Amado N Gigante
October 30, 2015
Sana ika na ing maliling misulud
King koronang likwa’ning taung malugud
King amanung sisuan e ya pepaynggulut
Agyang keting bansa matas yang pamuntuk.
Matas yang pamuntuk e ne akalingwan
Ing Mal tang salita ing amanung sisuan,
Inya ing AGTACA’T BUKLUD KAPAMPANGAN
Kaya re pinutung ing koronang LAKAN.
Ing kakung amanwan ya I Apung Dadong
Agyang atyu ne king matas diling tungkul,
Lugud na king sabi king pusu na kilung
Kambe neng mebaldug king aun dinulung.
Sana ika na ing manalili kaya
Misulud kanitang likwa’nang korona
Uling akakit ku ing tetagan keka
Nung king katuliran manalakaran ka.
Manalakaran ka at ing kekang asbuk
Ali re asima king ustu’t makatud
King pamagsalita ditman la kang takut
Ituntun me agyang ning gawang baluktut.
E ra ka kalupa ding alwang akakit
Karas keng kaskupan e la bisang pakit;
Wari keng sasabung buri ne pang akit
Pile ing kalaban bayu ya kulait.
Sana ika na pin itang maging LAKAN
Uling malugud ka king Amanung Sisuan.
Bukud pa kaniti ing tagle mung belwan
Kusa mung darake karing mangaylangan.
Ala kang kaymutan tuturu karela
Tagle mung kabyasnan ipamye tagana
Karing kayanakan king balang mabyasa,
Inya paninap kung mag- LAKAN ka SANA.
About Kate Lapuz
I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
