e ku akalingwan ‘nyang idad kung sieti
ketang sarul gamat kulkul kung bulati
keng sabung-sabungan ipusit ko deti
saka ketang padwas itungi kong pilmi
daramit gurami istung mipaswerti
istung mipamalas… ubingan !! ay, alti.
kagising kung abak saktu mung migmulmul
munta na marangle, kamuti mamupul
karetang pisimen manyad keng sasarul
misan pauli ku mitakid king kulkul
mengapakirut ku king masikang duldul
Inya minuli ku oyta tikul-tikul
inyang ayskul naku meko na king bale
uling i tatang ku maranun yang mete
mekipanuknang ku kang bapa kung Jose
sabadu dumingu makitanam pale
patingapung tiis king pali marangle
bakal parumingu tambing makalele
bulan na ning marsu mais ing tatanam
ing pamanabonu e ku pelampasan
mekipanugtug ku milun ampong pakwan
mekipalut pale kaku murin diptan
sasalud keng sepu bengiang bulusan
keng magtal balatung karin misakitan
kening itsura ku e na ko magtaka
nung ining balat ku kakule baluga
king paspas ning angin eku miraragsa
ing delanan king bie milako ku kalpa
agyu kung talakad ‘gyang alang kayadua
obra mang lalaki aku ing gagawa
Ing Babaing Matun ‘yang aus da kaku
daig pa’ing lalaki istung linakad ku
obra mang pang-adan kakung kabisadu
lagari’t martilyu, iti man agyu ku
maminturang klasrum ‘pong bale gewa ku
pakidagdag mu pa, mangogong simentu.
8/14/13 Lubao,Pampanga
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
