ING LUGUD NING DULANG


Melanie Cunanan Naguit
Keng masayang kayaldawan da reng Indu tamu…13mayo2018…

~~~ ING LUGUD NING DULANG ~~~

Anyang malati ku king arap ning dulang
Pilit kung kukutang kening pilubluban
O bakit pin kaya, kaina nang mamangan
Ning kanakung Indu, kakung pacamalan.

King pangaragul ku’t megi na ring Tatang
Mipakibatan ya ing kanakung kutang
Bigla kung mipalua at kakung genacan
Imang caluguran, e ya mainang mangan.

Linub king ukul ku itang daraptan na
Bayu ne isubu pamangang sinadya
Kaku ne pa ibie kabang mapali pa
Akit nakung mabsi, tula king pusu na.

Danup pibatan na keng lugud na kaku
Uma at kaul na ‘yang panintunan ku
Ing penamdaman na ‘yang apigunam ku
Itang keng pusu na, ngeni aramdam ku.

E ku mipaindatun, dimdam ku ing lumbe
Nukarin ne kaya, kaku manantabe?
Ing pasalamatan ya, e pa sapat ‘yapse
Lingap na kanaku’t lugud nang dinake.

< tulang ning magalang >
melanie4march2015

This entry was posted in Poetisa Melanie Cunanan Naguit. Bookmark the permalink.

Leave a Reply

Your email address will not be published. Required fields are marked *