Penibatan – tehko
Lenguahi – Chinese
Kabaldugan – pitsil tsa o kape
Ingles – teapot
Agkas: tEkuan
Ing katayang “tekuan” salita yang menibat keng bansang Tsina, a dela ra keraklan deng Intsik a makipangomersiyu keting nacion Capampangan bayu la pa dinatang deng Castila, Japon, ampong Amercanu.
O Bunduk Arayat banten me’ing Baryu cu
nung nu cu mibait, myalung, migbaintau
ala nang aliwang lugal meto yatu
maliaring malili queng pusu’t isip cu
Ing lugud cu queya, baryu cung Arenas
lugud que mu naman, balen cung Arayat
Amanu kung Sisuan, bansang Pilipinas
sintang cacung dalan angga man qng wakas
Baryu cung Arenas, lugal yang pigpala
libutad marangle, ing bie mapayapa
timnang atbu’t pale, gabun nang mataba
caring Ortelanu, bie ning Mayupaya
Penibatan – kerekot
Lenguahi – Bahasa
Kabaldugan – mapanako
Ingles – crooked finger
Ing katayang “kurakut” balamu menibat ya keng salitang Bahasa, a sadya rang amanu ring ninunung Melayung dinatang memalen keting nacion Capampangan.
Penibatan – caballo
Lenguahi – Espanol
Kabaldugan – horse
Ing katayang “kabayu” menibat ya keng dayuan a salitang Espanol. Keraklan, mangabaldugan a ala la pa mekad animales a kabayu keng balen Capampangan bayu la dinatang deng Castila. Nung inya andam yang salita ing gagamitan.
(Tune: Silver Bells)
Taga-baryu, kabalenan
Bayu ngan imalan
Ing angin mamalitang kapaskuan
Masaya lang kayanakan
Sabla makatiman
Balang kantu yang darandaman;
Pasku na, Pasku na
Pasku na king Kapampangan
Pasku na, Pasku na
Maligayang Kapaskuan.
Magbitinan,
Kareng awang
Parul lang sinuluan
Mialiwang
Kule magkindatan;
Kagulutan,
Keng dapugan
Ding mipagkuwentuhan
Yang karela mu ngan
Dandaman;
Pasku na, Pasku na
Pasku na king Kapampangan
Pasku na, Pasku na
Maligayang Kapaskuan.
Maligayang ….. Kapaskuan.
© Anac Ning Arenas
Aru, alalan na naman
Umpisa nong magalputan
Deng kandidatung batikan
Upisyu ra neng pigawan.
Ya nang obra dang tatagal
Balang alalan gugusal
Kalput da nama’t misandal
Yang sikasu ing garapal.
Deng limput todusan mo ngan
Prubinsiya, ciudad o balian
Angga na keng baryu pin man
Ing puntirya kualta mu ngan.
‘Giang bagya la pegaralan
Bakit da mo pangangasan
Keng karitak na ning beluan
Nan mong agyu rang pangawan
Ding kandidatu menasa
Pimamanan da niyang gewa
Apu, tatang, bapa, ima
Pulitiku na lang sabla.
Itamu namang magbotu
Nanung pamanyaptan tamu?
Balu ta ne sa mong bobu
Sikat ya sa amen tamu.
Purbadu nong alang kuwenta
Pilmi lang magpakakualta
Dapot nanu ing birtud da?
Ot kabira palput ta la?
E ta na rugu mebandal
Alang ababalung aral
Basta sasali yang alal
Ala sala yang garapal.
Abak bandang alas-sieti
a-otsu ya ing Oktubri
makagareta ku, oini
dulung marangle, tureti.
Dakal dudulung dinalan
paka-gareta la naman
munta ketang magpatanam
maki-sugu keng sarulan.
Metung maka-garosa ya
baintau yang kukulyut na
punla la reng kayang darla
siguru pasinabud da.
Detang linabas tatanam
paka-giris la imalan
babai’t kalalakinan
maglakad lang agnan-agnan
Ing mandarul e re abe
mekad ta na pang magkape
pota datang neng kayabe
ning patanam pekisake.
Abak bandang alas-sieti
a-seis ya ing oktubri
makasake keng bus oini
muntang obrang tutureti
Dakal nang saken keng dalan
keng trapik layts tiknang la ngan
lakad kaili, kaibat wanan
daretsu na ke man puntan
Ing signal berdi ne kule
linakad keng malumane
atin keng bus stop sasake
ing magmanehu tiknang ne
Linabas pitung minutu
pitu kaming pasaheru
minandar na keng daretsu
meluwalas na ing trapiku
Keng istasyun tren ke minta
ing saken karin linub ya
medyu maranun-danun pa
lukluk ku pang manenaya
Malugud ta ya pung pakilala at sasaganan mayap a oras ing bayu tamung Talasulat Capampangan – Mj Galang.
Malaus ka, Mj.
https://capampangan.whereishome.info/wp-login.php
Masican ing bagyu, ing uran papaspas
sisyuc, sasabeung, angin a malisuas
ding bale’t tanaman, disan dang tampalas
casulucang-suluc, mirasnang laganas.
Miglapo lang ilug, mibugnus lang dique
minagus queng dalan, limbug qng marangle
pati bulubunduc, tinagusgus lele
singil ning panaun, dacal pemayad bie.
Ing datang ning bagyu, bigla ing urada
saquildap nang layas, ya ing panyatang na
nung nanung salese, nung e migbisita
yang cagutgutan na, caibat mendisgrasya
Ding bale’t tanaman, mipayid la ticdo
tau at animal, menucyat la babo
ding alang pispatan, mimin lang ginato
ing mua na qng lulam, tinabug yang aldo.
Gulgul ing ecsena, sumami ing bista
paldas ing paligid, malumbe ing tanda
nucarin la tucnang, ding baleng memun na
pali’ng paniglon ding catawang marimla.
Metung ya’y Amung Greg, biniru ning albug
qng queyang tucnangan, sinapa yang ilug
sasalpantaya man, e lingad ing carug
bista man tetag ne, quelame ne ing lub.
Nganing mag-tricycle, “Amung George, tara pu
quetang medyu matas, magbacwit ta pamu”
dapot nganing Among, “queni na cu itu
e na cu pabustan, Dios ning Pacalulu”.
Miras ing pinandit, titas pa ing danum
manucyat nya naman, pababo y Amung
oini na ing magdyip, queya sasalusun
dapot nganing Pari, “qng Dios cu magsantung”.
Tinas pa ing danum, e tila ing uran
sinampa ne’y Amung, pasamanung awang
pina-pinandit pa, oini’ng mag-amphibian
dapot ngana, “ing Dios, e na cu paimbursan”.
Alang patnang uran, lalapo pang danum
ing abut ding mata, laganas nang bubung
ating paginaquit, pangadi nang Amung
“Dios cu, antayu pu, pengacu yung canlung”.
Saguli, dindam ne bibiyung sasandirit
oining elicopter, queya ligid-ligid
queng “mike” ning pilotu, cuculyo matimid
“Amung, tara na pu, sagmit co qng lubid”.
At ume ya’y Amung magsinyal pailacwan
panalig na qng Dios, diyan neng caligtasan
iniang cabud-abud, alang capiadyan
dagundung yang bosis, banua menibatan.
“OY, GREG, UTANG A LUB, TUQUI NA CA CANYAN
OT NANU PA DUGU ING QUECANG PANAYAN?
PEPADALA CUNG DYIP, TRICYCLE, AMPIBIAN
BURI MU PA ATA, QUECA CU PANG TIPAN”!
01/10/2009
pugue ne pu ning malucang,
Anac Ning Arenas
