O Holy Night

Posted on October 14, 2021 by AnacArenas

King Bethlehem
(Tune: O Holy Night)

King Bethlehem, sinlag ya itang Tala
Tulid nitang Sabsabang maluca
King aslag na kitmuang Banal a sala
Papuri king Bingut a Dakila
Dinatang ya, lubas king Kaupaya
Ban ing Yatu, subli yang mipala.

Siklaud ta ngan,
Anak a Kapampangan
Ngening Kapaskuan
Ing Anak king Sabsaban

Dinatang ya, ban salba ya ing Yatu
Keng kesatan nang Labak ning Disgu
Atbusan ne ing Lelangang kalulu
Bang mikabyus keng Kuku ning Diablu
Dinatang ya, mikatawan yang Tau
Kang Birhen a kigli ning Spiritu.

Siklaud ta ngan,
Anak a Kapampangan
Ngening Kapaskuan
Ing Anak king Sabsaban
Agnan, agnan
Bie tamu ing kapurian

King Bethlehem, sinlag ya itang Tala
Tulid nitang Sabsabang maluca
King aslag nang kitmuang Banal a sala
Papuri king Bingut a Dakila
Dinatang ya, lubas king Kaupaya
Ban ing Yatu, subli yang payapa.

Siklaud ta ngan,
Anak a Kapampangan
Ngening Kapaskuan
Ing Anak king Sabsaban
Agnan, agnan
Bie tamu ing kapurian
Agnaaan, agnan
Kang Jesus, siklaud ta ngan.

© Anac Ning Arenas

Posted in Anac Ning Arenas, Kantang Pamasku | Leave a comment

Upaya

Posted on October 14, 2021 by AnacArenas



Penibatan – upaya
Lenguahi – Bahasa
Kabaldugan – ka-agyuan
Ingles – capable of
Agkas – upAyA

Ing katayang “upaya” original deng salita reng pipumpunan tamung Melayung dinayung mantun bayung karinan ban magpanibayung bie at perminenting panuknanganan. Ikit da keting nacion Capampangan. Ing keyang sadyang kabaldugan e masyadung migbayu buring sabyan.

Posted in Anac Ning Arenas, KatayaOlogy | Leave a comment

Mangapampanggan Tamu

Posted on October 13, 2021 by AnacArenas



Deng mangasipag, mangatiyaga, at mangasanting lalaking Kapangulis Boys, mamaskil karatula kareng posti, bakud ampong pader king Malino, Mexico.

Parti na ning “Project: Mangapampangan Tamu 2011”, mabilug Pampanga.
Penimunan at penibalan ning Pampanga Language Council, kayantabe ning Holy Angel Center for Kapampangan Studies, at keng maragul dang kasaupan ning Kapangulis group ampon aliwa pang volunteers.

Ginastusan da (P167,000) reng mapilan a Kapampangan donors keng “Academia Ning Amanung Sisuan” (ANASI), ampon kakaluguran ding miembru, a magmasabal keng makatibing kabilian ning Amanung Sisuan keng pangakalinguan keti nacion Kapampangan.

Posted in Anac Ning Arenas, Project: Mangapampangan Tamu | Leave a comment

Pasku Na

Posted on October 13, 2021 by AnacArenas

(Tune: Jingle Bells)

Munta king balen
dyip yamung sasaken
papunta king eSeM
abe la reng bespren

Dakal a magtinda
maski ditak mu pera
masaya na ring munta
abe la sa ring barkada

Koro:

Oy, Pasku na, pasku na
nananu ka pa  
maski na alang pera
mabsi la sa ring mata
(2x)

Napun malungkut ku
mesisanti’y Tatang ku
makananu ing Pasku
ala kung aginaldu

Dindam ku keng radyu
inulila ning bagyu
mengabulag at lumpu
ayba, pala kasuwerti ku

Ulit Koro:

Oy, Pasku na, pasku na
nananu ka pa
maski na alang kuwalta ….
atyu sa ing pamilya!

© Anac Ning Arenas

Posted in Anac Ning Arenas, Kantang Pamasku | Leave a comment

Wika

Posted on October 13, 2021 by AnacArenas

Disnan ye pa i Jose-Mari Chan magkanta?

Misan a Biernes, penalben mi ya. Medyu maki’dad ne, maigit sitenta (73). Dinatang yang mig-concert Sydney. Dakal ya Filipino-Sydney fans a tinagun (keraklan munaman malapit nang mag-70 years old 🙂 ), at alus 3 oras yang meg-kanta ampong megpakaili. Bala ku mo sa e masyadung biasang Tagalog i Jose-Mari Chan, uling alus deng aggang kanta na English la – Can’t We Just Stop and Talk Awhile, Constant Change, Afterglow, Christmas In Our Hearts, Deep In My Heart, at dakal pa. Bista man lahi yang Isik, mibait ya at manuknangan y Joe-Mari king Iloilo a balen na.

