Alang Dios? #1
Neng Hernan Pablo
Atin waring Dios milalang king sabla
Buklat ding mata mu akit ing masala
Dakal kalamidad king yatu sisira
Sakit a dinatang midala king lugma
King pamanalig mu miumam ka kaya?
Ala kang panayan, ala naman ala!
—————————0————————–
Obat manyakan ka bage e bitasa
Pati pamagduda linagpas pa biga
Akakit ding mata isip mung timawa
Bage atatalan panwalan mung kusa
Saradu mung isip alang mayupaya
Anya manumis ka karening manwala
—————————–0—————————-
Nung atin pin Dios kekang panaligan
Magugulung yatu nanu ining sangkan
Dakal ding daranup ala lang apangan
Dinatang a Covid teya sinalangsang
Pebustan meganap dakal a kasiran
Metampus a bunduk melanging gabunan
—————————-0—————————–
Tabakit tabakit ninung maki dapat?
Bage mengasira salang ilalapat
Parsala kang pedro e ata marapat
E mu namam ikit mata mung mipukat
Panwalan mu namu kekang asisipat
Tambing manalaru kabud na manyagap
—————————0—————————–
Nanung panwalan ku? bage e akakit?
Gamitan ing buntuk at ining pamisip
Obat lalawut mu? Atin naman malapit
Teka mo libutad buri mung gigilid
Ing pamanwala mu e muna pipilit
Nung e ka galo ala kang adamit
Tutung ala naman Dios a keti sulip.
—————————0—————————
Malulunus ku man king kekang panwala
Ga man tatakut ku king kekatang paksa
Ing panwalan ku atin mayupaya
Milalang king yatu at kekatang adua
Nung e me panwalan atin pin Bathala
Pakisabi ku lisya king pamanuliksa
—————————0——————————
Nung atin pin Dios a kekang panwalan
Nung atin pin Dios king yatu milalang
Obat pisawili ding keyang lelangan
Obat menatili iting kakaluluan
Bage e atanggap,, kakung kaisipan
Bage e atanggap ning kapikakunuan
————————–0——————————-
Bage e akakit kaku yang panwalan
Kalupa king Dios kakung daramdaman
Kaya ku manyawad tibe at sikanan
Potang magkasakit ya ing panaligan
Uling keng balu ku babye kapauman
Potang manangis miras king kasasagkulan
—————————–0—————————–
Yaku panwalan ku akakit ding mata
Nung e ku galo miras ku king dusa
Magpakatau ku bang ku man milisya
Karing dewakan at nanu pa mang sala
Pane paninasan kayapan, ligaya
E ku man panwalan Gloria karin Banwa
—————————0—————————–
E na buring sabyan pedaig kung kusa
Pasalamat keka apisabing paksa
Ing panwalan mu ing e ku manwala
Kening panwalan ku e ka mabibisa
Ing pisasabyan ta pututan tane pa
Memye sang saya kareng mekabasa
—————————–0—————————–
Salamat salamat keka mekidake
King talamitam ta kaku ya metibe
Kening kapanwalan e ya makayarle
Datang sa ing oras katutuan akit te
Sumlag ining sala kekata salake
Pakildapan ne sa niting pamigale.
