MAESTRO *

Posted on January 6, 2022 by Jose Roman Reyes Laquian



( Poema )

Nung sampulungan co ngan ding / dacal bague abalu cu /
At gunaman cu ing clasi / na ning nuan nang pangatau , /
E mag-addua iting lub cu / queti babo na ning yatu – /
Ing Mangaring Calupa na , / Carangalan Lubus cacu . /

Dacal ya balu lalam ning / banua ya’ing Mal tamung Maestro , /
Maqui isip yang masampat , / panlalaue positibo , /
Malagua yang paquiabayan , / panaquit na sensitibo , /
Inspiracion ya ing queang / babie oras at talento . /

Cauangqui ne ing Casibul / a maglingap bayung suli , /
Antimurin , ing Caleldo / qng aslag nang macapilmi , /
Ing Calagas caring lisyun / nang madiua’t sari-sari /
At qng Carimlan , mengari / yang salilungan mapali . /

Nung maliari cu mung turu / queang Maestro ta’ng Macamal , /
Ituru cu nung nu anti , / ding agaua na , caracal ; /
Ipaquit co detang bini / a tenam na qng pacamal /
‘nyang milabas a panaun . . . / ngeni maniampagang dacal . /

Ibulalag cu la quea / detang bubut caisipan /
nung nu , uli na , melualas / la pamanisip at beluan /
Cambe da ring susuyu dang / pusu qng Amanung Sisuan /
Pauli na , ing Mayap a / Modelo dang paquiapusan . /

Queng mayap nang inpluencia , / pequicuanan do ring peca /
Qng cabiasnan at cayapan , / biclat na la ding mata ra ; /
Qng Matapat nang Antabe / tigquil ne’ing pusu’t isip da , /
Caring dacal bague queng bie / da Tune yang Maalaga . /

Manenaya ya ing bucas , / manenaya yang mibait . /
Alang sucat icatacut / ‘guiang nanu man ing pasaquit ; /
Dalumdum ya man ing dalan , / o larauan man mapait , /
Cayabe taya ing Maestro , / cayagnan tayang dalaquit . /

Caring panucyatan matas , / o maguing bunduc-bunducan , /
Marundung o matililis / ding quecatang panucyatan – /
Mucyat , mucyat ta’ng papatas / qng Parnasong Capampangan /
Anggang miras ta qng Siglo / na ning Bayung Cabucasan . /

Gulut lulam ning alapap , / macatiman ya ing aldo . /
Babo labac ning pasaquit , / mipacde ya ing Parnaso . /
Caring aluntiang pastulan / ampon batis a malino , /
Painawa qng Capayapan / tamu cayabe ya’ing Maestro . . . /

Ngening Aldo-Quebaitan yu , / taimtim pangadian cu pu /
O’ Maestro Ernest C. Turla , / Daraquilang Talasuyu , /
” Macabang Bie Pa’t Sicanan / Mipagcalub Queco Rugu , /
” Magdatila Ya Ing Lugud / ning GUINU queng Quecong Pusu .” /

NUAN AT MASAYANG ALDO-QUEBAITAN QUECAYU , Coyang ERNIE C. TURLA !!!
MAESTRO * Poemang Pamagbati’t Parangal Qng Nuan a Aldo-Quebaitan ( Lunes , 06 Enero , 2014 ) nang Maestro-Poeta Laureado Ernest C. Turla , a sinulat nang Jose Roman Reyes Laquian .

Posted in PL Jose Roman Reyes Laquian, Poeta Laureadu | Leave a comment

Anting Sinulapo Burarul

Posted on January 6, 2022 by Jose Roman Reyes Laquian 

   ( Like A kite That Flew ) 
             ( Poema )
                          nang   Jose Roman Reyes Laquian
                     Qng panaun ning bie
                          cacu nang denasan
                              tinas co qng gabun
                                  sese cayanacan
                                      cayantabe da cu
                                          qng pamagpulaian
                                               anggang mepagal cu
                                                   mimingal catawan .
                     Micacalabugan  
                          qng calicutan da 
                              babo ning bubungan
                                  mangaparas la pa 
                                      lulupa cung mactung 
                                          tatagal carela   
                                               agad cong papatsean            
                                                   ding balang sugat da . . .
                     Din'tang ing panaun
                          ning pamagsulapo   
                              metung bolang pisi 
                                  cacu yang pepalto
                                      dapot qng talan cu
                                          a mibalicucu  
                                               qng iquiran pisi
                                                   rugu meguili cu . . .
                     Anting sinulapo
                          burarul qng banua
                              ding bala cung anac 
                                  mamagsulapo la
                                      caras na ning tacdang 
                                          panaun mamun la
                                               pututan de'ing linia
                                                   yacu ing lacuan da .
                     Mamagsulapo la 
                          qng bie dang pa'intunan 
                              timauang manintun
                                  carelang cabyayan 
                                      at uli na niti
                                           lungub qng caisipan 
                                               agampanan cu na'ing
                                                   cacung catungculan .

