Lorung Malabit
Silaba 16 Sesura 8/8
Telatag 4 Estropa 7
*
Tumerak na ka Salome, king magaslo a tigtigan,
ing lua mung maybug tumulu, anggang binit mung aguantan.
Ding danupan mung kapatad, at ing indu mung salunan,
ban ayakmul mu ing dine, ila ring kekang isipan.
**
Lalam da ring patda-sinding, sulung miyaliwa kule,
Igiling me’ing papaluan mu, king arap da ring manalbe.
Kabang ing dimut a saplut, lulubasan mu at ugse,
ing mapagkunwaring timan, karing labi igulis me.
***
Ding parukyanu a lupang, atin makapal a bulsa,
samasnan mu lang lantungan, kabang dudurutan mula.
Ban kayari nang tinigtig, ning makabaldugang kanta,
atin nang managkat kekang, lukluk king kayang lamesa.
****
Ustung milukluk na ka at, ume na nakang kandungan,
ing alak a misna tapang, samalan mu nang aldukan.
Ban potang ding kayang gamat, ati’na lang panintunan,
makapal na ka marine’t, agawa mu nang pibatan.
*****
Nanu man ing kayang sabian, anggiang amanung marinat,
tanguanan mu namu sana, at e na ka sasalabat.
Uling ing mung maulaga, agawa mu ing maglambat,
king lamesa na ban keta, kaya atin kang asapat.
******
Nung mapilit ka man tuki, potang agkat na kang lumual,
ban apaulu mu ne ing, masakit a indu mung mal.
ketan mu nia ing labi mu, kabang maliyari’ing bawal
at maniawad na ka’ng tawad, king nuan a dios tamung banal.
*******
Tutu, misna king kababa ing obrang kekang pinilî,
pauli ning ing dangalan, mu ‘yang kekang pamisalî.
Dapot ing malugmang palad, anggiang iti e mu burî,
King pataram kinalawat, ka uling lipit ing bilî.
Rodel E. Gozum
28 Enero 2016
Munoz, Quezon City
-
Recent Posts
Recent Comments
- Kates Lapuz on Pugue cang mam YOL
- Maria Sinicuan on Pugue cang mam YOL
- AnacArenas on Nung Ika Ing Mawala
- Rodel E. Gozum on Nung Ika Ing Mawala
- webmaster on Hello world!
Archives
Categories
- Anac Ning Arenas
- Freelancer
- Kantang Pamasku
- Karen A'Richard
- KatayaOlogy
- Komidya
- Mark A'Sullivan
- OFW
- Palaisipan
- Para Balen
- Paraluman
- PL Almario C. de Jesus
- PL Amado N. Gigante
- PL Dalagang Baryu
- PL Fr. Ronnie Cao
- PL Jose Roman Reyes Laquian
- PL Kate Lapuz
- PL Marites M. Evangelista
- PL Nestor R. Galura
- PL Orly M Dizon
- PL Rodel E. Gozum
- PL Romeo R. Rodriguez
- PL Vhelle Garcia
- Poeta Apung Gusting
- Poeta Eduardo Bagtas Garcia
- Poeta Herman Pablo
- Poeta Irvin Harvey Rivera
- Poeta Laureadu
- Poetisa Floring Ocampo-Mangune
- Poetisa Maria Sinucuan
- Poetisa Melanie Cunanan Naguit
- Pretty Lisa
- Project: Mangapampangan Tamu
- Talapanulip
- Uncategorized
Meta