Acaquit Que

( Tula / Poema )
nang Jose Roman Reyes Laquian PLI

Acaquit que quetang queang / calaparan ing marangle /
nung nu ding balang tanaman / presco la’t aluntiang cule /
at ding ayup magcantajan / at mag-siyap lang macasale /
qng musicang tiup ning angin / Amian langan maquiyugne ; /
macanian ya ing amanu / ning quebaitan cu at male , /
maqui diuang asmu lalam , / mitmu ya bie at macule , /
malindayug yang tumaila / ning indung ibatan ning bie , /
queng pusu ya’ing capainauan / maqui dalit a cayabe . /

Acaquit que itang jardin / ibat quetang calalaman /
ning Indung Sicluban linual / yang ganap a casiglajan , /
ibat quetang queang tanqueng / medilig at meyambunan /
angga qñg pamaniampagang / masamiu at masna leguan ; /
macanian ya ing amanung / miyuranan , miyaldaoan , /
minusbung ya arapa’ning / galing aldong macatiman /
at qñg tindag ning cule nang / quinablas quetang catasan /
linto ya ing dalise nang / diua , pusu , banglu’t leguan . /

Acaquit que qng sicluban / mipanuanan ya’ing Eden ta /
at ing ilug nang manatad / caring tanaman bie’t sigla , /
qng camamaranunan ing / ambun mumumang dicut na /
at ing angin ning cauran / aldo lalabul ne’ing dimla ; /
ing Amanung Capampañgan / paraisong santungan ya /
maqui ilug yang mamalun / cundiman , canta’t poesia ; /
balang bayung abac ning bie , / capalsintan ya’ing dalit na , /
panaun man ning ligalig , / diua na ning tetagan ya . /

Acaquit que ing banua qñg / imala’nang iro’t sutla /
at ing aldo nang saslag qñg / abac ning munag-sumala /
at maguing queang cabengian , / ing reinang bulan timaua /
yang papalto caningningan / cambe ding batuin a lacsa ; /
ing Amanung Capampañgan , / matindi ya api diua /
sinese da caring pusu / ding malugud a macudta ; /
amanu yang masna tindag , / quislap ning banuang masala /
ibat caring Nuan a Labi / ning POETA ta’ng DIOS IBPA ! /

Acaquit que yang dagat qñg / pamiduyan-alun pane , /
ding alun misasaglulu / qñg sintang aplaya ume /
ban mangising panamdam ya’ing / umang-lugud nang dalise /
cambe labul ning manyubung / Amian a marimla daque ; /
ing Amanung Capampañgan / qñg lindayug-alun babie /
diua’t tindag qng panaun / ning pangayatyu na at bie , /
qñg balayan nang palsintan , / malindayug yang mayugne , /
qñg sinta na magdatun ya’ing / umang-lugud nang dalise . /

Ing marangle maqui presco / at aluntiang ya tanaman /
at ing jardin masamiu ya / caring sampagang maleguan /
at ing Eden mabibie ya / qñg ilug nang paninuman /
at ding aldo , bulan , batuin . . . / magningning la qñg catasan /
at ding alun dayatmalat / alang patna lang magduyan /
pauli mu , O’ Macudta / ning Amanung Capampañgan –– /
queng sipagan mung gagambul , / gagale at mag-cundiman . . . /
magBIBA ya ing Amanu , / caring quecang cauatasan ! /

May be an image of nature, tree and grass
Posted in PL Jose Roman Reyes Laquian, Poeta Laureadu | Leave a comment

