September 22, 2015 · Lambac, Philippines
Ing taung makasarili aldo aldo yang manayis
Karetang katubale na mumutus ya balang pildis
Agad- agad mimumwa ya anting leon king kabangis
Ustung mekaramdam tutul babalasbasan nong palis
Potang atin makaapag sukmaman na ngan ing ulam
Litsun babi, asan, murkun papalub na ngan king atyan
Ing dui at latak-latak yang karela na papakan
Pusit-pusit ya pang mayli kabang alben nong mamangan
E na ustu’ing malilyari ngana ning metung simbitla
Ot bata tayang pagsilbian itamu pang magparaya
Bisita yamu king bale pane ya pang maningaya
Ita’ng kukusad paypagal ding gagawan nang alila
Wa man ya ing manibala kening bale tang tuknangan
Obra na mu maglalawe tuldu-tuldu nung na’ng gawan
Karing maldang makaramdam asna katni nang panyabyan
Bale ke! at pigastusan akung mitalakad kanyan
Dening kayang kaluguran e no mekapanagwanta
Uling e na makaustu ing karela papakit na
Agiang ede buring lakwan at e dane apibata
Inya misasanmetung la mitalakad nang bale da
E na ayabut ning isip obat marakal a tau
Pagimbutan ing e kaya ‘nya pagumpisan ning gulu
E bisang lumaban pante pamanisip na masolu
Buri namu ya ing biasang lukluk king matas a tronu
BABAING MATUN 9/22/15
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
