Capampangan

Neng Orly Manalo Dizon;
May 31, 2017

1
Malambat na mu rin / cacung cucumcuman
Ini nang lugud a / canacu mitanam
At binang micutcut / a misna king lalam
Keni nang pusu cung / micuput king lulam.

2
Calupa na nitang / pengacu cu keca
E ditman datang ing / itang miuale ca,
Keni nang panirug / ning pusung magdusa
A manayang caul / yayamut ning sinta.

3
Panintunan pa ing / caul mung mapali
Ampo ding uma mung / canacu
pebandi,
Aplus ding gamat mu, / lambis mung mayumi
Ilang gugunaman / ning pusu cung saui.

4
Panigapu na ning / tatangis cung pusu
Ing balicdan mu sana / ining paralampu,
Maging capilan man / cacung ipangacu
Tanggapan kening lub / ing cacu mituldu.

5
E cu na angad pa / kecang tumbasanan
Ining milalablab / lugud cung daraptan,
At lalung e buri / ita nang lunusan
King ban mung tumula / api cung cabilian.

6
Keca sana miras / cacung buring yatad
King ban mung abalu / ining cacung auad,
Tang e mu isipan / at canacu gauad
Ing e biasang tanggap / ketang realidad.

7
Ala cung sisisian / kening meging bili
A lubas pabandian / at alang salapi,
Ing pagsalbat cu mu / king Ginu tang Ari
Uaring cauangis cu / itang taung saui.

8
Pepainggulut ca / ketang pisumpanan
At piglibe mu cu / king bie misnang niaman,
A binie na nitang / taung mayacayan
Iti angga ngeni / CACUNG TATANGISAN.

DIZLAG FARM & SWIMMING POOL, Oct 8, 2022.

Belangcas neng Lydia Lagman Gamboa
at kinuyad neng Orly Manalo Dizon.

1
Talaturu ing papil na a keang dapat gampanan
Misna ya king caulaga at sari ya king catimbang,
Matimbang ing tungculan na caring anac maintun beluan
Cabiasnan a maguing sulu king aldo rang paintungulan.

2
Tenguanan nang catungculan talaturu sari sakit
Uaring amun kening bie na caring pago macacabit,
Kilub na ning patingapun pane salita’t mimirit
Caring anac ing cabiasnan e na maliaring auaglit.

3
Talaturu pangalub na king cuartu nang pituturuan
Ya nang Ibpa at Indu ra anac a misna caracal,
At nung atin micasala atin ginauan garapal
Nung abarug ne ning maestra pengari ya ing calaban.

4
At nung e no apabiasa anac a anti careti
Ing calulung talaturu ya pang bagsacan dang sisi,
Potang apalmuran na la o acandut no man deti
At samantalang ila man carela gagauan da’ti.

5
Cabiasnan a tuturu na iti mayakit lumabung
Tumubu ampong manyupling manyanga at manyulapung,
Ing ganacang tuturu na king daratang a panaun
E mapanat ing beluan da at dacal la pa apupul.

6
Masanting a panugali tuturu na caring anac
Mibabatang talaturu nung king ucul no atatac,
‘La nang malili’t milisya king carelang balang landas
Alang lunto mapanaco macamate at manoldap.

7
Ing metung a talaturu cauangis na at catulad
Ing ortelanu king baryu a auasan dang anac pauas,
Talaturu anti mu rin tatanam na at mumulat
Cabiasnan a tatalsac na caring ucul da ring anac.

8
Nocarin o capilan man nung ala ya’ng talaturu
Alang dentista at pari comadrona at inyeru,
Talaturu bina cang nuan king kecang pamagserbisyu
King tugatug ning tagumpe carin ca o TALATURU.

neng ORLY MANALO DIZON
Orthografiang: C-K (ca,ke,ki,co,cu);
Sucad: labingadua; April 4, 2014.

1
Cabiasnan Nanu Ya kenu menibatan?
Metung yang regalu a mipmung canuanan,
King tau bisbas Ne bilang pananggalang
Ning Mayupayang Dios carin keang lelang.

2
Cabiasnan metung yang sibul a mamagus
Pinuman ning isip king utac tataglus,
Palabungan na’tang beluan ban talustus
Ban king casakitan ing tau calabius.

3
Cabiasnan ya naman ing pecaguyabnan
King tete na ning bie ya itang talanan,
Eran yang tucluanan king nasang parasan
Gamit panucyat king tronu ning dangalan.

4
Cabiasnan sulu yang a sari catindag
Gabe ne ning taung macalma’t mapalad,
At ating yang sala lisyan ing e mayap
Yang mugit king isip tukian itang dapat.

5
Cabiasnan taram yang armas a pangilit
Caretang mangaroc at ugaling ganid,
Metung ya’ting gunting maliaring pangupit
King capalaluan ding manialpac matulid.

6
Cabiasnan ya itang dalan king progresu
King mialiuang lugal na ning meto yatu,
Siencia at cabyayan ‘pong pamaninbentu
Alang asensu nung cabiasnan ala yu.

7
Cabiasnan metung yang instrumentung bage
Ya mu naman itang sandalan na ning bie,
King tau yang dapat keang cayantabe
Pamanintun na king dalan ning tagumpe.

8
Cabiasnan migit yang cailangan ning tau
Uling yang salamin na ning pangatau,
At yang paniabat king abluc ning demonyu
King tau binie ning Mayupayang Ginu.

DIZLAG FARM, REST HOUSE & SWIMMING POOL, Sep 27, 2022.

• belangcas neng ORLY MANALO DIZON.

1
Saplid, late ning panaun / ipauaga na king tau
Ilang magsilbing papakit / aral marca niting yatu,
Caring tau parikil ing / kimut deting balang membru
A memalen ning sicluban / marapat denan rimedyu.

2
Obat dimut la mu bilang / keti sulip ding macualta?
Mecad e mu ing sipagan / ‘tang sucatan o magdala,
Ketang parasan ning tau / o keang bie nu papunta?
A marapat den pakibat / at king sarili itoca.

3
Caring sabla e alingad / itang macatuang casebian
“bie ning tau keti sulip / uaring metung yang parugan,
mipapunta bandang babo / at ketang lalam nung misan”
Inia nanung bie ta ngeni / mapayapa sang tanggapan.

4
Nung kecata yang gunaman / itang susi ning tagumpe
Metung ya iting sipagan / caring cailangan ta king bie,
King sarili magcompiansa / at pamanalig matibe
A mapilan ketang pago / na ning tau maguing tagle.

5
Dacal na la kecatamu / a nung nu na mipasanglad
Panintunan itang suerti / calasag ‘tang abilidad,
Dapot uari’t keng manasan / mabusbus ya itang baclad
Ala iting asasagap / suerti pane yang lilintad.

6
Kecaba na ning panaun / dacal no reting matical
E king buri dang gulutan / itang problemang maracal,
Nune ing miras carela / dacal unus asnang sacdal
Mapait la ngan king lasa / itang carela mipacal.

7
Ing cabilian tamu ngeni / ala naman dapat sisian
Nune bucud ‘lang aliua / ing sariling caraptanan,
Ding anggang mangapalyari / maguing king bie pang daratang
Ticdo ta king pangasacab / bayung bucas yang arapan.

8
Ing aldoldo tang cruzada / cambe lacad ning panaun
ING MABIBIE KETI LALAM / ding problema ilang amun,
Marapat deting resolban / e paburen lang mibuntun
A kecata macalimpi / bayu culdas ketang aun.

DIZLAG FARM, REST HOUSE & SWIMMING POOL, Sep 20, 2022