Irvin Harvey Rivera
Siuala Ning Maliwalu/Anac Ning Baculud
February 14, 2018

Dakal nang pagsubuk king bie ta’ dinalan
Ika ampo’y aku agnan ta’ng piglaban
Dakal nang uran at albug ing telasan
Ing lugud keka ta’ e mimin(g) megisan
Mayumung lugud at pusu ta’ng p’yaptasan
Pisulwan ta’ng adwa— lugud alananggan.

King ilug malalam, karin ta’ kinawe
Nung nu’ ing dagus na e karagling mate
Ing lugud ku keka malwat keng sinese
Kapitnang sangap na, iti ing ka’kung bie
Inya, sa’ o Irug lumbug ku ma’t mate
E ku kumabye nung keka ku miwale.

Wa, man ing panaun tantu neng migbayu
Lalakad ing oras, lugud maglipatu
Ding memun nang meko king isip ati lu
Mibalik la’t mekad sirong pasibayu
Nanu pa’ ta’ing lugud ku keka masolu
At mangga man ngeni, lugud ta’ mayumu.

Karing balang aldo keka ta’ linabas
E na pegmaymut ning paintungul a bukas
Ing Malagung kalma ning Lugud ta’ng Wagas
Mirinang pakibat king mayumung ablas
Mangga man king sepu ning bie at wakas
Mikalugud kata king ligaya’t paldas.

SiualaNingMaliwalu #AnacNingBaculud

Macuiad A Poesia
Irvin Harvey Rivera
Siuala Ning Maliwalu/Anac Ning Baculud
October 16, 2019

Bala ku kanita, kanitang minuna
Yang mamye pakibat kanaku ing droga
Pilit dang sasabyan ding ka’kung Barkada
King kanung Drogang yan mako ku problema.

Ing droga kanung yan o’t e ke subukan
Bang lumwalas ya ing ka’kung pilubluban
Ining bayat ning bie a ka’kung daralan
Agyu na ngan kanung ibekut, pusanan.

Potang atakman ke ngarang manamuyut
Anti ra ka kanung duduyan, dudurut
Agyu keng itulid ing dalan a bukut,
Ing malumbe kung bie agyu keng salikut.

King banwang katasan o king alapaap,
Karin na ku dala ning ka’kung pigagap
Karin king karinan, king babo ning ulap
Yan ing pangaku na ning Drogang magpanggap.

Kanyan ke subukan bawal a panulu
King panamuyut da ring kabarkada ku
Kanyan magumpisa ing mesabing bisyu
A midala ka’ku mangga na king sepu.

Inyang mumuna pang subukan ku iti
Megyam na kung tambing at kabud mewili
E ku apibule king ka’kung sarili,
Mayap o e ustu ninung makasabi?

Makanyan nang lunto matsura nang bunga
Ning mesabing bisyung pagbawal a droga
Inyang atakman ku, king bie kinawul na
Karin na migbayu malagu kung kalma.

Kanyan na masira ing mayap kung ukul
King bisyu a droga karin ku mesaul
Mataram kung isip kabud n’ya mepurul
Ing mayap kung buyut e ne mekatutul.

King pamagpabusta king mesabing bisyu
Ding ka’kung pamilya betingan da na ku
Ing ka’kung Asawa nganang mengamanu
“Kawanyan da na ka, e naka magbayu!”

King sukal ku a lub keta king milyari
Lakwas keng pebustan ing ka’kung sarili
Ing bawal a droga yang abe ku ngeni
King metung a suluk a magdilidili.

SiualaNingMaliwalu #AnacNingBaculud

Mala-Soneto
Irvin Harvey Rivera

Siuala Ning Maliwalu/Anac Ning Baculud
Nanung ginulis na ning kanakung pinsil?
Pamanagimpan ya”t metung pamagbitkil;
kapanandaman yang e bisang matagkil;

king diwa kung malyap a e ku asupil.
Nanung susulat na ning kanakung pluma?
Ing Malungkut kung bie,– malugmang istorya;
king ba’yang milikas king metung a tema;
a pilit pasulat ning pusu’t kaladwa.

Ining dadalit ku lawiwi ya wari?
Malungkut yang kanta ning pusu kung sawi;
nung nu’ ko pawaga ring pita ku’t buri;
nung nu’ la migmula, nung nu’ la meyari.

Gugulis, susulat, at dadalit naku…
malyap ya pa mu ring dakpan ing diwa ku?

SiualaNingMaliwalu #AnacNingBaculud

Makuyad A Poesya
Irvin Harvey E. Rivera
Tagak Ning Sampernandu
April 5, 2020

Misan king bie tamu magnasa ta’ng bina
A sana datang na ing malagung kalma
King kapagnasan ta’ng mandulap himala
Ing bagueng masampat, mumuli king ala.

King babo lamesa atin nang pamangan,
O’t manintun ka pang e mu agyung kanan?
Atin na kang papag sukat mung pagkeran,
Maintun ka pang kutsung mabuleng tudturan.

Ing e na akawul ning kekang pigagap
Sukat nang isakwil at matulang tanggap
Uling nanu man ing kekang akakapkap
Yang tune ligaya mung e muling paninap.

Sukat a malawut e yabut ning gamat,
O’t yang pakyabutan a atmu na kalwat?
E mo sa’ masanting nung keka mong atyat,
King agyu nang dasan ning gamat mung panat?

E mo wari mayap ing milup kang sabo
Bang mipaldan ka king kekang pamaniglo
Nung mapali ka man king bandi mung silyo,
Matula kang mamun a kikisokiso.

At kanita, ing bie—-akit mung ligaya
Matampang kalma ning megui nang bunga
Kanita akit mu ing tune ulaga,
King pamandulap mu king malagung kalma.

TagakNingSampernandu