, a matabang lasa.
********
Petuki ne yata, king pamaglako mu,
ing ispiritu nang, migtaksil kanaku.
Uling ngeni anggiang, kaya maglumud ku,
ing kaplas at pait, e na a-uulu.
*********
Ala neng ulaga, at ala neng silbi,
anggiang inuman keng, abak anggang bengi
ing katutuan e na , na agyung ilili,
a king kanakung bie, ala na ka ngeni.
PL Rodel E. Gozum
03 Septiembre 2019
Munoz, Quezon City