Pawaga : Ining poemang ” Anting Sinulapo Burarul ” ya ing mayayaus a ” categoriang Tulang Timaua Pamiagus ” ( English : ” Free Flowing Poem category ” ) nung nu ing queang ” diua ” ( English : ” spirit or inspiration ” ) ala yang pamipainaua at timaua yang mamagus anting danum queng ilug angga na quing miras ya quing dayatmalat , at , qng cailugan ning cawatasan , ya ing ” timauang mamagus a diua a alang nanu man bangtas o tandang patimid ” ( English : ” free flowing spirit or inspiration without any punctuation mark ” ) .

Posted in PL Jose Roman Reyes Laquian, Poeta Laureadu | Leave a comment

LUMANG BARU

Posted on January 2, 2022 by Jose Roman Reyes Laquian


( OLD SHIRT )
nang Jose Roman Reyes Laquian

Queng pamanayus cu / carening susulud , /
iquit queng cayabe / ining luma cabud /
a baru nang laun , / mamitamit maniud /
qng pangapabustan / ning Daquilang Lugud . /

Ining lumang baru / ya’ing pepasaguiwa /
caring banua da ring / pasaquit at lugma ; /
Ya ing Piping Tanda / misulud misnang lua /
qng pangasalunan / nang canacung ibpa . /

Ining lumang baru / pacaingatan que , /
Matning Paganaca / qng milabas cung bie /
Mipnu Pamaglingap / ampon Pamanese /
cacu ning ibpa cung / Linugud Dalise . . . /

Posted in PL Jose Roman Reyes Laquian, Poeta Laureadu | Leave a comment

Capampangan

Posted on January 2, 2022 by AnacArenas

Ding bayung kayanakan at ding modernung memalen Kapampangan e ra ne masyadung sikasu ing Amanung Sisuan bilang lenguahing pamakipag-salita at pamakipag-talastasan karing karelang kayaduangan kapamalakan at mensahe. Pauli na siguru ning pamag-asensu ning yatu at pamanyulung ning kabiyasnan, ding memalen iyakma ra ing gawi at panasta king antas ning karelang ayabut a pegaralan at kabilian king bie, ban tamasan ang karampatang respetu at kalang-alang ning sociedad, komunidad at parang-tau.

Keng metung a anak-Kapampangang miparatun karing siyudad, antimo ning Menila, ban magaral, o manintunan, karaniwan nang piadian ing keyang (e mekad siseryan a) maralas pamag-Tagalug. Kareta namang mekapagyaring karera o mekapagdatun karing bansang Ingles ing salita, antimo ning Amerika, iti naman ing pagmaragul dang panyalita at panyulat, maski na pin pala-palipit mu neng maralas. At ninu pin naman ing makaparsala karela nung kapamilatan na niti milyari lang tatalangan da at atdanan papuri ring magmulala king karelang kapirustan. Nung ninu pa naman ding mengabiyasang dapat sanang mamingua at lalung munie paulaga king Amanung karelang kegisingan, ila na pin man ding mas pagnasan pang manyabi karing dilang ditak-ditak lalasun at gugupu king karelang minanang salita.

Kasalukuyan, ing pangkaraniwan a memalen Kapampangan ala yang pimale keng maselang pangabili ning keyang kebaitan at sisuan a Amanu at keng mamiligru nang pangakalinguan karing labi ring keyang sariling sapni. Idulug ya man o ipaganaka karela ing babalang disgu, keraklan nang pakibat ing payalang-balang pansin nune man ing tulirang e pamanwala king delikadu nang kabilian. Lalu pang pabayat king matinding amun ila ring keyang mamuntukan at talapangalakal a simbulu ning poder at kakayanan dapot magpaimburis at magbalag mung pago, keng lagyu marail ning mas masaganang pamangabyayan at mabilis a panyulung.

Basta’t e mepatna ing anti kaniting mimiral a kalakaran keng pangasupil ning Kapampangan karing salitang Tagalog at Ingles, tatayan lang aslu-menus magisan ding biasa pang magsalita kaniti kilub ning limampulu anggang dinalan a banua, nung nu ring ngening generasyun a mag-Kapampangan pa memaglako na la keti yatu, uling ding sablang bayung suli era ne daramdaman at aintindiyan ing katutubung salita.

