Pulutan


Bayu pa miras at datang masayang aldo inuman
Ing paratang a sabadu deti da nang pisasabyan
Bacas bacas misasabi manyaman lutung pulutan
Tang sisig nang aling lusing
metung carelang pamitan

Saugli mu ngana ning metung
Migaganaca miyadya
Ing tonyung masiba ngana carela ne sinambitla
Pacaracal larang nanis alben yu yacu nang bala
Mayli’t, lawen tamu pin ngana nung e musuc cayang dila

Casalungsungan inuman aparatang de i tonyung
Tumage ca pamu ngana caya ing aluc ning metung
Quing pulutan macalawe kingwa ing tage at minum
Cayalduc na, memulutan sinanduc uangis quing tinun

E pa meyari inuman ala nala pin pulutan
Migpaglalawe ding atlu ing tonyung mabsi ne naman
Casapunggul larang nanis inadya da’t dicdacan
E nana icwang tinalab lalus ya pang mipanyaman

‘Pulutan’
Pusung Capampangan

This entry was posted in Poeta Herman Pablo. Bookmark the permalink.

Leave a Reply

Your email address will not be published. Required fields are marked *