Crisotan

Alang Dios? #1
Neng Hernan Pablo

Atin waring Dios milalang king sabla
Buklat ding mata mu akit ing masala
Dakal kalamidad king yatu sisira
Sakit a dinatang midala king lugma
King pamanalig mu miumam ka kaya?
Ala kang panayan, ala naman ala!
—————————0————————–
Obat manyakan ka bage e bitasa
Pati pamagduda linagpas pa biga
Akakit ding mata isip mung timawa
Bage atatalan panwalan mung kusa
Saradu mung isip alang mayupaya
Anya manumis ka karening manwala
—————————–0—————————-
Nung atin pin Dios kekang panaligan
Magugulung yatu nanu ining sangkan
Dakal ding daranup ala lang apangan
Dinatang a Covid teya sinalangsang
Pebustan meganap dakal a kasiran
Metampus a bunduk melanging gabunan
—————————-0—————————–
Tabakit tabakit ninung maki dapat?
Bage mengasira salang ilalapat
Parsala kang pedro e ata marapat
E mu namam ikit mata mung mipukat
Panwalan mu namu kekang asisipat
Tambing manalaru kabud na manyagap
—————————0—————————–
Nanung panwalan ku? bage e akakit?
Gamitan ing buntuk at ining pamisip
Obat lalawut mu? Atin naman malapit
Teka mo libutad buri mung gigilid
Ing pamanwala mu e muna pipilit
Nung e ka galo ala kang adamit
Tutung ala naman Dios a keti sulip.
—————————0—————————
Malulunus ku man king kekang panwala
Ga man tatakut ku king kekatang paksa
Ing panwalan ku atin mayupaya
Milalang king yatu at kekatang adua
Nung e me panwalan atin pin Bathala
Pakisabi ku lisya king pamanuliksa
—————————0——————————
Nung atin pin Dios a kekang panwalan
Nung atin pin Dios king yatu milalang
Obat pisawili ding keyang lelangan
Obat menatili iting kakaluluan
Bage e atanggap,, kakung kaisipan
Bage e atanggap ning kapikakunuan
————————–0——————————-
Bage e akakit kaku yang panwalan
Kalupa king Dios kakung daramdaman
Kaya ku manyawad tibe at sikanan
Potang magkasakit ya ing panaligan
Uling keng balu ku babye kapauman
Potang manangis miras king kasasagkulan
—————————–0—————————–
Yaku panwalan ku akakit ding mata
Nung e ku galo miras ku king dusa
Magpakatau ku bang ku man milisya
Karing dewakan at nanu pa mang sala
Pane paninasan kayapan, ligaya
E ku man panwalan Gloria karin Banwa
—————————0—————————–
E na buring sabyan pedaig kung kusa
Pasalamat keka apisabing paksa
Ing panwalan mu ing e ku manwala
Kening panwalan ku e ka mabibisa
Ing pisasabyan ta pututan tane pa
Memye sang saya kareng mekabasa
—————————–0—————————–
Salamat salamat keka mekidake
King talamitam ta kaku ya metibe
Kening kapanwalan e ya makayarle
Datang sa ing oras katutuan akit te
Sumlag ining sala kekata salake
Pakildapan ne sa niting pamigale.

May be an image of grass
Posted in Poeta Herman Pablo | Leave a comment

SIRAC 10:4

Ing capanibalan king labuad atiu caring gamat ning Ginu, tutulduan Ne ing pamuntuc a carampatan manibala caniti king macatacdang panaun.

DIZLAG FARM, July 22, 2022

Posted in PL Orly M Dizon, Poeta Laureadu | Leave a comment

NINU ?

( WHO ? )
( Tula / Poema )
nang Jose Roman Reyes Laquian PLI

Caring pundacion ning labuad , / NINU uari ing mibili ? /
NINU carelang mituldu / quing umpisa anggang tauli ? /
NINU carela ing misle / ban masucad at masuri ? /
NINUng mibili quing batu / nang paniuluc a matindi ? /

NINU uari , qng tula ding / batuin ning munag sumala , /
cambe ding anac na ning DIOS , / pepurian dang metung siuala ? /
NINU uaring Mayupayang / mengitacda caring sabla , /
magui man caring panaun / potang matatda ing sala ? /

NINU ing minaguanta quing / dayatmalat a malalam /
‘niang mibugnus ya’t misapuac / ibat quing caralumduman , /
‘niang binalut Ne quing ulap / at limpinan caring lulam , /
at mibiling anggana’nang / e na sucat lalagpusan ? /

NINUng mibili quing pasbul / na’t micanang cabat niti /
at miniabi queang dayat / malat , ” Angga ca mu queni , /
at ing lagpus ca caniti , / e ca sucat mapaliari ,
ding mangatas a alun mu / mangasambulat la queti ! ” ? /

NINUng cabud mecaibie / masalang bilin quing abac /
at tinubud ban munta ya / quing lugal na itang munag /
ba na lang asacmal detang / caguilira’na ning labuad /
at ipagpag na la’t sucat / ban idayu ding marauac ? /

Caring ulu da ring dayat / malat , NINUng miglayagan /
at linacad quing e abut / tarucan a Calalaman ? /
NINUng menaquit na caring / pasbul na ning Camatayan , /
caring talabante pasbul / quing labuad Caralumduman ? /

