Likuan ke’yng balen ku metung yang amanu
Ing gagamitan na ketang pamagbersu
Itang pakiramdam ning balang memaryu
Atna king kasaya yagkas da pareu!
Manalbe sarzuela, crisotan king radyu
Magdala lang tula, pusu makuswelu
Mangatuang poeta beluan makayatu
Pati mangarana, yaman ning balen ku!
N’yang kakung belikan amanung likuan ku
Pusu ku kikyak ya aliwa’yng dimdam ku
Nukarin ya minta amanung balu ku
E ke daramdaman karening disan ku!
Oita pengalkal ke king balun malalam
Nung nukarin igse amanung pibandian
Kabud apalto ke memagkanta la ngan
Amanung amana dapat yang gamitan!
Amanung marangal, amanung masampat
Kabang iapse me banglu na kakalat
Suala at lagu na luguran yang tapat
Sinta na ning pusu, kailangan iangat!
💚 Tulang ning Magalang 🍀
melanie29aug2013asiago
Melanie Cunanan