Diwa keng bye nang atsing Simang , at cudta nang
Almario “amor” C. de Jesus-
*
Dudungdungan ke ing Biblia, at canacung pagaralan
Amanung maging gabe na, ning canacung capanwalan,
Ing bie tamu keting Yatu, itang sabla mitacda ngan
Anti ning panga-bait mu, at panaun camatayan,
Ngening daramdaman cu na, dirimla ney’ng gatpanapun,
Caring sapning mal a tune, ipaswala cung panamdaman.
2.
Ala cung capicacunuan, ketang lugud cu kecayu
Uli ning panlalawe yu , cacaba pa ining bie cu,
Lugud cacung daramdaman, muna king Ginu at Dios cu
Pati na y Indung Birhen, at ding sablang pamilya cu,
Detang cacung caluguran a biasang lugud canacu
Lalu na retang e biasa, detang mangmang at calulu.
3.
Matwa na rugu ing bili, madagul cu pasalamat
Disan cu ining edad cung, dacal apo careng anac,
Lalam na ning cacalulwan, alang patad pamagsicap
Abe ke ing asawa cung careng anac mi liningap,
Meragul lang maganaca, micalugud, mipanyaup,
Itang mecagawang mali, itulid de ketang mayap.
4.
Leco cu na kening isip, salitang pamag-inakit
Bang numawa ya ing pusu, ala nang mwa balang suldit
Detang anac cu’t manuyang, e micacunung lumapit,
Makiyalung careng apo, keng Inglis manga-palipit,
Anya agyang ala nayu, asawa cung menahimik
Masaya na ining bie cu, alang pait a manatsit.
5.
Anting gawang pamaglibang, ngeni canacung gagawan
Manigaral cung susulat, salitang acamulatan,
Dacal na cu ababalu, careng cacung casulatan
Itang amanu ta pala, mistula yang cayamanan
Agyang ala cu balen cu, labuad na ning Capampangan.
E mamacu ing lugud cu, ketang Amanu cung Siswan.
acdj
(Masayang Pascu at Masaplalang Bayung Banua)