PAPA

( Poema Para cang Tata nang OFW
ning Cadduang Anac Cu )
nang Joseph Laquian

Balang bengi cami manaya canita
Queng quecang panyatang , pamangan magdala ;
Casiclod ming gamat , mipuc queng lamesa
Ing maniaman dala , pisuluan pamilia .

Oras ning pamangan , miyabe tamungan ,
Ing lutu nang Mama , mabanglu yang bau-an ;
Ding subu mu , Papa , maqui abe timan ,
Neng iqueng mamacmul , maniaman panamdam .

Ing sadia ta’ng saya biglang mibayu ya
Iniang meco’t mintang aliuang bangsa ca ;
Iqueng atlung anac mu licuan cang Mama ,
Ban macaguiu mu queng sustentuan pamilia .

No photo description available.

Pilan namung bulan at mibalic naca ,
Quecaming panayan ing miyabe tana ;
Nung maliari , e na ca sa mamaco pa
Ban pamidagul mi , mantabe ca , PAPA .

Posted in PL Romeo R. Rodriguez, Poeta Laureadu | Leave a comment

ING MAGTINDA KING PALENGKI

Neng ORLY MANALO DIZON
Sucad: 8/8;
Orthograpiang: ca, ke, ki, co, cu (C-K);
Nov. 9, 2019.

1
Ing magtinda king palengki / e ya iti birung obra
Uling tictac pa caranun / ding keraclan matudtud pa,
Malisuas ne iting ticdo / at tincupan ding gamit na
Ban agad nong apagsilbian / ding suki nang manenaya.

2
Ing palengki iya’ng lugal / piniling nang pipagobran
A nung nu mu ngan akit ding / miayaliuang calacalan,
Sablang buri na ning tau / maca-ugne keng pamangan
Bucud alang aliua pa / ing palengki ya’ng pagsadian.

3
Asan danum lang tinda na / a pacaratuc pang timba
Kisokiso’t lulungdag pa / uling mecua la taldua,
Macatiman nong cucutnan / cambe laue nang maratnaa
Ding suki nang bisang sali / a mataba nang tilapia.

4
Pacagrupu la mu naman / macatocang pilming lugal
Dening magtinda capangan / ing aske da e papagal,
Singalngal pa nitang bau / lutung paugtuan at amusal
Ampo pa’tang pagmirienda / at tsaca ‘tang pagminindal.

5
Aliua la naman lugal / deni nang magtinda palta
Tinda ra’tang panpalasa / a mura mu caring bulsa,
Ila retang mikibalu / sangcap na ning “crispy” pata
Ing pitaca e ne dapat / sactu la mu retang barya.

6
E la micacanlaut ding / magtindang prutas at gule
Ding magtinda linyadu la / king kimut da at panaske,
Pacasacu dong babagsac / at pilpil pa ketang lele
Tsaca pacarga na potang / cailangan na lang iyase.

7
King palengki mu la akit / mapilan obra ning tau
Atin detang tagabitbit / libe sican ding camau,
Bibecut da itang bayat / king pago ra macasalu
Ban atin la’ting auli / caring barya deting sueldu.

8
Sabadu ya itang aldo / a nung nu la mungan akit
Magtindang gamit-cusina / at tsinelas-sapin bitis,
Inya nung ‘tin cang caracal / gamit-bale o tarapal
Ume na ca king pelengki / at e na sa paitigagal.

DIZLAGFARM, RESTHOUSE & SWIMMINGPOOL, Oct. 22, 2022.

Posted in PL Orly M Dizon, Poeta Laureadu | Leave a comment

Panupaya yung kudta

Nang Herman Pablo

Panupaya ye pu abubu kung kudta
Kudta a migogo pluma ning makudta
makudtang tibubus malugud nang gampa
gampa na ing miras king sidduan nang nasa
nasa na ing balen ya sang mitimawa
mitimawang bina apuling salita.

Salitang apuli ing amanung sisuan
sisuan kang indu na at balen nang tibuan
tibuan ya king lungkut dusa’t kakaluluan
kakaluluan miras sinta nang balean
balean a magmalun asbuk ding mayintang
mayintang a suli kabud mengalingwan.

Mengalingwan bina mana rang salita
salita ning leguan ing sinalampara
sinalampara king kabuklat ning masala
masalang akakit milako a diwa
diwang kayanakan sinulapo biga
bigang paninapan mebaldug king sapa.

Sapa yang melangi wawa ra at asbuk
karening asbuk da menabtak ing bunduk
bunduk kamalayan karela mibukud
mibukud a lingap mebating ing lugud
lugud a mewala silapo mepatlud
mepatlud a suyu king niaman ning tudtud.

