I
Ika kayanakan e ka mu tatangis
Busal ning kalukan magaral kang pilit
Detang kekang matwa tiyu magkakasakit
Kanita midayu saingsing da’t aklis.
II
Ing abluk ning tuksu king yatu mamagus
Pakaingatan mung e magpatinganyud
Uling nung kawe kang paytange king agus
Pota kelambatan akwa mung malumud
III
Ing kanakung usuk sana tandanan mu
Nung katuk ya’ing sinta e me pa sikasu
Ganakan mong matwang gugunyat lang ustu
Ba ka mung mikabus magaral koleyu.
IV
Nung lalakad ka sa busal ning dalumdum
King pamanakbang mu e ka gasul-gasul,
Nung mitakid ka mang misakab king gabun
E mu tatangisan agad kang mibangun.
V
Nung tumangis kamu at e ka talakad
E mu na asulung ing kekang panlakad;
Ding kekang pengari bukud dang paninap
Ing misaplala ka king aldo ning bukas.
VI
King kapagsubukan maging matibe ka
Maus ka king Ginu, mantabe ya keka
Kaybat pakiduang mu king tuksu laut na
King kekang kabilyan, ibie na ing grasya.
VII
nung kanauan king bie keka yang akamtan
Ninu ya mang tau e me pagmatasan
Agyang pulubi yang lubas king pibandian
Nung mangailangan ya ibie mu’ing kasopan.
VIII
Inya kayanakan king tago damdam ka
Pamagaral pamu ing kekang iyuna
Uling ninu ya mang megaral at byasa,
Masipag, malugud, king bie mipala ya.
BABAING MATUN 9/26/15
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