Mapalad ya pa ing amanung Ilokanu at ding keyang manungkulan-balen ampon pilan a mengabiasang memalen gewa reng pagmasabalan ipamingua ing akabaitan dang salita at ngeni yang maging primera dang lenguaheng panuru karing magaral a mababang gradu, antimurin amanu dang pang-karatula at pamaskil keng pamangalakal.

Inya agkatan ta la ding pamuntuk-balen, mangangalakal at talapagsalita karing okasyun at pusyunan, gamitan ing karelang poder karing talatuki dang memalen, ban balikdan taya sana at pasibayung panyalita ing amanu. Kanita, mekad akua na pang mapaintun at e malaus mabating ing kekatamung mawawalang singsing a timpukan.

Posted in Anac Ning Arenas | Leave a comment

Pasalamat at kayadwanan

Posted on January 2, 2022 by Herman Pablo

Nang Herman Pablo

Atlung dalan anam ‘pulu’t limang aldo masaugling dinalan
kelub na ning mayupaya
bendisyun, lamak na”t kalam
uran ibat karin banua aslag ning aldo ‘lang tuknang
dudurut durut a yatu magpagalo king sikluban
ing angin ning pangisnawa kelub king balang lelangan
at king ambun na ning tula
sinagana ing aluntian

Ala lang tuknang mamagus taguling, sapa at ilug
saslag ya’ing aldo king abak king kabengian yang lalbug
dening mangakatas a pun mal yung gamat a miyubug
miyayaliwang tanaman king sikanan yu pepasibut
ding animal king marangle king kakewan, sablang ayup
binang megawa’t melalang king bie ming tau sasaup

Dios ibpa ming milalang kening gagalon ming labuad
ikaming ngeni duruku keka babye pasalamat
kalam, lamak at bendisyun pabanwa namang milabas
kasaupan yu ampong lukub karing bagyus mangalapad
bayung banwang datang lukuban yu eganang miyanak
ikayung maging sikanan pangambil mi at kalasag.

Tawli pang kayadwanan, lingguayi ning kekeng bangsa
e ya sa maging mapayit karing suli at pelangga
maging mayumu’t mayubu karing asbuk ra at dila
karing mag adbokasya, ding amanu e ro sa pamye menila
talaturu ‘t talausuk mika kababan sang kusa
amanu ming kapampangan sumulung ne’ t misaplala

At kekaming tala gale, mituburan tala sulat
mirinan keng sikanan lub manyapat keng bage mayap
kamtan pu sa ing pakamal, masalusu keng pung gunyat
pamangailangan ning labuad magsilbi ke sang matapat
karing sablang makalijim ing pluma ming mibulalag
keng kabiasnan yu O’Guinu, keng kawatasan mi sumlag…..

Posted in Poeta Herman Pablo | Leave a comment

King bayu at kudradu kung banwa

Posted on January 2, 2022 by Herman Pablo


Herman Pablo

Kortina ding awang matuling mitatak
King kakung sikluban mibalut king pisak
Mepulang tagimpan
king napung peninap
Sitsit ku king banua piping e makibat

Bayu ne ing banua nanu ing manaya
Kening kabilyan ku misalmak king dusa
Kaku mepanako terak ning ligaya
Dudurutang maskup king kudradung banua

Matuang banua meko
miras kapupusan
Kalame at ubi bisa kung apangan
Kesu at nilaga kakung peninasan
Dilpak kung lamesa maymut a tagimpan

‘Sumisi ku man at kumyak nang kumyak
Ala yang agawa ing sawi kung palad’

Posted in Poeta Herman Pablo | Leave a comment

Ing Palad At Ing Bayung Banua

Posted on January 1, 2022 by Rodel E. Gozum


Silaba 12 Sesura 6/6
Taladtad 4 Estropa 7

*
Mibait ne naman ing bingut a banua,
ban keyang alilan ing memun a matua.
Alang makibalu king kayang darala,
nung pagsalbat iti o tune ligaya.

**
Dapot nung nanu man itang kayang bakal,
saganan meng mitmu king kapanenayan.
Katmuan ya ing salu king mibayung tapang,
at arapan mu ing imbut nang ‘pagkalam.

***
Nung kapagsubuknan, lakuas kang mangangas,
e ka tatakut king iyatad nang kaplas.
Ibural me’ing salu king barug ning malas,
at metung man takbang e ka sa mamatras.