Tudtud a manyaman busal na ning pisak
pisak sinalambo king kekatang labuad
labuad tang liguran yang mamatad matad
mamatad matad king napun nang peninap
peninap king napun mitas king alapap
alapap! king alang kalma ya miyatad.

Miyatad a misyun kareng talaturu
talaturu tamu datang a kalbaryu
kalbaryung miyatang ibuat ing amanu
amanung tang sisuan malingap dang suyu
suyung alang patna lugud a masolu
masolu a sinta king lamak ning Guinu.

Guinu tang mitubud ila ring magbante
magbanteng malingap bang yang mitiwase
mitiwase king ing balen managumpe
managumpe suyu, masampat a pake
pake ra ing mipuk king sidduan ya mike
mike keng kabilyan , kabilyan matibe.

Posted in Poeta Herman Pablo | Leave a comment

POTANG MATWA NA CA

Neng Almario “amor” C. de Jesus

Dacal la retang mangatwa, macalunus ing bili ra
Matwa lang magdilidili, alang lilingap carela,
Detang anac a asaan, cuculang ing panaun da,
Anya rugu nung matwa na, ketang “Hospice” ca mipunta.

Ing bie keti America, ing gagawan da macanyan,
At deta nang Pilipino, agad da nang pacyapusan,
Ing sesen la deng pengari, cabang mabie pacyabayan
Ugali rang keragulan, mistula ra nang gilutan.

Nung atyu ca Pilipinas, beitan mung mal a labwad
Detang Anac mung malugud, lingapan da cang misadsad
Potang miras ing panaun, metwa na et e milacad
Sesen da ca king panirug, at e la manintun bayad.

At nung matwa nang magulyan, malilyari e mu balu
Ala na ytang panandam, at carug ning kecang salu
Deta nang mal mung suli, e la tutucnang susuyu
Angga na king panlacu mung, lacwan mune’ ing kecang pusu.

Ing bie keti na king Yatu, anting bulung malalagas
Mengaring lua a mamagus, mababaldug anting perlas
Yti dapat tang tandanan, mitacda na ngan ing horas
Ytang sabla mapupus ngan, ala na ca caiang bucas?.

acdj – Ing Agila ning Apalit (google blog)
Artesia, CA, USA Oct. 20, 2014

Posted in PL Almario C. de Jesus, Poeta Laureadu | Leave a comment

ING DILA NING TAWU

Neng Amor de Jesus, (Ing Agila Ning Apalit)-

Ing dila ning tawu cailangan banten ya
Tictac ya cabasa ketang cabilyan na
Anya ing madalas mitataluras ya
Macapanasakit ytang lulwal caya.

Calati nang bage keng kekang catawan
Obat yang magdala keng bye mung dadalan
Ya ing maging sangcan mayap o carucan
Agyang malati ya e me pu lalatiyan.

Ca-alimbawa ne timon ning Pilotu,
Nung nun ne cabigan tuki ya ing barcu
O anti yang api ibat king palitu
Nung eca mimingat dagul micalucu.

Yng maruc a dila siran ne ing bye mu
Ala na cang galang careng parang tawu
Anya manginlag la anti cang demonyu
Nung e mu pilinan lulwal keng asbuc mu.

Gamit na ning Tawu tagleng gelingan na
Maca patunud ya patucyan buri na
Miyaliwng “animal” ayup at asan pa
Ing sariling dila e tutuki kaya?

Inya malilyari dilang maindredus
Dangalan siran na sobrang pamagbastos;
Alang pacundangan bunga ning depatan
Sakit a penandaman at camarinayan.

At neng mangadi ca ing Dios yang pupuryan
Adwan itang mayap pati caligtasan
Sumangid na nita dila anting sundang
Palmuran, libacan wangis ning Miglalang.

Deta nang tanaman metung meging bunga
Mangga ya ing tanam ing bunga mangga ya
Ing metung a dila deng bunga adwa la
Metung cayapan ya yng cadwa maroc ya.

Dacal a perwisyu keng sanga sangang dila,
At keng pamagsalita ing casebyan ngana:
“Bayu ca manatsa natsa, magsalamin ca pang capsa
Ba mu rugung ackit Caca, mata mu king muri misna”.

acdj

Posted in PL Almario C. de Jesus, Poeta Laureadu | Leave a comment

E CU RUGU MASALAPI, dapot mayaman cu

Neng Almario “amor” C. de Jesus –

1.
Alang dacal a salapi, gintu’t alahas a dacal,
Kotsing bayu keng modelu, “Brand” a malan misnang camal,
Ala cung asabing Mansion, mamasyal aliwang lugal.
Ala nang alac inuman, alang “chickas” ampon sugal.

