Capampangan

( Poema )
nang Jose Roman Reyes Laquian

Metung tau sinalbag yang bining mayap quing marangle .
Misan bengi cabang mat’tud la ding sablang masalese ,
Din’tang ya ing casalang na’t sinalbag no ban miyabe
Ding bining e mayap a dicut libutad ding pale . **

‘niang tinubu at memunga ing pale , linto mu naman
Ing e mayap a dicut a sinalbag na ning calaban .
‘nia linapit la ding ipus queng guinu ra at mengutang ,
” E pu uari bining mayap ing silbug yu’t quecong tenam ? **

Ding dicut e dapat tenam misamut lang macananu ? “
Mequibat ya , ” Depat na yan ning casalang marauac cu .”
” Buri yung putputan mi ing dicut ? ” cutang da quing guinu .
Paquibat na , ” Ali , pota midame — pale tenam cu .” **

Paburen yung pareu lang tumubu anggang datang ya
Ing panaun ning papalut nung nu sabian cu carela ,
caring cacung talapalut : ” Tipunan yu lang mumuna
Detang dicut at saca yu aptasan at dulucan la . **

At quing canacung camalig dening pale tipunan yu ,
Dening bining guinintuan bungang mayap sinalbag cu ” . . . **
Ining talimhaga , nanung buri nang sabian quecata
Tungcul quing dicut libutad ning pale ? . . . Paquibaluan ta .

Itang sinalbag mayap a bini Ya’ing Anac Ning Tau .
Ing marangle ya ing mismung tutucnangan tamung yatu ;
Ing mayap a bining silbag Na ila ding nuan a tau
Ning Guinung DIOS quing carinan banua Na’t banal a reinu ! ***

Ing dicut ya ing patungcul caring tau ning marauac ;
Ing casalang a sinalbag quing bini na ning e mayap
A dicut ya ining diablong pecapun ding mapanlasac ,
Ya ing ibpa da ring tau quing cayapan mapangatgat . ***

Ing pamamupul ya itang cauacasan ning panaun ,
Ding talapalut ila ding angel Ning DIOS a tumagun .
Nung macananung dulucan la ding dicut a mitipun ,
Macanian ing maguing uacas da quing mitacdang panaun . ***

Itubud Na la Ning Anac ning Tau ding angeles Na —
Tipunan at simen da la ding taung palpicasala ;
Quing mapaling ornu , carin abe-abe yugse da la ,
Alang anggang tumangis la’t mitiguis caring ipan da . ***

Ding banal naman sunlag lang anti ning aldo quing banua ,
Quing Caarian ning Matapat a DIOS a Tutung IBPA ra . . .
Ding Amanu quing Caarian ning Banua mipapasiag la ,
Ing taung ating balugbug , sucat mung Maquiramdam ya ! ***

    Agpang Caring Banal a Amanu Ning DIOS :
                    ** MATEO 13:24-30
                  *** MATEO 13:37-43

( Poema para cang Tatang Dadong )
nang Ca JR

Cuchara’t tunidur e no gagamitan ;
ngana , ” mecanical ” lang e cu aburian ,
cabang queng gamat cu , maqui catimauan
cu queng pamagsubung pamangan maniaman .”

Ibat cayanacan acaugalia’na
pangua queng pamangan ding gamat nang sadia ;
quilub Malacañang , qng pipanganan da ,
abe lang mag-gamat ning canacung Tata .

Jose Roman Reyes Laquian
9:00 AM Sabado 10 Enero 2015
__________________

Gamat *
Pauaga :
Iniang anac-anac que pa , queng pangasalita nang Tata cu quecaming micacapatad , maggamat yamu at e taganang gagamit cuchara’t tunidur i Tatang Dadong cabang mamangan , subali mu caring pamicatagun nung nu cayabe na lang mamangan ding ” Pun Manimuna da ring Miyaliuang Estadu/Balaian ” ( ” Heads of Different States ” ) … Meguing ” Special Agent ” ya i Tata cu iniang panaun na ning pamanungculan na bilang Presidenti ning Pilipinas ning pisan nang Diosdado ” Dadong ” Pangan Macapagal . – Ca JR ( Jose Roman Reyes Laquian )