Ay, kanyaman muli keng bale ibat obra
Balamu mebulus ku keng panga-soga
Agya sang masaya la ding kaupisina
Aliwa ya mu rin ing muling painawa
Lantang ku neng agad ing dase kung bangkuang
Karas ning sisilim, bayu ke tudturan
Linatnat ya salat manyaman pagkeran
Marimla ya agud keng gulut kung tikal
Ing kule na gabun, e mayan madampul
Ustu yang mipagyu ing babaing dagul
Kagising kung abak agad ku neng langkul
Bayu ku munta luwal ba na kung magmulmul
Metung ke pang tiklip ing ulas maputi
Tilbug ya pang gogo kaibat ng mepipi
Kaibat ng misable, selilung kalangi
Pepasadaan ya keng kuayang pambuli
Ita mang kulumbu linukut kya naman
Keng kanakung tudtud lalung magpanyaman
Bang ding maingeng yamuk edaku sitsitan
Kabang ding takde ku buri dong pangetan
Adua lang ulun ku, metung abrasadul
Karin ko liligpit kilub aparadul
Tumpakan kong bitis kabang mag-alkohul
Balang e kikirut uyat kung mamukul
Kagising kayabak ay obra na naman
Mulayi papunta ketang pipagobran
Patingapun namang pamakitultulan
Bang atin iyuli bale pangabyayan