CASEBIAN 8:6

Posted on July 4, 2022 by Orly M Dizon

At nung ing talas ning isip ya ing pagusalan, ala nang migit pa king Cabiasnan, ngening ya ing migugulis king sablang bage mimiral!

DIZLAG FARM, June 17, 2022

Posted in PL Orly M Dizon, Poeta Laureadu | Leave a comment

LUGUD KING TIBWANG BALEN

Posted on July 4, 2022 by Irvin Harvey Rivera

(Mumunang dake Ibat king Kawatasan nang Gat Andres Bonifacio, “Pag-ibig sa Tinubuang Lupa” a bildug ku king Amanung Kapampangan.)
Irvin Harvey E. Rivera
Siuala Ning Maliwalu/Anac Ning Baculud
November 29, 2019

Ingsanu pang lugud ing miguit kaya —
King pangadalise at pangayupaya
A anti ning lugud king tibwang Bangsa ?
Ingsanu pang lugud? Ala na pin, ala.

Lubus a kapuryan ing pane imbutan
King Balen ning Taung maningat dangalan
Magdalit, gumale, kudta’t kasulatan,
Degulan na naman keyang kapasiagan.

Alang maulaga a e na inampang
Ning pusung makamal king Balen nang Jirang
Daya, bandi, belwan, bata’t kapagalan,
Mapatlud man ing bie, iti e pikabyang.

Bakit? Nanu ya’iting degulan milalu
A ampangana’ning lugud a masuyu
Miguit pa king sintang mimiral ping tutu
At king bandi nang bie ginugul makatmu?

Ay! Oy’ning Balen kung degulan at tibwan
Iya mung bukud kung—-Indung Balayan
Na ning makayamang aldo king aslagan
A memie pali king mabilug katawan.

Kapilas na niti ing lugud king Balen
Sablang milabasan makamal piaben
Ibat king masayang pungul a lalawen
Mangga ing katawan, king aun kamaten.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

Pigunaman taya

Posted on July 4, 2022 by Kate Lapuz

Ing NAPUN ala ne, Ing BUKAS datang ya pa, Ing atin tamu mitatagan ing NGENI , inya umpisan tane.

Kutang:

  1. Napu king napun ing buri mu sanang balikan/kalingwan?
  2. Nanu king bukas ing kekang panagimpan?
  3. Nanu king ngeni ing buri mu nang umpisan.?

Mayap a abak pu.😊

Posted in PL Kate Lapuz, Poeta Laureadu | Leave a comment

🍀 Mayubung Kausukan 🍀

Posted on July 4, 2022 by Melanie Cunanan Naguit

Takbang ta na, kakung abe
Kening paintungulan ning bie
Yabanti te, ilakbang te
Ba’yng parasan mayakwa ne.

🍃 melanie25abril2022 🍃

May be an image of text
Posted in Poetisa Melanie Cunanan Naguit | Leave a comment

CASEBIAN 31:10

Posted on July 4, 2022 by Orly M Dizon

Ing uliran a babai, nung keca yang atuclas, migit yang e palac a ulaga kesa caring perlas.

DIZLAG FARM, June 25, 2022

Posted in PL Orly M Dizon, Poeta Laureadu | Leave a comment

Maningning Nang Legwan ning Balen Baculud

Posted on July 4, 2022 by Irvin Harvey Rivera

Irvin Harvey Rivera
Siuala Ning Maliwalu/Anac Ning Baculud
September 10, 2017

Lwid ka! Oh Balen kung tutung pakamalan
Talakad na ka king matindag mung legwan
Saganan mu la ring batwin king katasan
Myumang titipa at kayabe ning bulan.

Lubasan me’ing kekang mapait mung tangis
Malungcut mung gale karing rima’t sunis
Ibalik mu la ring mayumu mung lambis
A misimpan-simpan king lugma mu’t aklis.

Ing mawu mung pusung manaptas paninap
Ala yang patna king kayang pamandulap
Ding masalang batwing migpanpan king ulap
mengatda la ningning king duldul at kildap.

Ing dati mung legwan at matibeng asyas
Lesak ne ning kekang malungcut a paldas
Istung balang ume kang sambitla’t gingkas
Sasagiwa ngan ing sablang mengalabas.

Dapot king marayu mu nang pamaglakbe
Minuli kang masyas at meging matibe
Akakakit ku’ing sala at ningning mung tagle
Karing kekang timan, dalit mu at gale.