2)
Anya ing bili cu ngeni, nung cacung abibitasa
Mabibye cu keting yatu, maluca mu at payapa
Meging ugali na cacu, ing dungdungan ke ing Biblia
Bang abalu ing Amanu, at ing Mayap a Balita.

3)
Sasabian da deng aliwa, potang sobra ca salapi
Mitas na ca pilubluban, manaliwa ing ugali
Deng taung macapadurut , tucyan da ing kecang buri
Alang malyaring salangsang, utus mu anti mung ari.

4)
Anya ining bie mu ngeni, adwa lang misasamsaman
Ing Dios o ing Salapi mu, ninu ing dapat mung tucyan
Manyaman pin ing bili mu, ing sabla asali mu ngan
Ing bie mu king Yatung iti, e na mica-capupusan?

5)
Agyang tictac ca keng yaman, ganacan me sa ing Ginu
Nung bisa cang muli caya, potang datang ing horas mu,
Gamitan mu reng salapi, keng lugud para mung tau
E mu dasan ing Impiernu, a calupa nang Lazaru.

6)
Busbus na nitang carayum, ya ing dalanan mung pilit
Bacang milub king Caharian, ning maligayang pinandit
Pamudmud mu reng salapi, careng taung magcasakit
at mamun ca keting Yatu, magjingalung alang sakit.

acdj – Ing Agila Ning Apalit (google blog)
Apalit, Pampanga – Artesia, Ca. USA

Posted in PL Almario C. de Jesus, Poeta Laureadu | Leave a comment

“METUNG MANOC LAYAS”

neng ORLY MANALO DIZON;
Poema Persona; Sucad: 6/6; Orthografiang: C-K; Jun. 28/16.

1.
Careng gilid-gilid / cu manintun tagan
Mangalcal king pitac / ban atin apangan,
Unyaban dang abias / cacung paninasan
Atin sang mituki / butil a mapilan.

2.
Casumangid na ning / casakitan ning bie
Cacu kesanting na / libri cung maglacbe,
Mamuntang maralas / careng siping bale
Manasdap pamangan / bibilad dang pale.

3.
Macanian ya iting / dudurut ing bie cu
Kilub ning aldoldo / geua na ning Ginu,
Na ning patingapun / gagala cung ustu
King ban mikilaman / ining cacung pitsu.

4.
Ding aldo at bengi / pane mililiuas
Itang paruminggu / e male lalabas,
King e camalayan / ‘tang pabulan miras
Bie cung mitagurian / METUNG MANOC LAYAS.

5.
E ken mapupupus / canacung estorya
Libri cu mu naman / nung nu bisang munta,
Maburi cung ayan / ‘tang lugal laguerta
Managal insectu / tutung masustancia.

6.
Uling masipag cu / at parating mabsi
Butit cu’t catauan / metaba la deti,
Inia naman rugu / matsura cung suerti
Cacung catubale / buri da cung bangli.

7.
Ninu uari acu / carela cumontra?
Canacu dacal nong / mengangapa-una,
Alang acarapat / king miras carela
Calma ning mabibie / macanian tagana.

8.
Cacu ya sang yapse / ining panabilin
Caring sablang tau / balang e mibitin,
Nung ing panlasa mu / atin timplang sagin
Lutu yang putseru / kecong dinan pansin.

DIZLAG FARM, REST HOUSE & SWIMMING POOL; Oct 15/22

Posted in PL Orly M Dizon, Poeta Laureadu | Leave a comment

*GIAGIS NING **TAGULELE

 Neng Almario "amor" C. de Jesus-

*
Giagis ning tagulele, macanyan ing bie nang Sisa,
anyang cabud la mebating di Elias at ing bunsu na,
alus mesira ya isip, king dusang daralanan na,
lilibacan de at cailian, detang taung palamara,


Ing sabla peimburisan na, paramdam na’ing tagulele,
lipo-lipo ya keng dalan, mititisud, menga- pase,
dapot e na rin ticnangan, ytang banal na ping pake
akit nala sa’t acaul, mal nang anac a miwale.


Macanyan ya bili ngeni, ing Amanung Capampangan
ytang Singsing nang sisimpan ala ne keta keng Caban
ngening mewala ya yti, at buri tayang gamitan
yng ulaga at camal na, keca ta yang penamdaman.


Pilan la mu deng magdulap, a malugud king Amanu
ylang gugusal, gagambul, manenayang saupan tamu
bayung suling Capampangan, misam-metung king Parnasu
nung mibalic ya ing Singsing, ylang miputung king Tronu.


