KING KAKUNG KAPIBABATAN

Posted on October 27, 2021 by Kate Lapuz

Adle: Malikwatas

King panalala belikdan, Itang bie ku king milabas
Itang anggang kasakitan, a kanaku memalasbas
Gyang masuksuk ing biltangan, pekikuanan kung ring miras
King danggut ning kabundukan, agyang misna ya king katas

Detang kakung kesagana, miyaliwa nala klasi
King dalumdum at masala, ating mayap ating alti
Kabaryu at bayung salta, a maragul meging parti
Tinayid at e sinawa, anggang arakap ke’ing swerti

King kakung kapibabatan, malapit nang midalakit
King makabang tete duyan, bista man dakal mamabit
Abut ku neng katakbangan, ban’ ayagtal kune’t akit
Ing bunga ning pipagalan, itang yumu ning pasakit

I kasagsag:
King panalala belikdan
Itang anggang kasakitan
Gyang masuksuk ing biltangan
King danggut ning kagubatan

Detang kakung kesagana
King dalumdum at masala
Kabaryu at bayung salta
Tinayid at e sinawa

King kakung kapibabatan
King makabang tete duyan
Abut ku neng katakbangan
Ing bunga ning pipagalan

II kasagsag:
Itang bie ku king milabas
A kanaku memalasbas
Pekikuanan ku ring miras
Agyang misna ya king katas

Miyaliwa nala klasi
Ating mayap, ating alti
A maragul meging parti
Anggang arakap ke’ing swerti

Malapit nang midalakit
Bista man dakal mamabit
Ban’ ayagtal kune’t akit
Itang yumu ning pasakit

Pilibe lugal:
King panalala belikdan, itang bie ku king milabas
Agyang masuksuk ing biltangan, pekikuanan kung ring miras
Itang anggang kasakitan, a kanaku memalasbas
King danggut ning kagubatan, agyang misna ya king katas

Detang kakung kesagana, miyaliwa nala klasi
Kabaryu at bayung salta, a maragul meging parti
King dalumdum at masala, ating mayap ating alti
Tinayid at e sinawa, anggang arakap ke’ing swerti

King kakung kapibabatan, malapit nang midalakit
King makabang tete duyan, bista man dakal mamabit
Abut ku neng katakbangan, ban’ ayagtal kune’t akit
Ing bunga ning pipagalan, itang yumu ning pasakit

Sinulat neng Babaing Matun
Balen ning Mexico
Enero 5, 2016

About Kate Lapuz

I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
This entry was posted in PL Kate Lapuz, Poeta Laureadu. Bookmark the permalink.

Leave a Reply

Your email address will not be published. Required fields are marked *