Anaheim, USA
Komusta pu kabalen,
Sanu kaya ing pekamumunang diling lugal a buring puntalan kayabe keng bucket list ning balang anak? Tiran ye, Disneyland.
Wapin naman. Ing Disneyland yapin ing lugal nung nukarin la balamu midirinan katuparan deng sablang paninap. Iya ing lugal a akit mong mabie deng Disney characters antimo ri Mickey Mouse at Dumbo, at dakal a pamialungan at panalben a e mu alus akit nukarin pa man.
Edad lang katorsi/kinse reng anak inyang dela mi la king Disneyland. Tinuknang kami keng hotel arapan mismu ning Disneyland aniya pilan besis keng patingapun kaming makapag-balik-balik. Kingwa kaming dumingguan a pasis aniya alang kotu keng pamaglub-luwal.
Alus seken mi la ngan deng egana-ganang sasaken keng kilub ning Disneyland. Deng aliwa makatakut la antimo itang “Splash Mountain”. Ginuko, migbaldug ya ing sasaken ming bangka pababa singkuwenta pie (16 metru) kalalam. Gugulisak la ngan deng makasake bayu kami mibalsak (splash) keng danum lalam. Kaibat dinagus na kaming paluwal. Ken mong bandang umpisa, pisyal na kami pa keng pakorba-korbang sapa kilub ning kuweba ning bunduk. Karin mu la akit deng miyaliwang maka-gunang panalben antimong ayup a magkanta, galsang seksing kawe-kawe, kindat-kindat a sulu ampong dakal pang maka-aliw a panalben balamu talaga atiu ka keng paraisu. Pati reng musika ampong kanta makakayan la pakirandam keng pusu ning metung a anak, pati na pin kareng makatua.
Parminggu kaming luwal-lungub keng Disneyland, bayu kami memasayal kareng aliwa na pang lugal at panalben keng California.
Metung a pagumasid keng karanasan, migit de atang apagkusuwelwan deng anak ing Disneyland at ding keyang mialiwang panalben at aktibidadis keng edad a dies anggang kinse anyus. Mas anak pa kanita at dakal la e pa magsilbing puntan (masyadu lang anak), at mas makidad pa kanita e na la akma (masyadu nong matua) para karela.
Salamat pu keng pamamasa, at mingat ta palagi.
Angga pu keng tutuki.
Freelancer