Balang kaibat ning metung a kanta, atin yang singit a kuwentung pampakaili. Oini ing metung nang Joke, Kepampangan:

“Kalagu na ning wika tamu. Sanung salita pa mo ing lagu kareng amanu tamu”, ngana. “Alimbawa namu”, ngana.

ing aus tamu keng Creator – “maki-Lalang”. Kalagung kataya.
ing aus keng Authority – “maki-Kapangyarihan”. Ay, kalagung amanu.
ing aus ta keng Mrs or Wife – “maki-Bale”. Peka-malagung salita .


O nanung aus ta naman keng MISTRESS? – hmmm, “maki-Mansion” 🙂
Hehehehe. Okey ya i Jose-Mari Chan ne po 🙂

Posted in Anac Ning Arenas, Komidya | Leave a comment

Ulam

Posted on October 12, 2021 by AnacArenas



Penibatan – ulam
Lenguahi – Bahasa
Kabaldugan – bulung o prutas panabeng kanan keng nasi
Ingles – viand, dish
Agkas – Ulam

Ing katayang “ulam” original deng salita reng pipumpunan tamung Melayung dinayu keting nacion Capampangan. Ing keyang sadyang kabaldugan medyu miragdagan ne ban miyabe la naman deng asan ampong karning yapag tamunaman neng mamangan.

Posted in Anac Ning Arenas, KatayaOlogy | Leave a comment

Kapampangan Tamu

Posted on October 12, 2021 by AnacArenas

Pagmaragul Tamu, Kapampangan Tamu

Posted in Anac Ning Arenas, Para Balen | Leave a comment

ING CALULUNG BOTANTI

Posted on October 12, 2021 by AnacArenas

agpang qng amanu da ding puliticu
queraclan carela nung yang panwalan mu
malugud lang balen, malugud lang tau
anda lang gumastus, milyung libu-libu
dapot qng calati ning manayang suweldu
nung e ca magduda, nanung isipan mu ?

nung ilang canacung lawan ding queraclan
caretang limput na, qng mengalabasan
nung ding apulu dang pangacung simbitlan
yan mung agyang metung ala lang tiparan
uling calucluc da, bawian dong piraplan
ding perang ginastus, macapulung pilan

nung buri meng surian nin mang puliticu
e ne man masakit aquit uring tau
queng mung pangastus na, pamanyaling botu
at ding amuyung nang queya magpa-asu
nung macamulagat lang aduang mata mu
alingad ne wari’ing imbut nang manlocu

carapatan ne pin ning balang botanti
ing metung nang botu, sagradung masugi
ala ing ninu mang manicua caniti
o ing mutus queya, quenu ne ibie iti
at nung qng consensiya, tuki ya’ng sarili
ibie na qng balen, tula e palsimi

wa, ating mapilan, puliticung mayap
ing cayap ning balen, yang queyang paninap
e magpapaca-cualta’ing imbut da’t pigagap
nune qng pangacung serbisyung masapsap
dapot magtaca ca, calagad da’t caliap
batu la mu waring babaldug ning ulap

ren namang manyambut careng puliticu
a nu nung mangacu, sindagul ning yatu
pablasang bayu ya menialing pang botu
tetac na ne qng lub ing gawang maglilu
nanu tang paki na quecatang calulu
botu libe pera, pasensiyahan tamu

O quecaming Guinu, Dios a Mayupaya
ding quecaming pusu, dinan yo pung sala
ba ming apibalac, lubus apiwata
a ing quequeng botu, sagradu ya diwa
yang cabaldugan na, lugud mi qng Bansa
nanu mang pibandian, e tumbas bitasa
alang kamag-anac, alang utang-pala
ya mu ing lugud mi, qng mal ming Bandila

Posted in Anac Ning Arenas, Para Balen | Leave a comment

Kabalen

Posted on October 12, 2021 by AnacArenas


Posted in Anac Ning Arenas, Para Balen | Leave a comment

Ing Bingut King Sabsaban

Posted on October 11, 2021 by AnacArenas


(Tune: Silent Night)

Mibait ya king sabsaban
Ing bingut a manuan
Kang Birhen Mariang kabanalan
Siping ding amak a animal
Ing Diyos a mikatawan.
Ing Diyos a mikatawan.
.
.
Mibait ya king sabsaban
Y Kristung miparam
Panatbus keng ‘gang kasalanan
Ning yatung lumud keng dewakan
Yang munie kaligtasan
Yang munie kaligtasan.
.
.
Mibait ya king sabsaban
ing Anak Miglalang
Uli na atin ta’ng Kapaskuan
Regalu keng meto ketawan
Y’Jesus yang panaligan
Y’Jesus yang panaligan.
.
© Anac Ning Arenas

Posted in Anac Ning Arenas, Kantang Pamasku | Leave a comment