MAYOR EDGARDO D. PAMINTUAN

nang: Amado N. Gigante
Anunas A.C.

Ibat inyang magaral ya, ing imbut na at pigagap,
King lagyu na niting balen sumuyu yang alang kanlap,
Inya kanyang pamagaral mibata ya at migsikap
Itang panga abugadu, inyang kaya ng atanggap,
Karing mayntun katuliran, binye na ing kayang lingap
Nung inya ing kayang lagyu makanyan yang linto kislap.

Kinislap ya ing lagyu na anti mo ing bulalako
Karin king banwang katasan minukyat yang migparayo,
Makanyan lang meniwala ding memalen ANGELENO
King tungkol a bisi Mayor nya pinili reng binoto,
Inya naman ing tungkulan mipusan king kayang pago
Nablasa’nang katapatan, migserbisung lapo-lapo.

Mituldwan yang maging Mayor, uling mika’ating sangkan,
Ketang kaya mibye tungkul mekapilan ya pang bulan,
Anti mo waring pagsubuk memakbung ya itang bulkan
Itang labuk a minagus at ing danum a masikan,
King libutad na ning syudad mitambak ngang mipamisan
Dit man la neng masalese nung keka yang pagumasdan.

Mengasira la ding dalan, meputut la detang tete
Mengpakli la ding dutung at pati na detang poste,
Kabiluga’na ning syudad milako ngan ing koryente
Ting melasak karing bilding ampon mengaragsang bale,
Dapot itang “acting” Mayor matatag yang lider tune
AGYU TAMU! Nganang: “gingkas talakad ABE-ABE”.

Talakad tang ABE-ABE, SAUP-SAUP tang magobra
Bankanita iting syudad pasibayung talakad ya,
Uli niting kayang agkat ANGELENO misaup la
Mibuklud lang anting palis king kayang pamanimuna,
Balas, labuk, king palengke saup saup piglako da
King sapa na ning Abakan, mag “sand bagging” yang abe ra.

Pauli ning mekilala ing sipag na at tetagan
Pinili reng maging Mayor inyang datang ing halalan,
Ketang adwang terminu na, masalese ng gimpanan
Arapan da ring memalen itang kayang katungkulan,
Detang tete mengasira den menga gawa langan
Minunlad ya iting syudad at sinulung ing kabyayan.

Ding tinuknang king “tent city” king ban ela magkasakit
Den karetang “resettlement” kari’no pepadalakit,
Makanyan yang tune lider ing kasnawan ban akamit
Detang kayang sasakupan, babye na ing malasakit,
Ebala ing mibekut ya pibata’na itang sakit
Bankanita ding memalen… tumula lang kayang akit.

At pablasang ing nasa na emu detang ANGELENO
Detang kayang dinan saup ketang babye nang serbisyu,
Makanya nang peninasan miras karin king kongreso
Ban suywan nong kitwan lugud ding king mumunang distrito
Ning probinsyang Kapampangan at memalen Pilipino
Dapot, meyala yang kalma eya meging Diputado.

Eman limput Diputado ting dintang nang kapalaran
I Presidenti GMA dinina’neng katungkulan.
Mig “manager” ya NHA inya kaya lang pigsilbyan
Detang dakal a “squatters mengarinan lang tuknangan,
Pauli na ning meyakit ing kayap na at sipagan
Kaibat na ning pepabanwa mig “cabinet member” neman.

King tungkulan a binye na kaya nitang Presidenti
Panunlad ning “Central Luzon” yang dinyan dang “priority”
Inya naman detang dalan ilang inuna nang dili
Detang myaliwang probinsya ban mituglung langan deti,
Bankanita ding memalen agyang nula muntang parti
Deti ela matigagal king karelang pamagbyahi.

Meging negosyador yarin, kayabe yang mamilatan
King tikda rang pamiarap adwang grupung milalaban,
Ing paksa ning pisasabyan makananu rang lunasan
Problema da ring malati king matulid at kabyayan.
Nung iti yanang marapat, ing kekatang balen tibwan,
Akamtana ing tagumpe at ing tune kapayapan.

Itang “North Ville” anti murin bayang byayan ing dalan tren
Linipat nalang tuknangan detang karin mig”squatter”,
Mengarinan langang pondo detang syudad ampon balen
Balang mirinan tuknangan detang kalulung memalen,
King lungsud na ning Angeles ban ela mangapaburen
King Barangay na ning Cutud dela nalang linipat ken.

“Two thousand ten” a halalan ating problemang mengalto
Inya manintun lang lunas ding dakal a Angeleno,
Yang sibung dang tagal Mayor bayang sunlag itang aldo
Ing syudad na ning Angeles, pasibayu yang mitikdo,
Ing kulait a mermdam anti waring ibat babo
Misanmetung lang memalen at yang karelang binoto.

Ketang kayang pangalukluk problema ing kayang disan
Ing basurang pakatambak ampon utang a melakwan,
Mekapilan ya pang bulan king tetaga’na’t sibukan
Bagya-bagya neng titikdo ing syudad a kayang tibwan,
AGYU TAMU! ABE-ABE! SAUP-SAUP! yang pugayan
King aldo nang kebaytan, MAYOR EDGARDO D. PAMINTUAN

About Kate Lapuz

I Catherine Atienza Lapuz, (a.k.a Ing Babaing Matun), bait ya king bario Concepcion ,balen ning Mexico, kapat karing lima rang anak di Elizardo Mallari Lapuz, tubung Mexico at Lolita Reglos Atienza a tubung Apalit king bario Colgante. Meulila king tatang king idad 13 banua,pauli ning masakit at akalingwan kararptanan ding taung atin lisyang kaisipan, king idad 7 pamung banua mibastag ne king obra o kapanintunan king marangle. Manuad pale ban kanita atin abias a itun king kaldera at apangan king oras , mamagut/mamulut/mamarug at mamalusbus balatung king kapalian na aslag ning aldo. Ustu ng panaun na ning pale tikman na ing mamagut /manyalbag sinabud karing libluban, makitanam / makipamalut / manuropa/ mandara/ mamalusbus, sasalud talwakan karing dadarang pakle ampon mamilad pale king dalan , ing makitanam at mamulut mais gewa na mu naman. Makipanugtug pakwan ampon milun nung nukarin sasaluk danum karing talaga, mamadwas tugak, manalangka , manasan ampoin manusu, mangumpe dikut ban atin lang apangan ding damulag antimurin ing manyogang damulag bayu lungub king pamagaral. Dening anggang mesambitlang areni pagmaragul na at e pikakarine. Uling ketang panaun a ita pakakalulu ing bie ning kekaming pamilya, meragul king pamanyese ring apu, at mengawang lugud karing pengari , uling meragul yang malaut karela pauli ning prinsipyu ketang panaun a ita.Uliniing tikman ng kasakitan o nkakaluluan king bie mignasa yang magpakayari king pamagaral . Idad pa mung 7 banuang buu na king isip na , datang ing panaun mayari ya king pamagaral at mitas ya istadu king bie( atin yang katuki......)
This entry was posted in PL Amado N. Gigante, Poeta Laureadu. Bookmark the permalink.

Leave a Reply

Your email address will not be published. Required fields are marked *