Capampangan

Neng Almario “amor” C. de Jesus

Dacal la retang mangatwa, macalunus ing bili ra
Matwa lang magdilidili, alang lilingap carela,
Detang anac a asaan, cuculang ing panaun da,
Anya rugu nung matwa na, ketang “Hospice” ca mipunta.

Ing bie keti America, ing gagawan da macanyan,
At deta nang Pilipino, agad da nang pacyapusan,
Ing sesen la deng pengari, cabang mabie pacyabayan
Ugali rang keragulan, mistula ra nang gilutan.

Nung atyu ca Pilipinas, beitan mung mal a labwad
Detang Anac mung malugud, lingapan da cang misadsad
Potang miras ing panaun, metwa na et e milacad
Sesen da ca king panirug, at e la manintun bayad.

At nung matwa nang magulyan, malilyari e mu balu
Ala na ytang panandam, at carug ning kecang salu
Deta nang mal mung suli, e la tutucnang susuyu
Angga na king panlacu mung, lacwan mune’ ing kecang pusu.

Ing bie keti na king Yatu, anting bulung malalagas
Mengaring lua a mamagus, mababaldug anting perlas
Yti dapat tang tandanan, mitacda na ngan ing horas
Ytang sabla mapupus ngan, ala na ca caiang bucas?.

acdj – Ing Agila ning Apalit (google blog)
Artesia, CA, USA Oct. 20, 2014

Neng Amor de Jesus, (Ing Agila Ning Apalit)-

Ing dila ning tawu cailangan banten ya
Tictac ya cabasa ketang cabilyan na
Anya ing madalas mitataluras ya
Macapanasakit ytang lulwal caya.

Calati nang bage keng kekang catawan
Obat yang magdala keng bye mung dadalan
Ya ing maging sangcan mayap o carucan
Agyang malati ya e me pu lalatiyan.

Ca-alimbawa ne timon ning Pilotu,
Nung nun ne cabigan tuki ya ing barcu
O anti yang api ibat king palitu
Nung eca mimingat dagul micalucu.

Yng maruc a dila siran ne ing bye mu
Ala na cang galang careng parang tawu
Anya manginlag la anti cang demonyu
Nung e mu pilinan lulwal keng asbuc mu.

Gamit na ning Tawu tagleng gelingan na
Maca patunud ya patucyan buri na
Miyaliwng “animal” ayup at asan pa
Ing sariling dila e tutuki kaya?

Inya malilyari dilang maindredus
Dangalan siran na sobrang pamagbastos;
Alang pacundangan bunga ning depatan
Sakit a penandaman at camarinayan.

At neng mangadi ca ing Dios yang pupuryan
Adwan itang mayap pati caligtasan
Sumangid na nita dila anting sundang
Palmuran, libacan wangis ning Miglalang.

Deta nang tanaman metung meging bunga
Mangga ya ing tanam ing bunga mangga ya
Ing metung a dila deng bunga adwa la
Metung cayapan ya yng cadwa maroc ya.

Dacal a perwisyu keng sanga sangang dila,
At keng pamagsalita ing casebyan ngana:
“Bayu ca manatsa natsa, magsalamin ca pang capsa
Ba mu rugung ackit Caca, mata mu king muri misna”.

acdj

Neng Almario “amor” C. de Jesus –

1.
Alang dacal a salapi, gintu’t alahas a dacal,
Kotsing bayu keng modelu, “Brand” a malan misnang camal,
Ala cung asabing Mansion, mamasyal aliwang lugal.
Ala nang alac inuman, alang “chickas” ampon sugal.

2)
Anya ing bili cu ngeni, nung cacung abibitasa
Mabibye cu keting yatu, maluca mu at payapa
Meging ugali na cacu, ing dungdungan ke ing Biblia
Bang abalu ing Amanu, at ing Mayap a Balita.

3)
Sasabian da deng aliwa, potang sobra ca salapi
Mitas na ca pilubluban, manaliwa ing ugali
Deng taung macapadurut , tucyan da ing kecang buri
Alang malyaring salangsang, utus mu anti mung ari.

4)
Anya ining bie mu ngeni, adwa lang misasamsaman
Ing Dios o ing Salapi mu, ninu ing dapat mung tucyan
Manyaman pin ing bili mu, ing sabla asali mu ngan
Ing bie mu king Yatung iti, e na mica-capupusan?