Ume kang talakad dane ning aslagan
Manaptas paninap ampo pang tagimpan
Masalese mu lang piyabayabayan
Ding batwing masala, sumlag la mu naman.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

PALSINTAN DAKA

Posted on July 4, 2022 by Irvin Harvey Rivera

Irvin Harvey Rivera
Siuala Ning Maliwalu/Anac Ning Baculud
July 18, 2018

Buri mung abalu ing palsintan daka,
Malagu kung bandi, malagu kung Musa?
Nanan ku mang lingad oh kanakung sinta,
Ika ing laman ning pusu ku’t kaladwa.

Potang balang ume na kuung managuimpan
King busal ning bengi ra ka amamatan
O’bat pane ka king ka’kung panimanman?
Oh sinta ning bie ku, Sintang pakamalan.

Ustung retang batwin andap-andap na la
Ika ing paintunan king pisngi ning Banwa
Mayumu mung timan, e ku apibata
At balang pinandit, pandulapan da ka?

Ustung milaut ka, ka’ku ka miwale
E ku na balu ing paintungulan kung bie
Ika ing kalasag king kanakung takde,
Mawala ka Jirang, mayap na mung mate!

Inia sa’ Sinta ku, buri kung pabalu
Ika ing laman na ning kanakung pusu
Buklat me mang sarya nung tikusan me mu,
Ay rugo, Bandi ku, kayaspak keng salu.

E ku palingaran ing e ra ka Sinta
Agyang tikusan mu at kelingwan mu na
Ngeni oyning kutang;, nung palsintan da ka?
Wa, mekad tutu kung milsinta na keka.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

MUA

Posted on July 4, 2022 by Irvin Harvey Rivera

Macuiad A Poesia
Irvin Harvey Rivera
Siuala Ning Maliwalu/Anac Ning Baculud
October 5, 2018

Ing mua ia ing sangcan da ring pamipate
Qng lual o magui man qng pibale-bale
Maintun at maintun iang panangab nang ique
Bang milablab itang baiang macalele.

Cucumcuman na at sisimpan ing pali
Cabud datang nia mu’t e cumauat bili
Balang dasan na qng metung a piragli
Mangaquintal quetang babaia nang api.

Ing mua ia ing sangcan qng capanamdaman
A manamuit qng metung pilubluban
Agiu nong cauani ring matigic talan
At cabud mabating nia mung timan-timan.

Anti ia mong acdac, migbusal a sucsuc
A quirutquirut cabilugang buntuc
Ume iang mamie a maiap canung usuc
At maglibutad ia qng metung a tapuc.

Ing mua metacmus ia qng maroc a pusu
At pepalual ne qng babaiat nang salu
Anti careng tau a mapangalalu
Cabud na mulusuc qng mua nang milalu.

Dacal queca tamu ing micacasala
Pauli na niting e ta’ managuanta
Nung paimburisan mu tang mibababua
Mangari cang nasing malpa qng caldera.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

Bie pamacyasawa

Posted on July 3, 2022 by Herman Pablo

Ing mumunang adwang banwa, bie tamung talasawa
Pali ampong yumu mikit king salu miyabeng sinta
Alang kapupusan lugud , O jo kaluguran daka
Maranun , M’ ugtu, Sisilim mikapmuang kening ligaya

Minimin pali mewala ,mengatiplad karing pusu
Kinupas ampong mewala tinamle lambis ning suyu
Karing labi sambitlan da ,mangalung lugud at yumu
Karas Martis, Miyercolis ampong Sabadu niyamu

Kening dinalan panaun mabilis apulung banwa
Masakit daneng ayagkas O Jo kaluguran daka
Ing Marsu , Mayu,Setyembri
Pilit namu a sabyan da
Asabi da man asambitla dintang mu pamangailangan pa

Kening karamput a kwentu menikwa ta sanang lisyun
E ya tinapeng sinubu tambing iyapsa keng gabun
Potang mekintal mepali pasbayu na’mang manintun
Pabayu bayu pamisip
maglakbe kang alang timun

MMS
(Bie pamacyasawa)
Neng Herman Pablo

Posted in Poeta Herman Pablo | Leave a comment

CASEBIAN 26:6

Posted on July 3, 2022 by Orly M Dizon

Anti me mong pupututan ing sariling bitis mu, o manintun sariling caplas mung balat, nung tutuburan meng magdalang pasabi ing metung a mangmang.

DIZLAG FARM, July 2, 2022

Posted in PL Orly M Dizon, Poeta Laureadu | Leave a comment