Capampangan

Lorung Malabit
Silaba 16 Sesura 8/8
Taladtad 4 Estropa 6
*
Ing sukal lub a mitipun, king kilub ning kakung salû
E na tiki ning panaun, a minagus masalusû.
Ing sugat na ning milabas, bistaman ngeni biuk niamû
mitmu ya pa king kaplas at, lipat ne pa ing sasayû.
**
Ing napun a misna salpak, e ne kelinguan ning ngeni
E ne agyung isalikut, ning pigagawan a aili
King gulut da rening timan, ing tutu e ku alili
Tatangis ya pa ing pusung, mebangal at metaloti.
***
Nung misan ing palad tamu, milalu ya kapamirû
Nanu man ing kayang sidia, alang taung makibalû
Bista man depat ku na ing, eganagana kung agyû
Ala kang simbitlang sangkan, kabud likuan mu naku mû.
****
Manibat king oras ayta, migmaimut ne iyang tulâ
King bie kung ikmul ning dulum, e ne minampit bitasâ
Kabang ini naman lungkut, iyang biglang meganakâ
E ne meko king siping ku’t, binalut naku king lugmâ.
*****
Balang pinandit kukutnan, ku ing kanakung sarili
Nanu ing pamagkulang ku’t, maplas bina ing milyari
E ku balu nung kaninu, sukat ituldu ing sisi
Ninu ing makisala at, magdilidili ku ngeni.
******
Balu ku ing kakung pusu, kapilan man e ne kabug
King awus ning kapalsintan, mebandal ne at tinabug
Ing aldo bayu ya sana, king bie ku lubus nang lumbug
Abalu ku sa nung bakit, ginulut kang alang karug.

PL Rodel E. Gozum
31 Oktobre 2013
Munoz, Quezon City

Lorung Malabit

Silaba 16 Linya 4
Estropa 7 Sesura 8/8
*
Nanung mayap ta’ng aturu karing anak a malatî,
nung sabian tamung ustu la ring bageng malinong ali?
Ing makalisya king gulis sukat pugayan ta warî,
ban e ya maglulam lupa ing mekarapat king malî?

**
Ing balingbaling e taya sukat ausan a mabilug.
E dapat sabian malino ing danum a misna labug.
Ing mapalaris king tutu bala ne sanang tumabug,
liwas king kabang panaun ing ustu iyang makalbug.

***
Kalupa da ring problema a susubuk kekatamu,
kayabe king bieng makulul ing kamalian na ning tau
Iti ing maging kabiasnan king pinandit yang mi-ustu
a magsilbi ta’ng aturu karing suli tamung bayu.

****
Dapot nanu ing apulut da ring anak a magaral,
nung king lagyu ning rispetu ing katutuan e ta palual?
Itang maling akakit dang dirinan tamung pakamal,
maging ustu king isip at pakiapusan dang marapal.

*****
Ing sanu waring manawang, ing palakpakan ing lisyậ?
Ita sanang migkamali ban upayang e ya mimuậ?
O itulid ya ing bukut ban ding anak a pupunậ,
ing akua rang kaisipan, matulid at maka-akmậ?

******
Tutu, ing bilin ding watas, e sukat ing maninsultu,
dapot manumis  ta wari nung ing kiling tulid tamu?
E wari pamagsangkan ing purian tamung e mu nanu
ing tabinging ararapat da ring kekatang kasulu?

*******
Nung karing tutubung suli tutu tamung magmasabal,
ing atatangal ta’ng lisya e tamu sa pupugayan.
Uling datang ing panaun nung king lisya tala param,
lisya mu rin ing pamana ra karing suling daratang.

Rodel E. Gozum
20 Enero 2014
Munoz, Quezon City

Lorung Malabit
Silaba 12 Taladtad 6
Sesura 6/6 Estropa 8

*
Akua ra man muti ring kuyug a awak,
maging paldas ya man ing kule ring tagak,
mangalawang la man ding yari king pilak,
at maging makintab ing kulul ning burak
ing pusu ku e ya magbayu pamalak,
ika mung luguran nang tune’t mataktak.

**
Ing bulak mangasyas man anti king batu,
lambut man ing bakal a mengaring putu,
Ding apalya magi laman sari yumu,
at mait naman ing sabo da ring atbu
manaya ku murin king pamagbalik mu,
uling yan mu kabud ing paninapan ku.

***
Ing aldo lumbug ya man karin aslagan,
anggiang sumaka ya king dane albugan
o nung sumlag ya king benging kapitangan
at ing bulan naman neng balang kaugtuan
king pamanaya e ku mangainipan
uling manuala kung datang ka rin misan.

****
Anggiang maging sitsit nia kutug ing duldul,
at balamu akbung ing anging lalabul
nung king disyertu man ing danum sumibul,
at ing dayatmalat malangi niang kulkul
manalig ka banding e ku damdam sulsul,
a keka king dimla ati’nang kakaul.

*****
Ding ayup manganak laman tambing sisî,
anggiang ding mangebun king pugad ding babî,
ing patak ning uran magi man mapalî,
at mangaring yelu king dimla ing apî,
e lungub king isip ku anggiang sagulî,
a kening sale ta ing e na ka mulî.

******
Ding ayup anggiang e no tuklu king sanga,
at ding asan ila na retang sasampa,
ambus milako la bau ring sampaga,
at ing dinat tamu maging mabanglu na,
king likuan mung sumpa magsandal ku sinta,
uling ding amanu mu kaku batas la.

*******
Milibe man lugal ing banua at gabun,
at king biga namu mumugun ing ayun
marap man dagat ing pulayi ning alun,
at ing bukas iya na ing maging napun,,
e ku mako keni king kabang panaun,
anggang king sale ta datang nakang mapun.

********
Uling sinta kaku nung ika’ng mawalậ,
milako ngan silbi kanaku ing sablậ,
karing kakung labi tumabug ing tulậ,
e tuknang gumulis king lupa ku ing luậ
king kabud kumung bie mamun na ing salậ.
at ing yatu e ne dumurut bitasậ.

Rodel E. Gozum
30 Septiembre 2014
Munoz, Quezon City