5)
Agyang tictac ca keng yaman, ganacan me sa ing Ginu
Nung bisa cang muli caya, potang datang ing horas mu,
Gamitan mu reng salapi, keng lugud para mung tau
E mu dasan ing Impiernu, a calupa nang Lazaru.

6)
Busbus na nitang carayum, ya ing dalanan mung pilit
Bacang milub king Caharian, ning maligayang pinandit
Pamudmud mu reng salapi, careng taung magcasakit
at mamun ca keting Yatu, magjingalung alang sakit.

acdj – Ing Agila Ning Apalit (google blog)
Apalit, Pampanga – Artesia, Ca. USA

 Neng Almario "amor" C. de Jesus-

*
Giagis ning tagulele, macanyan ing bie nang Sisa,
anyang cabud la mebating di Elias at ing bunsu na,
alus mesira ya isip, king dusang daralanan na,
lilibacan de at cailian, detang taung palamara,

Ing sabla peimburisan na, paramdam na’ing tagulele,
lipo-lipo ya keng dalan, mititisud, menga- pase,
dapot e na rin ticnangan, ytang banal na ping pake
akit nala sa’t acaul, mal nang anac a miwale.

Macanyan ya bili ngeni, ing Amanung Capampangan
ytang Singsing nang sisimpan ala ne keta keng Caban
ngening mewala ya yti, at buri tayang gamitan
yng ulaga at camal na, keca ta yang penamdaman.

Pilan la mu deng magdulap, a malugud king Amanu
ylang gugusal, gagambul, manenayang saupan tamu
bayung suling Capampangan, misam-metung king Parnasu
nung mibalic ya ing Singsing, ylang miputung king Tronu.

Nung ing singsing a amana, mecad eta ne pin akit
uling malwat neng mebating, pamanintun misnang sakit
ing labuad na ning Alaya, liban ne ning misnang lupit
nitang aliwang salita, papagaral da pang aplit.

Giagis na nining pusu, king siualang managulele
nung ing amanung beitan, misaldac ya at mipase
nanu pa ing ulaga na, salitang tatac na ning bie
nung ing amanung bat CAYA, Capampangan pabusten ye?

*
(*Giagis : aplit a pamamaniauad; babalisa king panandam
** Tagulele : Saingsing, Pagmalun ( “Lamentations”.)

acdj -Ing Agila Ning Apalit
Artesia, Ca, USA Oct. 5, 2014

Neng almario “amor” c. de jesus –

*
“Iparikil ke keca, o malugung Diosa (Josha)
Ini nang gale cung misapwac king sinta
At nung damdaman me, isipan mu sana
Ing ating lulugud, keca mal cung Diosa (Josha.”

2).
Capitangan na ning bengi, apaninap ke y Diosa/(Josha)
ketang duyan misisiping, magyuyung mitmung ligaya,
itang malagu nang lupa, careng tacde cu painawa,
cabang ding adwa cung gamat, panaguran de king sinta.

3.)
At dindam cung milingat ya, kinaul na cung matalic ,
ing pali ning catawan na, lulub cacu’t manialicsic,
anya e cu na pinigil, panamdamang misnang bagsic,
anting ayun dadagundung, at siguadang sinagitsit.

4).
Ding bunduc mengatugan la, at duldul a kinalugcug,
Itang danum minagus ngan, king marangle mica albug,
Ding bunga ra ding tanaman, tunggal tunggal mengabaldug,
At ing tiyup na nitang angin, ing bugsu na macacarug.

5).
Caibat na nitang silacbu, mipase ya ing catawan,
manimawas cang marimla, ketang pagal a delanan,
menahimik ing cabengian, alang selita nanu man,
keng pamicaul ming Diosa/(Josha) anting alang camatayan.

6.)
Neng mamun ne ing masala, at datang na ing dalumdum,
Horas na ing painawa ca, keng obrang patiting-apun,
Pangapiac da reng mata cu, kening isip icang laman,
At datang ne y “Morpheus, maging ligaya ing duyan.

acdj

Morpheus – Diosa ning Paninap, (metamorphoses)
(Nung atin ya mang acalagyu, iti e pu seria, adwan cu ing panupaya)
acdj – Ing Agila Ning Apalit (google blog)
Artesia, CA USA