Nung ing singsing a amana, mecad eta ne pin akit
uling malwat neng mebating, pamanintun misnang sakit
ing labuad na ning Alaya, liban ne ning misnang lupit
nitang aliwang salita, papagaral da pang aplit.


Giagis na nining pusu, king siualang managulele
nung ing amanung beitan, misaldac ya at mipase
nanu pa ing ulaga na, salitang tatac na ning bie
nung ing amanung bat CAYA, Capampangan pabusten ye?

*
(*Giagis : aplit a pamamaniauad; babalisa king panandam
** Tagulele : Saingsing, Pagmalun ( “Lamentations”.)

acdj -Ing Agila Ning Apalit
Artesia, Ca, USA Oct. 5, 2014

Posted in PL Almario C. de Jesus, Poeta Laureadu | Leave a comment

DIOSA (JOSHA), ning paninap

Neng almario “amor” c. de jesus –

*
“Iparikil ke keca, o malugung Diosa (Josha)
Ini nang gale cung misapwac king sinta
At nung damdaman me, isipan mu sana
Ing ating lulugud, keca mal cung Diosa (Josha.”

2).
Capitangan na ning bengi, apaninap ke y Diosa/(Josha)
ketang duyan misisiping, magyuyung mitmung ligaya,
itang malagu nang lupa, careng tacde cu painawa,
cabang ding adwa cung gamat, panaguran de king sinta.

3.)
At dindam cung milingat ya, kinaul na cung matalic ,
ing pali ning catawan na, lulub cacu’t manialicsic,
anya e cu na pinigil, panamdamang misnang bagsic,
anting ayun dadagundung, at siguadang sinagitsit.

4).
Ding bunduc mengatugan la, at duldul a kinalugcug,
Itang danum minagus ngan, king marangle mica albug,
Ding bunga ra ding tanaman, tunggal tunggal mengabaldug,
At ing tiyup na nitang angin, ing bugsu na macacarug.

5).
Caibat na nitang silacbu, mipase ya ing catawan,
manimawas cang marimla, ketang pagal a delanan,
menahimik ing cabengian, alang selita nanu man,
keng pamicaul ming Diosa/(Josha) anting alang camatayan.

6.)
Neng mamun ne ing masala, at datang na ing dalumdum,
Horas na ing painawa ca, keng obrang patiting-apun,
Pangapiac da reng mata cu, kening isip icang laman,
At datang ne y “Morpheus, maging ligaya ing duyan.

acdj


Morpheus – Diosa ning Paninap, (metamorphoses)
(Nung atin ya mang acalagyu, iti e pu seria, adwan cu ing panupaya)
acdj – Ing Agila Ning Apalit (google blog)
Artesia, CA USA

Posted in PL Almario C. de Jesus, Poeta Laureadu | Leave a comment

CACUNG TATANGISAN

Neng Orly Manalo Dizon;
May 31, 2017

1
Malambat na mu rin / cacung cucumcuman
Ini nang lugud a / canacu mitanam
At binang micutcut / a misna king lalam
Keni nang pusu cung / micuput king lulam.

2
Calupa na nitang / pengacu cu keca
E ditman datang ing / itang miuale ca,
Keni nang panirug / ning pusung magdusa
A manayang caul / yayamut ning sinta.

3
Panintunan pa ing / caul mung mapali
Ampo ding uma mung / canacu
pebandi,
Aplus ding gamat mu, / lambis mung mayumi
Ilang gugunaman / ning pusu cung saui.

4
Panigapu na ning / tatangis cung pusu
Ing balicdan mu sana / ining paralampu,
Maging capilan man / cacung ipangacu
Tanggapan kening lub / ing cacu mituldu.

5
E cu na angad pa / kecang tumbasanan
Ining milalablab / lugud cung daraptan,
At lalung e buri / ita nang lunusan
King ban mung tumula / api cung cabilian.

6
Keca sana miras / cacung buring yatad
King ban mung abalu / ining cacung auad,
Tang e mu isipan / at canacu gauad
Ing e biasang tanggap / ketang realidad.

7
Ala cung sisisian / kening meging bili
A lubas pabandian / at alang salapi,
Ing pagsalbat cu mu / king Ginu tang Ari
Uaring cauangis cu / itang taung saui.

8
Pepainggulut ca / ketang pisumpanan
At piglibe mu cu / king bie misnang niaman,
A binie na nitang / taung mayacayan
Iti angga ngeni / CACUNG TATANGISAN.

DIZLAG FARM & SWIMMING POOL, Oct 8, 2022.

Posted in PL Orly M Dizon, Poeta Laureadu | Leave a comment