NINUng cabud minialugsug / quing labuad at lepara’na ? /
Quing pacasautan ning sala , / NINUng cabud mecapunta , /
Maguing quing cacarinan ning / dulum nung nu magdatun ya , /
NINUng macatuldung lugal / ning balang metung carela ? /

NINUng milub quing lugal a / quing niebi pititinggalan /
at menaquit quing lipat a / lugal pipagcamaligan , /
a migsadia quing panaun / ning imbing caligaligan , /
at paniatang da ring aldo da ring guerra at labanan ? /

NINU uaring mengitacdang / misasagsagan quing quildap , /
at nucarin ya ing tiup ning / angin-aslagan miraras ? /
Quetang uran a masican , / NINU Ya’ing mengulcul gasgas /
o quing dabumbung ning duldul , / minie pituntunan daclat ? /

NINUng macabalu nung ing / uran atin ya mong tatang /
at ing patac na ning ambun / atin pisapuacan inang , /
at ing hielo quenung matris / ya mo iti menibatan /
at ing ambun hielo na ning / banua quenu misapuacan ? /

NINUng manalicala cang / Pleiades e mipaindatun /
o mangalag queang Orion / quing pangatali nang laun ? /
NINUng macapalto Tala / ning Munag balang panaun /
at ituru quing Osa at / caring anac na manuntun ? /

NINU Yang macasucmaman / caring batas na ning banua /
at minie pamipatupad / quing labuad ban migampan la ? /
NINU Ya ing mangisiualang / utus ramdam da ring biga /
ban mamintu la’t ibulus / ing danum a aguantan da ? /

Caring quildap sasalitsit / NINUng mumutus matantu /
ban datang at maquibat lang , / ” Atiu na que pung susuyu .” ? /
NINUng mibiling cabiasnan / a macapalub quing salu /
o minie beluan quing pusu / ban quing lugud ya micatmu ? /

NINU Yang atin guelingan / a mamilang caring biga /
at mibubulus lulanan / da ring danum na ning banua /
ban ding alicabuc acua / da ing mipacat-pacat la /
at ding abtac na ning gabun / acua ra ngan mangasara ? /

Mal a GUINU , cabaluan mi , / Tutu Cayung Mayupaya , /
Dacal Cayung Calalangan / Tutung Macapagmulala , /
Dacal caming e pa balu / quing Catasan Yu at Diua , /
Binang dacal camangmangan / cami queng pamagsalita . /

Pepaquit Yu ing Cayapan / quequeng lelangan Yung tau , /
at iti mu ing panayan / Yu quecami , Mal a GUINU : /
ing daptan ya’ytang matulid , / lugud queng tapat at mipnu , /
at mibiebie quing cababan / lub quing arap Yu , o’ GUINU ! /

Posted in PL Jose Roman Reyes Laquian, Poeta Laureadu | Leave a comment

Ayupaylung

( Leaf Insect )
nang Jose Roman Reyes Laquian PLI

Macapagmulala / ca queng pangayatyu , /
anti ca mong tau / a e naman tau ; /
binang aliua cang / lelanga’ning yatu , /
macayamang lauen / ing pamaglacad mu . /
Babo ning tanaman , / anti ca mong bulung , /
magyuyung lalacad / cang paurung-sulung ; /
queng cumpal ding bulung / nung nu macasantung , /
nung e ca quiquimut , / anti ca mong metung . /
Macayaliua ca / caring Flora’t Fauna , /
misapuac qng gabun / ning naturalesa ; /
babo na ning sanga , / lauan-lauan daca , /
lacad mung magyuyu , / tutung macayama . /
Lelangan cang nanu ? , / ya’ing e cu a-uari , /
anti camong tau / a mapagcunuari ; /
Uculan cu queca , / ” Caninu ca bini , /
Queng bulung o ayup – / ayupan ca sapni ? ” /

May be an image of nature

Ayupaylung * = Ayup-ayupan bulung ( CAPAMPANGAN ) = Leaf Insect ( ENGLISH )


Flora at Fauna ( ” Flowers/Plants and Fawns/Animals ” )
” Flora ” ya ing bie ning tanaman ; ” Fauna ” macapatungcul ya caring animal .
( ” Flora ” is plant life ; ” Fauna ” refers to animals . )


Agpang cang Mabeluan Antonio Pigafetta , a cayabe nang miglayag Fernando Magallanes , minuna lang meyaquit queng quecatamung bangsang Pilipinas dening Ayupaylung ( Leaf Insect/s ) qng Isla ning Cimbonbon , a casalucuyan maquiquilala qng queang laguiung Isla ning Homonhon …
Qng Isla ning Homonhon ( a maqui dating laguiung Cimbonbon ) , pegaralan at sinulat na lang Pigafetta ding flora ( ” bie da ring tanaman ” ( ” plant life ” )

Posted in PL Jose Roman Reyes Laquian, Poeta Laureadu | Leave a comment

LA FLOR DE PAMPANGA , A Poem In Both The Capampangan And English Languages

Written By Poet Laureate International ( PLI ) Jose Roman Reyes Laquian .