****
Nung pait naman ing kayang babakalan,
ing isagana mu mangayumung timan.
E ka paisira lub, itas me ing kanuan,
at pusanan mu ing bayat ning daralan.

*****
Nung katuraidulan ing apag na keka,
sukat kang tumula liwas king mimua ka.
Pasalamat ka nung akilala mula,
ding kasulu mu a maniulud maskara.

******
Nung pangalipit ing keka na idake,
magbaluktut ka pa king ulas na ning bie.
Potang ing bulsa mu maging makapal ne,
saka naka pamu mamagkimbekimbe.

*******
Ing tutu ing bayung banua a dinatang,
ala ya man iting nanu mang daralan.
Ing palad ning tau, ing tau mu naman,
Yang makipasari at makikaburian.

PL Rodel E. Gozum
31 Disiembre 2015
Munoz, Quezon City

Posted in Uncategorized | Leave a comment

Masayang Bayung Banua 2022

Posted on December 31, 2021 by Pretty Lisa
Dintang ne naman pu ing Bayung Banua.
Panibayung bie at panibayung pagasa.
Posted in Pretty Lisa | Leave a comment

Pepatuqui Cu Na

Posted on December 30, 2021 by Rodel E. Gozum


Lorung Malabit
Mala-soneto
Ortograpiang C-Q
Silaba 12 Sesura 6/6
Taladtad 14
Estropa 3 Quatrain 1 Couplet
*
Memun ne ing matuang magulian a banua
Yng mua qng pusu cu pebacal cu caia
ban ngening misapuac ne yng calibe na
saganan que iting malualas cu lupa.
**
Quelinguan cu na yng dapat dang milalû,
ding capara cu a sinintang qng pusû.
Inugse cu na yng guinabac qng salû,
yng aral cung icua sininup cu namû.
***
Pinulis cu na yng lua cung menalete,
qng cacung lupa a pauli ning lumbe.
Yng timang tinabug qng malugma cung bie
caring cacung labi ngeni siniro ne.
**
Yng sablang palsimi pepatuqui cu na,
qng banuang meco ban e na magbalic pa.
PL Rodel E. Gozum
01 Enero 2017

Posted in Uncategorized | Leave a comment

Droga

Posted on December 26, 2021 by Apung Gusting

nang Apung Gusting

06/10/19 Riyadh

16 a silaba, 4 a linya, 8 estropa

I

Kukú-kúkung mánimutlâ king asúk a mákagunâ

Âgwantá’nang é mibugjâ ban yang agad mitas “tama”.

Penandit mû asmé siglâ sásagakgak ya king túlâ

Súsulápo ya íng diwâ limpad-limpad karing bígâ.

II

Lalákad yang anting robut ing buntuk na mangilábut

King ilduk nang pasapulyut detang tud na méngalambut.

Ing díla nang mibaluktut mamapsé neng putut-putut.

Bagya námû mibakutkut kening bisyu mikukutkut.

III

Tabletas a kayang liklak é tatalab itang alak

Kabukas neng terak-térak é pápagal indak-indak.

Lipang ne at tilak-tílak at ring mata na mengaslak

É na ikwá mang métulsak kabud nya mû mípatalpak.

IV

Âtlung aldong alang paklud é mamangan é mátudtud.

Ing utak na mayayabud é pa mitan a kúkudkud

King asuk a anyud-anyud at gagápang king alulud

mányaliksik ya ing águd king inauang mapapaklud.

V

Mángalgal ya kalamnan at matatdâ ya panimanman

Málipup ya daramdama’t mangarimla talampákan

Kailanga’na nang mikargan at uyat na saksakanan

Ban kayingking ning katawan mipasno na at mipaldan.

VI

Ketang buntun misalampak pigáglón deng makatalpak

Pengusut de’t pemanggirak at saka re pa pinyaksak

King malan nang gabak-gabak ábitasa meng pinyamuak

Detang kaya mindakurak kargadu lang droga’t alak.

VII

Kalatkálat la keng dalan kabang atin sisingutan.

Akit mu lang mitágálan potang atin apagmasdan

Samsaman dé at abitan itang kwintas o tingga man.

Makananu lang sagipan ding kalulung kayanakan.

VIII

Pilan la pang mangasaldak at king áun mangaramak

manganabû’t misalalak karing tandus mangayakdak?

Pilan la pang líling ának a ing bié ra mangalabsak

keng gasgas a é da sanak  é mimisip bayu dalpak?

Posted in Uncategorized | Leave a comment