Indû

Belangkas nang Apung Gusting

3/28/16 Riyadh, KSA

I

Kenu ya tiririn ing makapayapâ?

At king kekang siguk, ninung mágpakalmâ?

Kenu ka sínusú, king sálû migkerâ,

Anyang bingut ka pâ, ninung migtumailâ

II

Kenu mu amana ing ugali’t siglap,

A minulma keka ban magi kang ganap?

Ní’ng mituru kekang mangadi’t mangarap,

At mika-takut keng Ginu tamung Mayap?

III

Ninung guyabnan mu at méging sulugi,

Karing balang takbang ban e ka malili?

Ninu ing miánad keng díla mu’t sábi,

É wari i ‘Mâ mung alang kayalili?

IV

Patye makaramdam kang lungkut at lumbe,

Néng malilipang kang anti mong meibe,

Ninung aisip mung sana atiu lele,

É wari  i ‘Nang mu a keka sinese?

V

King oras ning kekang labis kasakitan,

Ninu ing mumúnang tatagón mu’t ausan?

Kéng penandit ya mung  kírut ing kalamnan,

Lingap nang ima mu ing kekang pantunan!

VI

Potang e asabi kang daddy ing burî,

Mamikakunu ka king sela’na’t pálî.

Ninu ing taléte at kékang kakampî?

Nune i mommy mung é biasang payalî.

VII

Ustung mengari meng darala ing yatû’

At ketang bayat na masaspak ka sálû.

Kenu la pago reng kasaup mung tutû?

Nune retang pago na ning mal mung indû!

VIII

Ding ima yung alang ninu mang kalibe,

Ring inang yung keko malugud sinese.

Ring mommy yung kekong gagawan talete.

Indu lang péka mal at alang kapante!