LA FLOR DE PAMPANGA
( ING SAMPAGA NING PAMPANGA )
nang Jose Roman Reyes Laquian PLI

Lalam ning benging quiquilap na nitang bulan masala
At quing timan na ning banuang misuluanan batuin lacsa ,
Carin , quetang asmu banglung Pipanam-nanan ning Tula ,
Ning maligaya , maleguan alcus cang pacamacama .
O’ alcus batuin , sampaga-ng puru ning benging payapa
Nu anti quing cayumu cang sinibul anting tumaila !
Sipuac ning bengi’t sinese naca ning aldong masala ,
Ing nuan mabanglung leguan ding panaun meualang bina .

Ibat quetang mamulaclac madegulan a palumpung
Masamiu-ng bau gagato carin nung nu ca maratun ,
Malati at maputi ca , dapot mabanglu cang labung ,
Ing mangiraque mabanglu bau-ng mayaluntiang bulung ;
Matimtiman cang mumuquiat , tanaman maleguan usbung ,
Ding aldo’t bulan sinese’t liguran dacang misucung ,
Ding maputi-ng mamulaclac mu masamiu lang magdatun ,
Ibat quing dalise leguan ya’ing anyu mu maqui-ayun .

Quing cacung pipanam-nanan magquera cung abe raca ,
O’ Calinangan , cauangis ning metung a Pampangueña ;
Quing pamamulaclac , anti cang maleguan a dalaga ,
Mayumi at talusalang , Masna banglu-ng SAMPAGUITA ;
Presco’t saguiuang sampaga , manatiling mayatyu ca
Pamayapan me’ing caladua cu queng masamiu-ng inaua ;
Icang cacung inaua ning presco-ng angin lalam banua
O’ Masamiu-ng SAMPAGUITA ,
Ica , LA FLOR DE PAMPANGA !

Capabaluan CAPAMPANGAN : 1. Mamulaclac/Mamulaklak 2. Maniampaga/Manyampaga Cutang : Mamulaclac/Mamulaklak ne ngaraManiampaga/Manyampaga ne ngaraSanu careni ing masanting gamitan ? Paquibat : Pareu lang masanting gamitan , agpang queng buri nang ipauaga/ipawaga ning mangamanu careni …1. ” Mamulaclac/Mamulaklak ” macapariquil ya queng dutung o tanaman a manusbung bulaclac o sampaga . ( ” Mamulaclac/Mamulaklak ” refers to the tree or plant which produce/s flowers . ) 2. ” Maniampaga/Manyampaga ” macapariquil ya queng pamagdalang bulaclac o sampaga , o ing pamiusbung bulaclac o sampaga da ring tanaman . ( ” Maniampaga/Manyampaga ” refers to bearing flowers , or the flowering of plants . ) Ding palaguiung Capampangan a ” Sampaga ” ampon ” Bulaclac ” pareu la pangcabilugan pangariquil ( English translation : The Capampangan nouns ” Sampaga ” and ” Bulaclac ” refer to ” flower or flowers in general ” ) .
_________________
Dagdag Capabaluan CAPAMPANGAN :Ing ausan dang ” Sampaguita ” ring sablang Pilipinu ( e mu ding Taga-ilug o Tagalug ( Riverdwellers ) , ya ing cabaldugan na ning ” malating sampaga ” a meyacua o metacmus qng palaguiung ” Sampaga ” da ring Minunang Taga-pampang o Capampangan ( Ancient Riverbank/Rivershore dwellers ) .” Sampaguita ” mangabaldugan yang ” Malating Sampaga “. Iti menibatan ya quing amanung Capampangan ” Sampaga “. Ing ” Sampaguita ” ya ing ” malati o ca-lati-an ” na ning ” Sampaga “. Ding dagdag a letrang ” ita ” papasiag lang panga-malati , nung macananung ing amanung ” Chiquita ” ning Amanung Espanyol ( Spanish Language ) mangabaldugan yang ” malati / malating anac a babayi “.La Flor de Pampanga *, Amanung Espanyol ( Spanish Language ) a mangabaldugan ” Ing Sampagang Pampanga o Ing Sampaga Ning Pampanga ” quing Amanung Capampangan at macapatungcul ya quing ” malating sampaga ” ning Indung Labuad Capampangan a mayayaus ” Sampaguita ” ( * English Language translation : ” The Flower of Pampanga ” ) .

May be an image of flower and nature
Posted in PL Jose Roman Reyes Laquian, Poeta Laureadu | Leave a comment

Sampagang Loro * ( Parrot Flower )

A Poem In Both Capampangan and English Written By Poet Laureate International ( PLI ) Jose Roman Reyes Laquian . . .

Malagung sampagang tenam
Na ning Guinung DIOS quing Sa-yam ; **
Metung sampagang tanaman
Aburianan ding queraclan .
Sulbang , malaubi’t lare
Quing Octubre at Nobiembre
Maniampagang aslag-leguan
Ya’ing sampagang pagmulalan .

” Macasabit yang cocatu
Mitali ya caring pago ,” ***
Susulapo que lawe cu
Ya’ing mal a sampagang loro ;
Quing tanaman pagmulalan
Ya’ing ayup ning paraiso ,
Ing DIOS Yamung macalalang
Quing balat-sampagang loro !

Anting lorong susulapo ,
Diuang sulbang , puti’t ubi ,
Maleguan yang lipo-lipo ,
Larauan yang macawili !
Ing Impatiens psittacina
” Dork Nok Khaew ” quing Thai aus da ,
Quing jardin na ning Pampanga ****
Sana’ining leguan atiu ya !

May be an image of flower and nature

Casangguni :
Sampagang Loro * = sampagang mepili quing catayang maglarauan ” Psittacina ” , a mangabaldugan ” anting/uangis loro ” . Dening claseng sampagang tanaman tutubu la quing caquewan ning paralayang Thailand ( malapit Chiang Mai ) , Burma , at quing paralayang-aslagan ning estadong Indianu ning Manipur . Mayayaus ya ining sampagang loro pauli ning ing queang sampaga wangis yang lorong susulapo nung lawen ya queng catalindiquingan .

http://www.snopes.com/photos/natural/parrotflower.asp
http://www.hoax-slayer.net/true-circulating-parrot…/
http://www.exoticrainforest.com/Rare%20Thailand%20Parrot…

Sa-yam ** = o Siam , ya ing dati/sadiang laguiu na ning bansang Thailand .
” Macasabit yang cocatu
Mitali ya caring pago ” *** = ya ing pamaglarauan pengamanuan nang botanicong Ingles Joseph Dalton Hooker .

Iniang banuang 1901 , ing botanicong Ingles Joseph Dalton Hooker ( 1817 anggang 1911 ) lerauan ne ing sampagang loro a wangis ya anting metung a ” cocatu a macasabit o macatali quing leting caring queang pago ,” agpang queng mebangguit quetang ” Curtis Botanical Journal Magazine .” Pemalaguiuan neng Hooker ing tanaman , at pinili ne ing catayang maglarauan ” Psittacina ” mangabaldugan ” anting/wangis-loro ” .
Pampanga **** = metung yang maleguan probinsia ning bansang Pilipinas a macalugal quing localidad ning Calibudtan Luzon .

Posted in PL Jose Roman Reyes Laquian, Poeta Laureadu | Leave a comment

SIRAC 9:10

E me painggulutan ing sadia mung cacaluguran,
manakit ca mang bayu, iti e ne atumbasan.

DIZLAG FARM, July 20, 2022

Posted in PL Orly M Dizon, Poeta Laureadu | Leave a comment

Mangapampangan Tamu – serye, Blg7

Dumingguan a serye, para keng ikapanatili ning kekatang Amanung Sisuan.

https://capampangan.whereishome.info/wp-content/uploads/2022/07/MangapampanganTamu-Blg7.pdf


Posted in Anac Ning Arenas | Leave a comment

Mangapampangan Tamu – serye, Blg6

Dumingguan a serye, para keng ikapanatili ning kekatang Amanung Sisuan.

https://capampangan.whereishome.info/wp-content/uploads/2022/07/MangapampanganTamu-Blg6.pdf

Posted in Anac Ning Arenas | Leave a comment